SABO ANG? || KOKLOP || UTPAL DEBBARMA

SABO ANG? (02/04/2024) Swinai – Utpal Debbarma

Dophani bagwi samung tangwi
Twikelego thangkha kwlwgwi
Ani nokha ano yakarwi
Biyangbo thangkha hwijagwi
Twmani chalwi thangkhwna ano
Ringwide naikhwna ang uaisaswk?
Ani hathai,tongthai,sandai,
Tabuk jotono chalrwrwk angbai
Hukni maichwlwi khuchwlwi
Muikwthwng bwchwlwi
Bakao uarjak khormai
Hatal kiyokjak ehu hu khorangbai
Lamsokjak nasingkak nasingwi.
Ani dangdu ,chongphwreng,sumui sairanda
Khorang kosorjak khorok pilanda mwlangda-da
Thanti rikari swlwkjak khorang
Kotok soroui twmani thwiya ang?
Ang tiprasa adong muktoksa Muktwrwi liksa mokolo toksa
Kwchak koromo kuphur kwkhwrang
Bumulbaide sinimung?
Goronse naidi tote-ma
Kungthai barase khaphurma.
Swlai twinangya kok solok
Khugo perya kokborok
Twmano kwmajak sakse kwmajak
Totwra khembaitwk dumjak.
Sabo ang—–
Ani yaphang yarwng gwrwng bwrwng
Pogwi thangkha ano ang
Twmani pogwi thangkhwna
Tamungwi poknani nangkhwna?
Boktita rio ang——
Agi thinang hugo maitang
Tabuk haphang khapang
Khukni koktang swikangni khugo
Yaksinai chobjak takhukgo.
Eng eng kukai
Rajani bihik awng manyakhai
Angbo bwrwiya ongthun
Eng eng kukai.
Rajani sajwk kumarijwk
Nokhwla koilik kailak
Athukirirok suwari chongjak
Dwkhwi kwrwi khajak.
Hing kangaiti rignai risa
Made mankha bigwrasa
Nangmani nini muktiksa?
Lachimasingsa haiswloksa.
Khu swrangya dalo muiswlok
Mosdeng godok
Chamang chamang muisolok
Khapang sichomya twisa twi gati
Kwchang halok
Tongmang tongmang tongsolok.
Rajakhor khapang kha swrang mwkhang
Khajuni surang swlwkjak khorang
Khatwngjak imang bolong uaslok
Garingni philnani halok
Phemlok khorang aswk khwnathok
Bomtom ekhurwi monok
Phude-phuijakno naidiku thong
Node-norjakno arini khong.
Sabo ang—–
Pogwi thangkha ano ang
Twmani pogwi thangkhwna
Tamungwi poknani nangkhwna?
Boktita rio ang——
Chongjak adong
Swkang kha baksa
Ulo ha phonsa
Sumai ani thaisa
Chathun ano mwsa.
Lok chethuwang lok
Toksa hakaya yok
Ani ri-kari takjaksinai
Oh hani isiri sumai tangsinai
Uaying khilirwng khano lobsaui
Rwchab phayo phemlogwi
Rangchakni uaying ruphaini buduk
Lik muktwrwi lik
Pok dophano pok
Thu siring sorok
Rangni bwtang kotogo mwchang
Thuyale ta tong adong
Haiswlok-swlok ang
Sabo ang—–
Pogwi thangkha ano ang
Twmani pogwi thangkhwna
Tamungwi poknani nangkhwna?