Sabita Debbarmani Sinimung tei Swimung

Kokthum By Dhanuraj Noatia

Sabita Debbarmani sinimung:-

• Kokborok kokrwbaio bwrwi swinairokni bisingo swikwrwng Mgj. Sabita Debbarma khoroksa. Mgj. Swiwkwrwng Sabita Debbarma 1974 bisini 14^th January talo achaio. Bini achaima thai wngkha Dhalai hangkhorni kamalpur amchaini Surma kamio. Mgj. Sabita Debbarma koklop tei koktangrok swio. Bo khoroksa rwngnogo phwrwngnai.

Mgj. Swikwrwng Sabita Debbarma swimung hapharo:-

• Mgj. Swikwrwng Sabita Debbarma koklop tei koktang swio. Bo rwng remsni o swrwngwi tongphuru simino kok wanjwibai koklop swina chengo. Aboni ulo kokborokbai koklop, koktang tei kothoma bwsa swina chengo. Bo haste tei phatar hasteni juda juda kokrwbai pandarogo manjak kha. Tei a pandarogo bini baithang swijak koklop koktangrokno bo baithang khuk tangkha. Haste phatarni kwbangma pandarogo thangkha, koklopnairokni malaimung panda Mizoram ni Aizawl-o, koklopnai tei swinairokni malaimung panda Orissa ni Bhubaneswar abohai thai rogo manjagwikha bo. Boni koklop koktang rok Chethuang, Raima abohai dal bidal kokrwbai bwlaio sapokjak kha. Tei bo bini swijak koktangno khuk tangkha Agartala ni All India radio-o. All India radio tei Doordarshan kendra Agartala-bai songchajak kwbangma pandarogo manjak kha.

Mgj. Sabita Debbarmani swimung tei wansokmung:-

• Kokborok kokrwbaio bwrwi swinairokni mung sathani  Mgj. Sabita Debbarmani mung barikhai khusathai kwlaio. Kokborok kokrwbaino kuchuk beremo twlangwi hamsa rithani Mgj. Sabita Debbarma bo khoroksa. Bo Kokborok Sahitya akademi ni khoroksa adong. Bini swijak koklop koktang dal bidal kokrwbai bwlai tei bijab rogo sapogwi karijak kha.

Bini swijak koktang bijap “Kadeng Kadang Kadong” 2003 bisio phiyojagu. Bini a koktang bijabo brwi chi dok koktang tongu. A koktang bijapni tangsa koktang

“Titai”

“Khwnai bisingo tokthu bothojo

Harungsani Titai,

Ayang uyang thangwi manya

Kwbang bini rithai.

Mgj. Swikwrwng Sabita Debbarma cherai jorani siminu swi phaimaba cherai kokrwbaio bini wansokmung belai kuthuk.

Bini swijak tangsa koklop abo wngkha “Hayungni thani”. A koklobo bo habar, twima twisa, hapung, hathaino hamjakma phunuk kha. Swngcharo achai phaima salsa jotono ayang masingo yapri ma rinai. Teisa I mansingo kiphilde phai manno sai maya. Aboni hayungni habar, twibar, nokbar ni thani hamjakmung bisintwi sao.

“Tai waisa phirogwide phaywi manno

Abole siya.

Sawibo mangwlak.

Sal, hor, twima, twisa, hachuk, hatai

Kok rwgwlak kebono.

Nono boya.”

Boni karijak bijaprok wngkha

1. “Kadeng-Kadang-Kadong” koktang bijap 2003 bisio bijap khwlai karijago.
2. “Kokborok kerang kothoma” kerang kothoma bijap 2008 bisio karijago.
3. “Chokleng-kleng” koktang bijap 2008 bisio karijago.
4. “Bogla Rwchapmung” bogla rwchapmung bijapbo ahaino 2008 bisio karijak kha.
5. “Ayungmai” kerang kothoma bijap 2014 bisio karijak kha.

Abono karwi bini karijak bijap “Barsa Khum” koklop bijap, “Khatijak nini bagwino” koklop bijap.

Paithak:- Mgj. Swikwrwngni swimung tabok rwngnok tei rwngnok kotoro phwrwngjak tongu. Kokborokni hamari tubuthani Mgj. Sabita debbarmabo khoroksa.

Reference

1. An anthology Kokborok poems……….sakhani haikhe swidi
2. Kokborok bhasha sahityer kromobikas………….sakhani haikhe swidi
3. surang………..sakhani haikhe swidi
4. Debbarma,Sabita. 2014. Ayungmai. Language wing, Education dept. TTAADC, khumulwng

Chama Chaya tongwi mano Cherwi naidi.