Kamichang || Koklop || Andrew Debbarma

Achu achwini logi rwktharwi
Chini bario thaktwi khur laima
Muitu pokya kho ang,
Sarik wng kheno kheto awaro
Sak chalairok bai gulap thwng laio
Uansugwi khao khatang.

Maisingni molo hokang kuthumwi
Achwi bai maidul yapharjakmani
Chaui bwswk se thok,
Siyari lob-lob pamtwi kwlaiwi
Dangdalo toksa baiui pungmani
A jora bwswk tongthok.

Ama apha bai hugo thang laiwi
Gairing sakao nobar manjagwi
Khapang kha swrangmani,
Twisa twi sarwi ah rom laiwi
Swtwi bwlaio a ig chamani
Chauibo thok langmani.

Langa kupulung hukni mui kwthwng
Teibo thaichumu, mogwdam, banta
Amasong tubu laio,
Muya godonjak muiphle wasung
Motom huhu diborni jorani
Chaui totwra laio.

Chini nokni sachang babaio
Thaichuk-thaipungrok achsusong kaio
Bwthwirok thiting lo-loi,
Chini nok lama yaksi yagra
Khum buphang kaiwi naithokma bara
Lamabo kokoi-mokoi.

Apha kaimani jami solongno
Moso swnamwi mwkhwi chalaiwi
Khuktwi kwkwrwk yoro.
Achwi achu tei ama apha bai
Kurum kuthumwi tongwi phaimani
A jorano khatang phiro.