SABO SA?

12/07/2025

Sabo sa?
Huk hukumu komorwi thangbaikha hinwi
Komoryakhu bwle maichwlwi khuchwlwi
Hokang uarjak muimungni bwchwlwi khumchwlwi.

Tabukbo khapang kha swrang mwkhang khorang
Hatal kiyokjak sakduk sahayo– khapang rotomo
Khapang kiyokjak jaduni sahayo–mamla motomo
Kha morok morok keboni khao
Saproui kholu huchung amichang
Khaichor khapangni kotono
Mamla bumuk peru deng deng.

Tabukbo khuk swrang khapangni garing
Sachlang boyarni khaja chuksisi khaju choksisi
Chango kasleng khorogo langa kha dangsi dangsi
Kokbiti koktun hunuhanai gati lamjaro
Huchung lam kumun nugul kotono yak bulok-horu
Kwnwi chekelek khajama ninangu mamla haduk
Nokhao pinjakgu pilala pohor sikla sakduk.

Sabo sa?
Khamchuru sahayo kwlwkjak sal tal?
Hatal ha motom amani sahai khaja kusubma
Sirini kothoma sago gwdaljak chini laibuma
Tongkhu bwle risa phanchwlaio mwnwywi
Motom jib jib tipra nok burum motomwi.

Iko nahardi jaduni khapang
Dangki buhorjak huk alem naro
Khwnahordi khunju kaichomwi khorang
Angle kubuino khapang rwktharo.

O jadu—bwtanoba
Watwi ha kwlai hatal sukwlai
Takwlai takarde thangno
Changole chempai khorog pagori
Khapang sabono suri
Hatal ha luthur soro kwlainw
Tolna nangkhwlai phainw.

0 jadu katornai katortiba
Huchung amichang kholnani swkang
Huchung lam hogwi rinw
Saichung swrangya sak seler phainw
Logisong sakar rinw
Thangnai aichugo imang nukmani
Thongar thu joro ani
Khachuk buchukbai horsa kebengkha
Kokbiti lonmade nuk-kha.

0 jadu kha gwnang bwtanoba
Amichang kholnani saichung swrangya
Kok sachong logi ridi
Watwi ha kwlai dida kha kwlai
Langa daichuru phaidi
Garingni satang noktwng khajakya
Naichomwi yapiri kholdi
Engsaini bwtwng muphunjaksukya
Naikolwi achuk phaidi .

Sabo sa?
Baindurujak baikhurupjak tipra kungthai
Chwngkhuruojak ri-kari bwthai
Hayung kotogo mwnwijak risa
Sabo hin butuwasa?