HAMKWRAI || Kothomayung || Kashmir Debbarma

Bwkhak– 1

            Hachwk kwkhwrang nokha phulalang twirara khumulwng harung hakwchang toksa tokwalani khorang kami kha swrang— hachwk beserni twibuk khorogo kami khungsa. Kamini bumung Twisa Rangini. Hachwk hapung huk hatal haping gairing twisa holong lamtang tiyari twikhereng bolong toksa toktwi mwswi mosok buphang uaphang  bai mwchangjak ih kami.Twisa rangini kamio tabukbo hukno langma. Huk habani jorao samung tangnairokni hugomang pailaiya holaiya salburum burum. Tabukbo hukni hukumu mukumu bai motomlaiwi tongkhu. Kok wngkha huk bai thwi gwdaljak. Haping hachwgo jaduni khorang rwchapmung tabukbo khwnahoro. Hatal khamchuruni bahai motomwi khapangno swlakhoro. Sirisitini hukumu sakhai motomsawi tongkhu. Gairing nugulni eba lapdangni kothoma khwnathogwi tongkhu. Sirisitini simi dangaima dangaiphani khukni kokthai kerang kothoma sajagwi tongkhu. Haping hachwgo toksa toktwirok jaduno lopsawi rwchaplaikhu. Jadu kolijani kokthai kokrwbam huk habani eba hachwk beser kamini lukurokni khao nok nukhungo panda bwtang kailaibari, kwthwi komogo rwchapjagwi tongkhu. Hatalo gunthu, khunjupwra, hapingo sotorobongo, khumchak, khumwakthwi mwchangwi hukumu mukumuni bubar wngwi barwi naithogwi tongkhu. Gairingni nugulo maichu mai motom, tilok twi kwchang mwchangkhu. Langa, dingwra, chempai, kasleng-rok huk haba bai mare kiching khalaikhu.Wasung gudokni bahai hachwk kobolwi tongkhu. Sikla siklini khano swlagwi chaswlaini halok kwthar hachwgo gwdalwi tongkhu.Agini tongmung, chamung, tangmung, swimung, kanmung, tammung, kok samung mwtai atai philjakyakhu.Hachwk kamini eba twisa rangini kamini lukurok huk hapingni muikhwtwng thaikwtwng Mai, khul, siping, khakulu, chakumura, thaichumu, dorompai, moso, jinga, phantok akorok phalwi rang ajio tai khatio. Nukhungni bagwi berma, som akorok simi paina nango. Aboni bagwi langa kupulung hukni muikhwtwng phalna bagwi Borchuk hatio phailaio. Phalma rang bai berma, som akorok paina bagwi hatini salmario hachwkni simi hachal lama himwi Eba malkhung khungsaswk lama kwcharo malaikhe kasawi hatio phailaio.

            Kamini lam twisa lama holong mwnago himnani nango.Twisa twi kwchang Aina-ni mwkhang nugwi khapang kha kwchang, khapang kha swrang, oh twisani twio Suchi kwlaibo khochawi mano. Kamini lukurok oh twisa lamatwino him-phaio khwlaio.Twisani twi richi richi. Twisani khorang keleng keleng.  Twisa rukung rukungo holong kotor chikon siring siringkhe sirisitini lai kabujak dangaima dangaiphani kothoma salainani logisong naisingwi kha khamjak haikhe chochok chalak achuklai tonglaio. Borokni sakatwi khorok mihima haikhe hachwkni twirok kochogwi malwi thango khama bwkhago. Twisani rukungo balangchi, yaksi yagwra bata bwlwng. Twisani hajakhoro muikhunchok, thorai akorok. Ahaile tabukbo hachwkni tiyari mairang hachwkni mwkhangno naithokriui tonikhu. Holong sakao jadusong himlangmani yapaini mari hujagwi, komorwi thangyakhu. Haiphano ih twisao athuk, khangrai, ah rang, ah bar, chapwrang akorok kwrwibaiwi twrwk twrwk mokolo nukjakthakiya.

     Kami aswk tobo torya toryaibo tongya tomoro moro, khapang kha swrangthothok. Kamise aswk tomoro moro hinphano hopung sapung Ho-hom Do-dom tongthok chathok kha baksa kok baksa lam twngsani eba thansani kami. Kamini lukurok jotono samung khwlai chanaimang, bigra bai langma khajak. Kebo gwnang hinwi khoroksabo kwrwi ih kamio. Sana thangkhai jotono huk haping bai langma manjujak. Hukno borokni langma. Atwise hinphano hor-sal Ho-hom Do-dom luku bosongni mamita, hojagiri, lebang bumani, mosok surmani panda thakya, sajwra jora twilwlwk jora dangdu, chongpereng, sairanda, wakhong, wakhorop, tintereng, tintorong, sumuini khorang khapangno swrangrio. Oh kamio hamung siniya toksa toktwirok rwchaplaio. Tokthu, tokbuku, tokroi, torkang, tokbuwa, monai, nuwai, atka, tokching, tophereng, topepe, boga, pharuk, bengraj, tokula, tomsa, kungkila, toskuma akorok jorano lopsawi pungo. Kami rekewi buphang bai buphang bwlai kwkhwrang bwthai kumun koromo kwchak thaichuk, thaipung, thaicherem, thaipolok, thaitop, kog akorok. Oh kamio tabukbo mwswi hongo, toching chirigo, twibuk khorogo huloksa pungo. Dalbidalni khumrok barwi naithogo. Kamini gati lamao khumpuilang barwi naithogo. Teibo tongo kherengbar, gulachi, sampari, khumtoya, khumtoktwi akorok.

           Haiphano tabuk tai nukliya hachwgo— gorjon, borep, silai, salong gamai, khwrwi, gwra gwra kwbagwi mahansukha kotorma kotorma buphangrok komorwi thangbaikha. Aswk kotor kotor buphangrok tongbaimani hachwk bai mwchangmani. Agio sampari buphang tongmarok tabuk nukliya. Agi hugo thangnairok dibor jorao lengmani pokna bagwi ah sampari buphango lenglana phaio. Baksa baksa aro sumuirok tamwi dibor khekma siya wnglaio. Ah jorao habani borokrok sumuini khorang khwnai buphuru jani samung tangwi bwkha kobor chawi thang bwkha sirwkya. Teibo komorwi thangbaikha nukliya— thaibai, khumuk, thaichuwal, lengphol, bwrwiphang akorok. Tabukhai buphang ranai baniyarok tanwi malkhung bai rwkawi twlangbaikha. Bolong kuthukrokbo nukliya. Agio bolong thukmani wathwi, wa-mwlang, wamilik, wachur, wandal, kalangsi bosong kwbangma walwng bai walwng bungmani phungni sal chugwi dibor wngwibo pamtwi-rok kwlai tongo.  Wa Tanna thangkhe keboni khorang khwnaya kirisoro sorose wngo. Agi bolong thukmani mwsa mayungbo aswkno akaro. Mwkhwra-rok teibo akaro. Hukni mai munma jora maitang chajakna kirijagwi sapung sapung mwrwgwi rwkna nango. Sana thangkhai tabukni jorao huk haba bai chalte chalte Kwtal jorani lamtango himte himte amohai bolong halong rok nukliya. Twrwk twrwk bolong halong-rok sengwi phairwrwkha. Tophano ih kamio tabukbo bolong halong kwmayakhu. Huk hukumu bai chalyakhum. Sirisitini hukumu mukumu bai gwdalwi tongkhu. Kwchamni logi Kwtal-ni goron gwdalwi naithogwi tongkhu. Bwrwirokni bwchango, khajao rigwnai risa mwchangkhu. Phiya chokhao khul lubwi khwtwng kariwi ri-kothego bwthai saiwi takna rwngliya. Hatini khwtwng paywi takna simi rwngkha. Tabukni jorani cherairok hinkhe chokha Eba chokher-ni mwkhang-se siniliyagwja.

           Bisi kwbangma romwi  hachwk kamini lukurok wa-wasung bai mai-mui songo, twibo wasung baino khogo tai nwngo. Wa bai tharuk swnamwi mui songphuru mui hulo, godogo tai mosdeng dengo. Kathibo wa baino swnamo. Kathi baibo mai tei muino kolwi mano. Thapao mai-mui songna bagwi hor mwchwngphuru samungo phwnango phununga, abono bukhuk bai subwi hor mwchwngo. Thapani hokino khepna bagwi yakhep swnamwi khebo. Hachwk kamini lukurok mai-mui songna bagwi thaptai tagwi, thapa chogo tai thapa swnamo. Thapani muknwi muktham kuchuk khwlawi baka swnamo. Aro maitwk muitwk chuwaktwk tonio. Bakani thongo khajak wasungo kathi, tharuk, phununga akorok. Abono karwi wani dula, tukri akorok swnamo. Swkango ha bai takjak twk phaiya swkang wasung bai mui pengwi chao.Hachwk kamini lukurok muiborok chao. Thok riui chamani kisa. Kwbangma muiborokni bumungrok wngkha– godok, chakhwi, awanduru, berema bwtwi, muituru, yokmung, pengmung, murmung, ikmung, hangwi chamung akorok. Borok hani takjak sorogo mosdeng dengwi chao. Hani twk bai mai-mui songwi chalaima ulo bisi 1990/1980 swkang dek , sorni karai, mairang, bati abono karwi pitolni manwirokbo phaikha. Swkango lukurok hao achugwi mai chao, ulo yamphwra, ulo khampwlaio tabuk hinkhai cheyar, tebilo achugwi mai chalaio. Bisi 1960/1970 oh abohai raidarok swlaibaikha. Uasung bai mai-mui songwi chamani nukjakliya. Phiya tabukbo ih Twisa Rangchak Kamini lukurok wasung bai mui pengwi chalaikhu. Tabukbo swlaisugwi thangyakhu. Swkango khithai nok tangwi khilaiya. Phiya tabuk khitai nok tangwi khilaikha, swtwithai nok tangwi swtwilaikha. Twisa Rangchak Kamini lukurok riborok eba sak baithangni takjak tak borok kano. Puilao yasuku sokdorop, ulo yasuku laidorop, tabukhai yakorai salwi rigwnai kanlaikha. Ritukuno bangbaikha. Khajao risa kholopkha. Swkango hachwkni hugo manma khulno chokhao lubwi khwtwng khariwi ri-kothego bwthai tisawi ri taklaio. Phiya tabukni siklirok khul lupna rwngbailiya. Chokhani mwkhangbo nukbailiya. Phiya tabuk Modern form-twi kanlaio. Khunju bubakni tolao uakhum kano, khunjuni saka bubago toya tai jumka kano, bukungo koili, kotogo rangtang, anchwlwi, ganthi, yakungo kharuk, yaktwgo mathiya kano. Yasio churi tei yasitam kano. Phiya tabuk aborok kanlailiya– Yasitam, churi, mathiya, koili, uakhum aborok simi swlaijakyakhu, kanjagwi tongkhu. Swkango yakwlap( juta) kaya tabuk kalaikha.

                 Twisa rangini kamio tabukbo rwngmari-ni chati chwngyakhu. Kami amchaini hamari pohor sokphaiyakhu.Kamio pherang chatini dwkhwi swngjakyakhu, lama tai twi kaham-ni sep sap kwrwikhu. Kamini lukurok watwini jorao lamarok rimi wngwi Salsa salnwi hati machaya, samung ma tangya, yagul ma khilya birman nangjakbaio. Kami ganao rwngnok khungsa khungnwi tangjak tongwibo rwngnogo thangnai cherairok kwrwi. Biyal nukhungni bwsarok sal phaikhe huk habao buma buphani utung utung ma wngo. Akon hukse borokni langma hinkheba hugo Salsa thangyakhe thapa hor-se chwngya. Phung aikhese tangnani chanani. Sal sapung huk habao lengma kwrwi samung tangwi sarik sanja jorao kiphilwi Mai kolsa kolnwi haiyakheba salsa sulsu ok bukchano sariphangni simi muktwrwi laio. Aichuk bachai huk habani maichu muichu khatiwi tei waisa huk habani lam ma rio. Tei buphuru bwsa bwtwirokni bagwi naikolmung, khoraimung tongsiba. Cherairok bo pora lekhao kha warjagwja. Rwngnogo thangbaiyagwja langma mwnak, imang kwrwi mukthang thujak. Rwngnokni phwrwngnairok bo swrwngnairok phaiya wngwi waisa wuisu selejagwi phaibaiya. Haikheno rwngnok doga sojagwi tongkha bisi kwbangma. Abono ih hachwk khurini songdukrokni langma.Bisire bisi teibo swkang salrokni simino kebengmungni khong yorjak. Kamio hamya chaya wngkhaibo kami bai hachal lama sakham nogo uaying bai balwi ma twlango. Swkango hamya chaya wngkhe swkal mwtai chonglawi ochai nailao, mwtai chaklaio. Hamyani bagwi twi pora, som pora, thok pora, ochaini swnamjak bithi bwrai chalaio. Toksa, toktwi,takhum akorok bai mwtai khwlailaio. Phiya tabuk aborok swlaijakha. Kwtal jorani lamtango himte himte kisa misale swlaijakha. Hamya chaya wngkhe Kamini doctor bai nairiwi bithi bwrai chario. Phiya hamsukya . Ahaikheno cherai okra bura sikla nangliya kotor chikon bemar manjagwi bisiburum burumno thwio. Doctor kaham bai nairina hinbo kwrwi bigrani nukhung wngma bai rang puisani biyal, kaham doctor bai nairiwi Manya. Sakhamnok( hospital) bo kami bai hachalo. Sak kupulungrok hinkhe lama majaro no sak kengwi rio. Aswk birmanni kokno kebo sihorya. Chini borok-rokni langma tabukbo kwthangwi kwthwi bai baksa. Lama bo chaya, sakham nok bo hachal. Tabukbo hachwk beserni lukurokni langma  Holong Kesebni Toktwi hai wngwi tongna nangkhu. Thangwi tongna-ba, langma tongma-ba birman-ni bisingtwiphano langmano kolomriui tonglaikhu eba choba khwlailai tonglaikhu. Abono hachwk beserni swraimungni lam twngsa. Aswk biyal birmanni kokno kebo sihorya, naikolya, cherya, chubanai, nasiknai kwrwi. Songduk bosong lukurokni bagwi haphang hindi, neta montiri hindi kebo uansuknai, chubanai kwrwi. Bolong kuphungjak hachwk beserni khurio langmano kwthangwi kwthwi bai baksa thangwi tonglaijao. Hayungni phataro tongwi tongma hai ma tongo. Phiya chwng joto Bharat hani khaklapni khachuksa bwsa. Tophano chwng rutukjakya, naikoljakya, sak nangya, borom rijakya, norjak khibjak, ukologo tonijak. Rwngya siya hinwi sak katijago, khuktwi musujago. Sandai ojama pohor rinai kwrwi, dophani hilikma pojano kebo rujunai kwrwi— oh kok saui kha yokjagwi uanama bai kha khamma bai hama kolok horo twisa rangchak kamini chokdiri Birendra Debbarma.

          Birendra wngkha twisa rangchak kamini chokdiri bura. Bupha thwima yagulni simi kamio chokdiri chongwi rijakmani.Bihikbo bisinwi swkang thwikha, bwsa bwtwi, hamjwk-chamiri kebo kwrwi bini. Kamini lukurokno bini bagwi bwsa bwtwi, takhuk bukhuk, hamjwk-sajwk chamiri. Chokdiri wngmatwi kamini joto samung hunung, kaham, hamya, kwrwi-gwnang, cherai okra bura siklarokno  jotono-no naikolwi twidumwi Kami kwchangdodo khwlai tonio. Kamio kwrwi nukhungni biyal birman manwi tongnai borokrokno chubao. Rang riui chubai Manya phano kok bai saui bwkhao phan tai uansukmungni lam phugwi rio. Kamini joto lukurokno Birendra-no chajakbaio tai hamjakbaio. Birendra-bo kamini khwlaijaknai samungrok kha kha riui no khwlaio. Kami kernani, nukhungni mwtai rinani, wathop rinani, Abul sunani, nok Kwtal basinani, bisi kwtalni Mai Kwtal chalainani akorok khwlaina thangkhe bono sayawi chukya. Chokdiri Biren bisiba wngkha rwngnokni phwrwngnai yakarwi nogo achukmani. Bupha Direndra pora lekha rwngya hinphano agini jorani mung gwnang, alem gwnang, luku ojama hinwi kamini lukurok sinibaio. Thwiya swkang samung tanglangmarokno tabukbo mukumu wngwi lukurokni khao muitu khujagwi tongkhu. Cherai sikla jorao Balosikha porijak hinwi mung borom manjak Diren tini mang kwmajak, kamini luku bai chaljak. Kha kaham, kok kwchang, lam kwchang, khuk kwchang kami hamkwrai nainai rwngni pohor tubunani chaitoknai tongmani. Bini chaitokmung baino kamio rwngnok khungsa haphangni thani sanwi tubui achukrijamani. Phiya rwngnogo phwrwngnai biyalni bagwi jora rwgwi rwngnok khulokjakliya. Ah bisingo kwrwi biyal bigra nukhungni bwsarokbo kha uarya, rwngnogo thangya hinkheba haino oh rwngnok doga sojagwi tongjakha ta. Diren- ni chaitokmungno tabukse kamini lukurok sibaio. Tabukbo bo tongkhe kisale kami hamkwrai rwngni pohor kamio sokphaikhanh- oh kok uansugwi muitu wngjakbaio tai kha khmajakbaio kamini lukurok. Kwthang tonglangphuru kami hamkwrai nainai, rwngni pohorno rutuknai Bupha-se ayang masingo thangphano tabuk bwswla Birendra chokdiri kwthangno tongkhu. Buphani tangbaisukya samungno barja nawi tini Birendra kamini chokdiri chongwi rijagma bai kha kha riui samung tango. Kami hamkwrai, rwngni pohorno rinani chaitoknai chokdiri Biren kamini poriui manya lekha rwngya siyarokno salburum burumno sanja kwlaikhe kisa misa   ক, খ, ABCD, 1, 2, ১, ২  akorok phwrwngo tai simani kokthairok sawi khwnario. Hayungni mung gwnang, alem gwnang, luku ojama, neta, montri akorokni kok khwnario. Hayungni koklop kwrwng Rabindra nath Tagore, Netaji Subhash Chandra Bose, Mahatma Gandhi, Mather Teresa, akorokni samung kaham tanglangma, kok kaham salangma, haktorni bagwi samung bwtang tanglangma kokrok saui khwnanrio. Abono karwi tipra hasteni rwng kwrwng athukirirokni kok Dasharath Debbarma, Sudhanya Debbarma, Hemonta Debbarma, tipra hasteni bugrarokni kwcham laibuma kokrok saui khwnanrio. Tini sariphangni simi kamini sikla sikli cherai khonai lekha rwngya bura buriok bini nokhwlao bini kokno no khwnalai tonglaio.Ah bodolo Sachwlang mungwi sikla khoroksa tongo, logio bini logisong warak, robirwng, athukiri, dingchang, kuphuti-song tai kamini cherairok bodol dolsa tei babaisa phaising lekha rwngya siya mokol nukya hayung siniya bura burirokni bodol dolsa.

            Sachwlang Wngkha Twisa rangini kamini cherai kaham khoroksa. Buma sukuti bai bupha sukurai kwrwija nukhungni biyal birmano nukhung khungsa tonglaijao. Sachwlang takwlaino  12th finalni amjokmungo jotoni swlai kwbang number manwi pass khwlaio. Tabukni simikhai Agulio tongwi college porina nangwi tongkha. Phiya buma bupha-ni yak chukjaya.Cherai  Kaham hinwi siui tongwibo rang puisani biyal bai Agulio pori rinani Phan chukya bai siring siring tongjao. Bwkha tongbo Phan chukya.

      Biren bo kamini chokdiri wngwi barja tongo. Kamini cherai kahamrokno kuchugo dumsaui rohornani. Bobo aswkle Phan kwrwi, kisa misa tongmani no chunajao. Tinino Yong Koto bai paithak malaiwi kaham hamya salaina hinwi sachwlang uansugwi phaio. Sariphangni simi chokdiri biren ni nokhwlao kuthumlaimani. Twrwk twrwk kuruklaikha. Sachwlang bai bini Kichingsong chokdiri Yong Koto bai koklam salaina hinwi tongrwkha. Chokdiri Yong Koto twrwk twrwk bwchkaha. “Yong bwsa phaidi habphaidi nosingo”- hinwi ringwi twlangkha. Thukumao chati sogwi nukporom koporom khai achuklaikha. “Yong Koto tinino nwng bai paithak koklam salaiwi khwnano aguli thangna hinwi chokha”- sachwlang twrwk twrwk achugwi chokdiri biren no sao.

— “aboba kaham kokse, thangya khai bahaisa? Kamio tongwi lokai lokai chaui tongmabo chukya niyade. Tabukni jorao pora lekha kwrwi hinkhai khora kompa bai baksa si sikhade Yong!! ” Biren sachwlangsongno sao.

— “ Yong Koto haini bagwino yokya kukya bai thangna nangsinai ta, tei tamle khwlaisinai, kwrwi chukjaya ni nukhungba thangphuru to thanganw abose paiwi da kiphilwi mano uanao”– sachwlang koinene khe sao.

— “Ayung aboni bagwida nwng uanajak tong! Chwngba kwrwida nini ukologo. Nwng chini kami amchaini cherai kaham khoroksa, nonose chwng kha logwi naisingwi tongo. Nono kuchuk kolok Kotor khwlainai abo chinibo barja tongo. Norok hai cherairok thinango chini kami amchaini Mwnago chati mwswnai, Kami hamkwrai Dopha hamkwrai nainai, norokse chini  Bekereng.

— “Rang puisa hinba ma-pha song talburum burum rohoide mano, nogo chana nwngna bagwise belai chukjaya aboni berese ano yak bara rohornani. yangbole salsa yagul khilyakhe thapa horse chwngya”

— “ Aboni bagwino norok bwsa hinjaknairok uansukthai tongo. Ma-phani dukhuno bujiui kahamkhe yapiri sethai kwlaio. Ma-ph song bwsa bwtwirokni bagwi bwswk choba khwlai tong, abo bwsa hinjaknairok bo mokol kaichomthai, kha sithai kwlaio”

—“ Aow yong koto chwngbo chini joratwi ma-pha no chubanale muchungo”

— “ Norok ulo kuchuk kolok Kotor wngkhaise ma-pha no chubai mannai, aboni bagwi tabuk kha uarwi poridi, Rang puisa ni bagwi ta uanadi, chukya jorao chwngbo chubanai”

—“ Yong Koto nini Thani ani swmai kaisa, ang oh kamini khoroksa borok. Ang agulini kiphilwi phaiwi kami amchaini bagwi samung kaham tang phainai, hamkwrai khwlainai”

— “ aow aboda kok swla, norokno ta tabuk kami amchaini bagwi uansukthai samung kaham tangthai, lekha pora poriui siuibo nogo pok pok achuk ta tongdi buinose siridi, kamio siya rwngyarokno naikolwi tuidulwi phwrwngdi”

—“ aow yong koto nini kokno chwng kh bai yachago”

—“ muitu narwkdi Agulio porio hachwk kamino pogwi ta swlaijakdi”

—“ Yong Koto ani kamini nobar twibar toksa toktwi hachwk Hapung Twisa twikheteng ani kiching. Ang arose logo Toro bahai aguli tongwiba pogwi mannai. Hainose kami yakarwi thangsinai hinwi kha hamya wng tongo”.

—“  Aguli dolioh tabuk hamya sitra kolobwi tongo hinwi khunjuo khwnahoro, Ayungsa hamya bai chalwi tongdikhu, porina thangma poriuino phaidi, hamya koktwma jetwibo khwnayatwi”

—“ Yong Koto hairokle wngnani uaksukhakya. Porina thangma porino phainai”

—“ Kok thaisa muitu tonidi, Hamya Bai tongkhai hamyano wngo sikokni logo tongkhai sikok wngo”

—“ Aow yong koto nini phwrwngma nini kok samano khao chobwino yapri senai….

Horbo wngkhaba thanglaisiwanw chwngbo, ayang ma-pha song lerjak tongkhwna”

— “ Aow dokhe jotono no hor kaham”

— Hor kaham Yong Koto!! Hinwi sachwlang tai bini logisong bo kiphilbaikha.

       Sukuti bai sukurai bo sini simi naisinglaimang hor thukjaksukha. Horni Mai khopsa chalaina bagwi bwswla sachwlangno naira naira wnglaijao. Chatibo thwimere mere siring sorop. Sukurai kisa muktwrwi phaijago. Sal sapung hachwkni ua, bol, son akorok tanwi balmani bangwrabo kisa sini sinikhe yokjago. Sukuti hugo samungomang lenglana jora kwrwi. Nogo kiphilbo bwsai bwsani tai baithangni bohokni bagwi chana nangma bai Mai mui songna nango. Swrangpa bo yak thagwi tongwi Manya. Sachwlang twrwk twrwk nokni daikungo sokphaio. Sachwlangno nugwi swibo bok bok khwlai swngmasing swngo. Borok siniya kamio habpahiwi swngma hai khwlai. Buma sukuti khatwtwng wngjago. Bwswlani yapiri khorang siniwi manwi chati yago naui dogwlam phiyok sok tongo.“ Tamswk lerkha sa batung” hinwi swngsogo

— “ Yong Koto bai koklam salai tongkhaiba kisa lerwi thangkha ta, tamo Mai mui chalaikhuda ama ”.

—“ Nonose naising tonglaio chwngba, Buphuru phaino hinwi ”

—“ Tamo ang kwrwikhaiba chalaisok manyade Ama, dho akon khursidi ang yakung yak sukhwlai nagwra na”

— “ aow batung yakung yakrok sukhwlai nagradi, ang mai mui khursok tonganw”

Sukuti kok saui ganti nogo habo. Sachwlang nok daikungo yak yak sukhwlai bini tongmani nogo habwi yakung yak huwi ganti nogo habo. Sukutibo Mai mui khurbaikha. “Aphale chakhade ama” bumano swngo.

—“ nwphabo chayakhu nono naisingmang naisingmang muktwrwi phaijagwi thuna muchung tongkha ringdi ba”

—“ Apha oh apha Mai chana phaidiba” sachwlang bumano ringhoro. Nok Kotoro tongtwtwi yachago sukurai, “ phaio phaio!”

 Mai chana achuklaikha. Mai khopsa khochatwtwi, “ nini yong koto bai kokda salaibukha batung”  hinwi sukurai bwswlano swngo.

—“ Ih apha, salaibukha”

—“ Rang puisa ni kokrokle bahai hin sa? – sukuti mui boktwtwi sachwlangni mwkhang naisikyaino  swngo.

—“ aboni bagwi ta uanadi hinwi Sai horo, chukya jorao chubnai hinwi”

—“ aow angle oh khalisa nangnai khakwlabo bokjaknai rangni bagwino uanao” hinwi sukuti uanama khorang haikhe yachagwi hino.

—“ aswk ta uanadi ama rang puisani bagwi”

—“ Rangni bagwino uanama kwlaio batung”

—“ nangmani bara aswk nangya ama”

—“ kwrwi jorao sabose chubakha, chwng tangwi chanai bigra khangra, chmani barase nono rohornani”

—“ Yong Koto bai salaikha, chuksukliya jorao chubanai hinwi sao, aswk ta uanadi borokno puitu khwlaidi, angbo puitu khwlaiwino thangna hino”

—“ aow chubakhaito kaham kokno ” hinwi sukurai bwchawi yak sukha.

             Tinino paithak malaima, nok kaisa achuklai paithak Mai khopsa chalaima. Kha bising bising sukuti sajwlani mwkhang naisigwi kha khamjago. Tei malaina kwrwikha. Khwnano nok huk ma pha yakarwi aguli thangsinai hinwi bwsai sukuraibo sajwlano khatangsuknai hinwi bwkha phatina naijago. Thuyamo rokowi sachwlang bo muktwi yorwi kobong simani siliya. Khorophang sakao chatibo dik dik. Kha khamsere sere ni hor kuthuk jorani siring sorop nok kaisa kha khamlaimani halok kusungsaa.

Swinai: Kashmir Debbarma