HAMKWRAI || Kothomayung || Kashmir Debbarma

Bwkhak— 2

Aichuk kwrani tokla khuktham pungkheno horni mwnak bini mangno twlangwi kwtal sal pohorni mangno lamjaksogw. Salkabai phaising chaksuru suru naithok bedul gwnang khwlai salni mwkhang mwnwisaui hayungno naikolna phaikha. Kami gana ginini arini buphang waphango toksa toktwirok phung kwlwini boyar kwchangno chawi khwnathothok twilwlwk khorang bai lopsawi pungbaitikha. Hengra bubarbo phuduphu khwlai barwi tongkha. Gati lamao khumpui naithothok barwi kamini sikli tai bwsa maknwi makthamni buma hinjaknai twi khokna phainairokno bini naithok goron phunugwi khapangno swrangrio. Sachwlanngni buma Sukuti phung aidorop bachawi mwkhang khorang suwi nok nukhungni samung paibaiwi twi khokna bagwi gati phaising gola kaisa khebwi thangkha. Twi khokbawi ganti nogni twi gola tonima thaio lengma lengsa phawi golano twrwksakhe beraui mai-mui songna nai tongo. Sachwlang ri-chum tai nangmani manwi khwnwi tiyar khwlai kaisa solao dawi tongo. Pailaiya horlaiya. Phung aimani buma bupha bai kok salaimung kwrwikho. Dakti dakti samung paywi phung kwchangni mai khopsa chawi lam rinani bagwi sachwlang dojak. Bwkha bisingo ma-pha tai kamino yakarwi thangnani khagwra gwra ma tongjago. Aswk salni ulo siniya nukya thaio thangwi bui bai tongwinani, koklam salawi kha manlainani kisale jora nangnai. Kamio tongwi kha manmaniswk aguli thangwi aswk bwkha mangwlak. Aguli thangkhai tei boro buma bupha takhuk bukhuk sak chalai tongbaisinani, jotono wanjwini mwkhang mang sal phaikhe naiwi tongsinani, kokbo wanjwi kokmang sawi ma tonganw. Sachwlang nok nukhung takhuk bukhuk ma-pha kamino yakarwi kwlangmani muchungjakya. Aow sabole yakarnani muchungnaiba. Arose omthai thwi kwlaiwi aroni maino chawi aroni twino nwngwi aroni nokbar twibar hadwlwi bai thwnglawi torwi logwi sikla sokmani. Bahaikhe pogwi mannaiba. Sachwlang kha khamjago. Pailaiya horlaiyani bisingo nok nukhung ma-pha takhuk bukhuk kamini kok wansugwi kha khamjago.
Sachwlangni buma sukutibo ganti nogo mai-mui songtwtwi bwswlani kok wansugwi kha khamjak, kha dujak. Swkangni horobo sukuti muktwrwi thangliya oh kok uansugwi tongmang tongmang ulokhe kabwise tongsio, bwsai bai methebjagwise kapma thaksio niyade. Sukutini maya tangwile nangya tongnaiba– cheraini simi khaja lamsini khajano phugwi chariwi sakni thwino bwsano bagwi chaya ok bukcha bwsano chariwi kisio thuwi kwrano muthuwi pusiui sikla sokrimani, khurio toktwi korotwi korowi kwlwino mungsade wngno uanamung chuwi bwsani mwkhangno ainatwi naiwi, khichumu kakya sal-hor lairwi pusi tubumani. Oh kok uansugwi mokoltwi chikon tungluksa muktwi kwlaijago.Tabuk sak bai chalwi thangnani wngkhaba kha khamnaino bele. Sukuti kha khamjagwi bwkhano bujogwi manliya. Mokolni muktwi twiruru khwlai begwlai phaikha. Khorang kosorjak ganti nogo su su kapmani khorang pasao. Bwkhani muktwi ranliya.
Kha khamjak, hijokjak phanole thangnanise nangwi tongkhaba tei tamole khwlaisinai– thangnase nango hinkhe? Abaino bwsai sukuraibo kha khamjak wngwibo khani mayano tansui bwkhani dukhuno bihikno phunukyawi ganti nokni thongo mogwi swndarwi tongo. Bwsaise bwkha khamjak, kabwi tongkhe bihik teibo kha khamjaknai hinwi sukurai kha khamphano phunukna nailiya. Phiya bo bo kha khamwi thapwla chajakno. Chwla borokba kha khammano hwlwgwi methebwi manphano bwrwini bwkha aswk kwrakya nide! Sukuraini mokolni muktwi yorliya.
Sachwlang bini nangmani manwi khwnwi ri-chum akorok thitikhe dawi samung paywi gatio tukui musui nogo phaywi tiyar khwlai paikha. Sukutibo kha khamjakwtwino phungni mai-mui songbaikha. Gudok mui mungsa, tok bahan pengjak tei pantok serjak mungsa. Sachwlang mai chanani bagwi ganti nogo habo.
—“Ama mai khursidi. Aphale biyang thangkha. Ringdiba”. Sachwlang bumano sao.
—“Ih tabukno khurnai batung. Nini babu tabukbo sokphaiwanw”. Sukuti bwswlano naisikyai mai mui khurnani naitwtwi kiphilmung rio.
— “Biko nini mai khurdiba. Ang phaikha”. Sukurai ganti nogo habwi bihikno sao.
Buma Bupha bwswla jotono mai chana achuklaikha. Sukurai Mai khopsa khochawi sachwlangno swngo– “Batung nini manwi khwnwirok thitide khwlaibaikha? Yangbole sal chugwi tongkha. Joboi lama hachal. Twisa lamtang himwi haduk kolok himwise borchuk hatio sogwina nanganw. Aroni simi tempu romwi khowaio sogwikhese agulini bus romna nanganw”.
— “Aow Babu ani nangmani manwi khwnwi ri-chum akorok miya sarigono thiti khwlaikha, tini phungo jaikhe thiti khwlaiwi kaisa solao dabaikha. Salle chugwino tongkhaba dakti thangwi sogwina nanganw Babu. Nini baljaknai warokle thitide wngbaikha Babu”. Sachwlang buphani kok philo tai swngo.
— “Ih, balnani bagwi Wale tiyarno batung”. Bupha kok philwi sao.
— “Amabo haduk lama jora himdi ta”. Sachwlang bumano bo haduk lama jora nairwk hornani bagwi sao.
—“Aow batung thanganw”. Sukuti mui boktwtwi khuk hilikhai oh kok sao. Bwkha khamjakni bagwi kok samani hilik. Phiya sachwlang Sai manya wngya bumani kha khammani kokno.
—“ Ama ang daktino phainai. Ta uanadi. Angba aro thangkhai tei phaigwlakda. Phainai ta uanadi. Angbo thangna nangwise thango. Angbo norok bai kagwi thangna muchungya. Ani college paikhaino norok baino thwiyasak tongnai ta”. Sachwlang bumano methepna naio tai methebwi oh kok sao. Buma tongwi manjakya kha khamjago. Muktwi kungtwi bai bwswlani phaising lok lok nasigwi tongo.
—“Aro thangwibo bui bai kwthaui tongdi batung. Bui bai kha phurjakna twikhe tongdi. Yangbole buini desho rajho, nukya jagarogo. Batung kisa mui Nadi”. Sachwlang “naangliya ama nangliya, babuno se ridi” hinwi bumano mana khawi sao.
— “Angbo nangliya, batungni buma nwngse Nadi, aswk ta uanadi batung daktino phainai niyade”. Sukurai bihikno methebwi sao.
Phungni mai chabaikha. Sachwlangni ri-chum tai nangmani manwi khwnwi dajak sola thainwi nokni nukao berajak. Tini sangrong sal, Borchuk hatini sal. Bupha sukuraibo hatio muikhwtwng thaikwtwng phalnani bagwi tiyar khwlaijak. Miya sukuti hachwkni muikhwtwng kholma lairu dolsa, muiya chopsa, tha bolong mothanwi, muikhunchok mothanwirokno kaisa sola kotormao dajak. Lama belai hachal. Wa bai balwi twlangna nango. Sukuti nosingo khuturuk phiyogwi rang naharwi sachwlangno yapharwi hino– “Batung rangrok aswk kwbang kwbang ta swbaidi. Yangbole sal kolok din kolok tongwi chawi tongnani. Nangmani bara ta swbaidi”. Sachwlang bumani yakni rang yachagwi bumani mwkhang nasigwi hino–“ Ama ano aswk phwrwngna nangliya, angbo sijakno bahaikhe choliwi din sal lairiwi thangnani” . Sukuti bwswlano mokol mukchingnartwi naharwi mokolni muktwi tungluksa kwlaimani sachwlang nukrwiliya. Risa phanchwlwi bai dodoro huwi nakha. Bwkha khamjak khagwra gwra ma tongjago sukuti. Sachwlangbo kha khamjakno. Aswk sal kolok ma-pha bai tongwi chawi phaimani yakarwi thangnani wngkhaba bobo kisale kha yoknaino. Buma bai bwswlani kwnwini bwkha tini moklaijak. Kaklainani muchungya. Sukuraibo kha khamjakno, twmakhe chwla borokba bwkhano methebwi, muktwino narwgwi mano aswkse kok. Borokni maya, hamjakma, kha kwrwnglaimani thwi gwdaljak. Buma bupha bwsani bagwi ih hayung kwtharo kubui kwthar hamjakma, maya momtano mungsa bai surchana kwrwi.
— “Batung hinkhai ongkhorlaisiwanw chwng. Batungni buma himdi nwngbo haduk lama jora nairwk hordi chwngno”. Sukurai bwswlano tai bihikno sao.
Bwswlani sola thainwi tai hatini muikhwtwng phalnani bagwi muikhwtwngni sola kotorma kaisano wani ukolog bwskang khachiwi lam Rina chengjak. Sachwlang bumani yakung romwi khulumwi “ Ama ang thangsinai, ruwai rijadi” hinwi muktwi chakya khorang kosorjak khwlai kok sao. Sukuti bwswlano “hamdi batung” hinwi ruwai rio. Kha khamjak, kha dujak khorang kosorjak bai tei mungsa kok sawi manliya sukuti. Buma bwsa nokni dogwlam khulumo. Nokni doga sowi Sachwlang, sukurai, sukutisong nokni nongkhorlaikha. Sukutibo bwsai bwsano haduk lama jora nairwkna bagwi utung utung himo. Himtwtwi kha baijak sukuti. Siring siring kok saya lama naywi ukolog ukolog himo.
Sukurai swkang sola thainwi thaitham wa bai balwi himjak, boni ulo sachwlang, boni ulo sukuti. Kami yakarwi awar botok himlaikha. Sachwlang mokol mukchingnartwi kami nok huk phaising kha khamma haikhe naharbuo. Hacham kuchuk kawi haruwak tokhwlaima ulo twisa lamtang gana sokphaikha. Twisani lama aswk torthaya, twisani twi richi richi, yaksi yagwra balangchi, muikhunchok, noksi bubar, batalwng, rukung rukungo holong chikon kotor achukjak. Twisa lamtang himte himte haduk duk kolok himna nango. Hilik poja twijak sukurai lengjakma siliya. Kwrwngsa jagani sampari buphang saklomo bangwrao sola thaitham baljak wano beraui lenglao. Yaksi yagwra buphang bai buphang bolong lama. Logio sachwlang bai sukutibo lengjagwi achuklaikha. Sukurai lengjaktwtwi bihik sukutino sao, – “ Batungni buma, haduk lama jora sokphaikha. Tabukle nwng kiphilwi thangsidi. Nangliya. Chwng thanglaisiwanw”.
— “Aow ama” Sachwlang buphani kogo manjuwi bumano sao. Sukuti kok saya siring siring mogwi tongo. “Ama nogo bo samung tongna, apha daktino hatini nogo kiphildi” Buphano sao.
—“ Batung, nwngle thanganw agulio, chwngle tonganw nwpha bai kwnwi nogo. Khagwra gwra, nok huk twirara, nwng kwrwida nokba mwchangno, khaba swrangno”
Sukuti tongwi manjakya khukni kokthai henerjagwi thango. Kapmani khorang kosorwi phaio.
— “Ama ta kapdi, angba aro thangwi tei phaiya jatde thangba, ani college paikhaino angbo phainai bele kamio nogono, tamni aswk kap? Sachwlangbo bumani kapma nugwi kabo tai bumano kwbagwi sao .
—“ Tangwile kapya tongnaiba, sakni bwsano sabole sak bai kagwi tongna muchungba, oh khalisa bwkhao bwsani bagwi bumani maya bwswk tong abo kebo saui manya” su su kabo sukuti.
—“Wngkha ama ta kapsidii, jorale naisingwi tongya chwngno, jora bai baksa himnani nango. Sal chugwi tongkha himlaina nangsinai” sachwlang bumani mokolni muktwino huwi rio, tai kwpalo motom khopsa suwi bwchao. Yang sukurai mungsa kok pungya. Kha dujak, mokolni muktwi koktwi koktwi. “Tho himlaisiwanw babu” sachwlang Buphano sao.“ Thangkha ama chwng, nwngbo kiphilwi thangsidi nogo”
Bumano bandewi nairwkna nangliya hinwi kiphilwi thangna bagwi sao. Haiphano Sukutini bwkha bujiya kapmani thakna siliya. Swlwkjak khorang bai mungsa kok saui manliya. Kha khammani khapang kha phatina naijak. Achugwi lenglai tongmani bumano kwbagwi bwchao sachwlang. Binibo kapmani su su khorang pasao. Kwnwini muktwi gwdalwi hadukni lam bupwra saklom buphang tolao siring siring twirara bolong kha khamjak. Swrapsani kha khamlaimungni tuyungo rung choklai miling malang. Mokol koililing bai sukuti bwswlano naisigwi tongo.
Sachwlangsong himlaikha. Sukuraibo sola thainwi thaithamni wano balwi himkha. Sukuti sampari phang tola bwchajak. Sachwlang bumano gwdwna khegwi naharbuo tai bumabo mokolni muktwino risa phanchwlwi bai hutwtwi naharhoro. Haduk lam bupwra kokoio pherwi thangphurukhai sukutibo kiphilkha.
Lama himtwtwi khapang kha khamjak sukuti. Aswk sal kolok bisi kolok sak bai chalwi tongya tini bahaikhese tongsinani! Sukuti bwswlano rohorwi Rima ulo khaching khaching kha bukcha saichung songdari khagwra gwra ma tongjakha.
Tini sangrong sal, Borchuk hatini sal. Phung damchini simino hati achugo. Sachwlangni Buphabo arono muikhwtwng thaikwtwng phalphaio. Hatio wanjwirokbo tongo. Tiprasarokno kwbangkuk. Ho-hom Do-dom. Joto manwino manthogo. Wanjwirok ri-chu phalnok, yakwlap phalnok khulogo. Wahan, tohan, puhan, akwran, berma, moso, swtwi, piyash manthogo. Hachwk kamini lukurok hachwkni muikhwtwng thaikwtwng phalphaio. Romdi— muikhun, laiphang, muikhunchok, thorai, khamka, sikamuk, samsata, muiching, gangwla, muimasing, muiya, gandwrwi, muikhumu rotoi, sobai, lubiya, pachokwlwi akorok. Hachwkni— thaichumu, dorompai, siping akorokbo manthogo.
Sachwlangsong phung kwlwini pamtwino gwdalwi awar botok, hacham haruwak lama, twisa lamtang himwi haduk kolok laywi hachwk kaisa laywi lama kolok himlai phungni damchi jorao chok chok Borchuk hatio sokphaio. Sachwlangni bupha sukurai bangwrao baljak sola thainwi thaithamno hati kwcharo berao tai arono choksa achugo. Lengjakmani kolomtwi swra swra, sakni ri-chum kamchwlwi borok kolomtwibai chumbur, yakung beljakni tokha khajak, mwkhang khwichuchu chuchu, langma pho pho wngjak. Sachwlangbo lama kolok himwi phaimani yakung beljak ganani phalnogo twi thaisa paywi gwlwk gwlwk nwngo. Sukurainibo totwra ransajak.
Bwswlano twi nwngma nuhorjagwi, “ Anobo kisa khaniphaigwradi” hinwi khorang kotorokhe ringhorma bai hatini borokrok bini phaising mwkhang uphilwi naharlaio. Sachwlang kisa lachijakha. Buphani ganao phaywi twi bodolsa riphaio. Yago manma logi logio nokha naisai gwlwk gwlwk nwngmani Raisa pailangkha. “ Tabukse bwkha kwchangsio” hinwi solani muikhwtwng khulogwi naithokhe hati kwcharo meleo sukurai.
Phungni damchi soti nwichiba tamwi tongkha. Tempu romna nangnai. Damchisa oh khowaio agulini bus romna nangnai. Sachwlang bini sola thainwi khochawi bachao. Buphano thangsinai hinwi kok kwcharwi tempu tongma jagao phaio. Tempuo borok pungyakhu. Kisa nasingna nangnai. Sachwlang bini sola thainwino tempuni ukologo dakha. Swrapsa nasingma ulo borok pungkha. Swrapsani ulo khowai bwkhak lam rikha. Khowaini lama kahamni bagwi tempu korai khachiktwi bini phan sotonwi malkha. Khowai twimani twi Bangladesh bwkhak kochogwi tongo. Khowaiba wanjwirokni kami nok nuk hati wngbaikhaba. Tipwrasarok kami yakarwi porina phaikhe borokni arose nok choroi tongwi rang riui ma porio. Sachwlangbo tini porinani bagwino nok huk Kami ma-pha khibiwi aguli thangna phaio. Khowaini tempu twima laiywi bini station-o bwthakphaikha. Sachwlang tempu ukologni sola thainwi khochawi tempu chaloknaino rang riui bus kama phaising thangkha.
Khowai bus station. Sachwlang bus countero ticket tanwi seat number rutugwi manwi achukha. Sachwlang tailam bwkhak achugwikha. Borok pungyakhu. Bus bisingo tungphwlamani jotono kolomlaijak. Kolomtwi chop chop. Satung-bo tinile belai iksukha. Swrapsani ulo chosma kuphur thupjak buraroro sola khakwlaijakhe sachwlangni achukma tei kaisa achukthaio, “Mono wngkhwna ani seat” hinwi achukha. Siniya nukya hinwi sachwlang kok saliya. Ah buraroro-no naikhai borok kotor haino ma tongo. Kamchwlwi kuphur, sut kosom, yakwlap kosom, chosma kuphur thupjak, khwnai keseng twngsa tungsu kogjak, kuwai chamani buwa michiljak, yasio yasitam kongsa, sola kaisa khakwlaijak. Sachwlang kuchuk kolok kotor borok wnganw uansugwi kok saliya, siring siring khwlai bus thangnani lerjagwi tongkha. Swrapsani ulo bus- o borok pungbaikha. Bus chaloknai bus start khwlaikha. Conducter bus-o kaui ayang uyang nasigwi busni dogano phungnwi buwi, “চল” hinwi dagima ulono bus chaloknai lam rikha.
Bus cholikha aguli bwkhak, khowai yakarwi. Lamao borok mankhai bathagwi kariui twlango. Kanairokni khugo kok kwrwi, janija siring siring. Sachwlangni ganao achuknai buraroro muktwrwi phaijagwi khuwawak khwlai khuktwi chorowi thujak. Sachwlang siring siring tailam bwkhak naharwi nobar chaui tongo. Bwkha bini belai kuphungjak tini. Nok huk Kami, ma-pha takhuk bukhuk khibiwi aguli thang tongo. Kha khamjago sachwlang. Bus bini lama songwino malo. Jotono muktwi laijak. Sachwlang simi muktwrwi bai kara thwngjagwi mokjak. Bus jeswk lama yakarwi malo, aswkno bwkha khamjago sachwlang. Nok huk bai chalwi phaikha. Tabukle khatangma phaijagkha. Ma-phani mayano muitu manwi khatangna nangkha. Belai chalkha kami, nok huk bai halok. Teisa kiphilwide thangma chano hinmani bathakna soiya bus. Sachwlang kubuino tini ma-pha bai kagkaikha.
Bus teibo dowi chalokha. Padhabil, Baijal, sonkhola laywi subolsing hachwk lama sogwikha. Hachwk kanani bagwi bus bini sakni je tong kwrwi phan kariwi khorang gunjiriui kakha. Hachwkni lama koiri koitang, yakchi yagwra bolong. Nok huk kwrwi. Sachwlangni langma kuphungjago. Bwkha chaljago. Tabuk ma-pha bai malaina, khani kok salaina hinbo tei malaigwlakha. Saichung baswra songdari khapangni kha bukcha khagwra gwra wngjago. Hachwkni mwkhangno naywi muktwi kwlaijago. Sachwlangni langma hai ih hachwkrok bo haino moklaijak. Khugo kok kwrwi mwlang mwlang, hailang hailang.
Hachwk kanani bagwi busbo waisa sutupjago, waisa ninango, waisa khekna naio. Ganao achukjak buraroro hachwk tokhwlaiphuru break romwi hailwksa wngjagwi sutupjagwise athangbariya bwskangni buwa kongnwi loriui thangjakha. Mokolo muktwini lam sojagwi reke rekewi tongmase nuksio niyade. Muktwrwini sichaui mokol kwchak kwchak khwlai chaloknaino jolikagwi kutukha. Aro kanai bo simiya jotono kisa misa dukhu manjakbaikha. Sachwlang ah buraroro-no dukhu manma nugwi solani twi bodolsa kariwi, “ Iko yong, twise nwngwi paigwradi” hinwi yapharo. Ah bura sachwlangni yakni twi bodol yachagwi gwlwk gwlwk nwngo. Yapharwi “ Ayung nwngle dukhu manliya na” hinwi koinenekhe sao. “Ihi manliya yong, angle thujakya hinkhaiba katiwi mankha ta” sachwlang kok philwi sao.
—“ Bwskangni buwa kongnwi loriwi thangkha” kapsisi khwlai sao buraroro.
— “ Tobo kakliya baise hamkha yong” sachwlang mwnwina muchungphano mwnwiliya, mwkhang hwywi tongkha.
—