TOKSA NARUWAI || KOKLOP || MITHUN TRIPURA

Mwnai rangchak toksa naruwai,

Salsabole chini nogo naruwai.

Aswk tonglaima tonglai fayaswk,

Salsale nwngbai achai fayaswk .

Twisa twikhereng athuk khurlaio’

Ama babuno rutuk lengrio’

Bwthai kumunbai dhoo choklaikhe,

Mwktrwi thanglaya bwkhase khe khe,

Chuchule thujao’ jononi khe khe khe.

Kuchuk tokphringsa bhile bhile,

Twima ahbwlangsa tokle tokle

Loge chwchwini chwngbo kangle kangle.

Toksa rajasa rwchapbo ke ke

Himo mwswisa hukchung reke reke.

Chwngle himlayo mwnaibai dhungur reke reke.

Burshi kamani chikhingfhang dhusa ,

Muikhumu khorlaima cheka burungsa.

Kerong kok khwnao’ chwngle thunani swkang kisa.

Sanja jorani tokbulu buthu,

Thumani chini muipingdong buthu.

Wadeng kareng narlayo’ chwngle hurumuthu.

Sarwi jorani pungmani owang.

Chwraifuru mwnaile kapmani hewang hewang.

Tabokle babuni khajani bwsajwk,

Waisale fayanw ongwi naruwajwk.

Mokol sanwibo naigwi mangwlak.

Bwkha tongwibo faigwi mangwlak.

Nangano nwngle bwini gosemwng!

Khabai kok sao’ tini saichung nwng.

Jego thangfano kaham tongdi nwng.

Kahamni faijadi bisio’ waisa nwng.

Mwnai rangchak toksa naruwai,

Salsabole chini nogo naruwai.