BIJAP BANIGO KOKLOP PORIMA || Kothomabwsa || Kashmir Debbarma

 Lai thangnai bisini(2023) bijap banigo koklop sanani mung rijakphano jora hamyani pher bai sogwiliya. Takwlai tei uaisa sep manwi koklop porina hinwi khao chongkha. Bijap banik takwlai bai hinkhai philbwrwichinwi(42nd) palaijagkha. Oh banigo English, Hindi, Bangla kokthaini bijaprok manthokma hai kokborok-ni bijaprokbo manthogo. Sana thangkhai kokborokni bijap tabuk kwbangma manthogo. Kuchuk rwng Kotor( college), rwngnokyung(University) oh poriui tongnairokni bijaprok manthogo. Abono karwi baithang Karima koklop, Koktang, kokbwkhal, kothoma Bwsa, Kothomayung Bijap rok painani mano. Takwlai 2024 bisi, February 21st ni simi March talni 5 jora Agartala, Hapania oh wngnai. Ang bijap banik wngma salthamni salo sogwikha. Tini March 03ni sal, teisa chini kokborok koklopni panda wngnai. Aro swikwrwng swikwrwngjwkrokni kwcharo ani mungbo tongma bagwi angbo thangna chongkha.

      Bijap banigo koklopni pandao thangna hinwi nogo swkango saui tonima bagwi tini phungo dakti dakti tiyar khwlai mankha. Phungni mai khopsa chaui, tukui musui paigwrakha. Thok khum phulwi ri kwtal chumwi tiyar wngwi paikha. Miya horo WhatsApp twi  Bai Suprachita Debbarma bai kok salaimani bisingtwi kok cholaikha. Baibo banigo koklop sanani chongjak tongma bai thangna kudijak. Bini kamibo  ani khowai hangkhor oh no . Bo kamio phaijak. Tini angbo aguli thangnai hinwi saui manwi kwnwi baksakhe thanglai mano hinwi salaima bisingtwi kok cholaikha. Diborni damchinwi (12am) oh khowaini bus kanai hinwi kok rilaikha.

       Phungni Diboro 12ta tamwi ang nokni nongkhorkha. Ani kami bai khowaio thangna mojomo chalo. Ani kamini nongkhorwi Hatkata( Eba Yak Kocho) hatio thangwi aroni tempu/ autu kawi khowaio thangna nango. Hatkata bai ani kami aswk chalthaphano himwile thangwi Manya. Haini bagwi angphayung Taraljit Debbarma, Bike bai tunsokna nangkha. Twrwk twrwk sal dibor wngwi mokolo satung kogwi phaikha. Ang nokni nongkhorna nangkha. Ama ano rang khokraba (₹500) yapharwi rikha. Tini bijap paina bagwi rang manlangliya. Phiya ang thangnai 24 tarigo no bijap paiwi twlangkha. Aboni bagwi ano rang kwbang hona soiliya. Angbo Sanna nailiya. Aswkbaino siringkhai yachagwi nokni nongkhorkha. Aphuru ani Mobile oh recharge paijak wngma bagwi Bai Suprachita no nokni nongkhorkha hinwi Sana hinphano saui manliya. Angphayung bai Hatkata hati jora tunjakha. Paithago bini mobile no sanwi naharkha. Tamni hinba ani mobile recharge kwrwini bagwi lama hachal thangna nangma ba mobile sago tongna nango siuino narwkjakha. Haile angphayung kha koiya twlangdi hinwi sama bai angbo manbukha. Ano tunwi angphayung nogo kiphilkha.

        Ang Khowai bwkhak lam rina bagwi Hatkata autu station oh thangkha. Haile borok pungjak wngma bagwi ang thangwi sogwikheno autu lam rikha khowai bwkhak. Soti thamnwichiba(25minutes) autu kama ulo khowaio sogwikha. Khowaio sogwima ulo autu driver-no rang khoknwichi(20) yapharwi aguli bus romna bagwi bus station bwkhak thangkha. Borok pungyakhu. Ang ticket tanna swkang musk kaisa pai naharkha. Aboni ulo ticket counter oh thangwi ticket tanwi seat number naiwi bus bwkhak thangkha. Khowai to agartala thangnani khokbachi(50) nango.Ani seat number rutugwi manwi achugwikha. Ani samo uanjwijwk sak sompilik khwlai achukjak nugwi kok Sana hinphano saliya. Swrapsani ulo bus oh borok kupulwng wngwi thangkha. Bus driver bini chalokmani achukthaio achugwi aguli bwkhak lam Rina dojak. Logi logino bus conductor bo sokphaikha. Busni dogwlamno phungsa buwi ‘চল’ hinwi kudima bai bus driver, bus stard riwi lam rikha aguli bwkhak. Thangte thangte Bai Suprachita no pogwi tongma bagwi ulose ang mobile khulogwi WhatsApp oh habwi naijago. Bo 11ta tamphuruno thangwi paikha. Ano massage khaiwi rikha. Angbo  “Dho akon Bai, angbo tabukno phai tongo” hinwi kiphilmung  rohorkha. Swrapsa bus kawi thangte thangte Pohormura, Padhabil, baijal, sankhala, belphang yakarwi hachwk lama sogwio. Hachwk lama kana bagwi chini bus bo Phan sotonwi gunjiriui kao. Hachwkni lama kokoi mokoi. Phiya lama kaham. Tabukhe haphangni luwajima bai High Way Road se swnamwi tongo. Agini hachwk bolong lama kwrwikha. Bebakse swrwng swrwng wmgbaikha. Buphang kotor kotor bo komorwi thangbaikha. Sana kwlaikhe hachwgo Thalikphang bo nukliya. Lama teibose phuwarwi tongo. Thang, phai khwlainani lam twngnwi swnamna bagwi teibo phuwarwi tongo. Haile chini oh Hathai Kotor bo phatar hasteni kotor kotor High Way Road wngwi thangnai. Haiphano tabukbo High Way Road no. Tamkhe tabuk teibo lama Kotor , swrwng swrwng, lamani kinar kinaro pherang pohorbo rijaknai. Thangte thangte Bus mankhung Phan sotonwi hachwk tokhwlaina naio. Kokoi mokoi lamaokhe khegna naiwi sak kebelrok dukhu manjakbaio. Hachwkni kwchar majaro khungsa khungsu kami tongo. Kamini borokrok hachwkni muikhwtwng thaikhwtwng akorok lamani kinaro achugwi phalwi tongo. Baksa lamatwi lainairok bwthagwi pailaio. Tei kisa thangkheno hachwk Soma thaio Hotel khungsa tangjak. Hotelni bubagwra chini borok.Aro chini borokrokni muiborok mui bai awan Bangwi akorok chaui mano. Belai kothokhe songwi chario. Uaisa angbo thangwi Awan Bangwi chamale chakha. Chawi belai thokjakmani nogo Ama no ma saphaikha. Aroni debwra gwlani hacheroro oh  tabuk Gairing khungsa tangwi tongo. Abo tangwi paikhe teibo naithoknai. Salo naithok nukyaphano sanja jorao hinkhe pherang chatini dilbidal kwchak kwkhwrang goron nugwi hapna muchungwi thango. Hachwkni lama ayangni hapungo huk chana bagwi huk sogwi hatal swnamwi gairing khungnwi khungtham tangjak. Uaisaya uainwiya aguli thangtwi phaitwi ayang hapungo gairing tangjak nugwi thangwi gairingo achugwi naina muchungmani khapang ninangwi waying khilijak. Ang khoroksa koklopnai wngwi hachwkni khwrangjiji nakhwrai gwnang goronno nugwi khapango koklopni bahai manwi khungo nangphawi koklop ano sotonwi twlango bini khurio. Hachwk hathai huk haping gairing ani langma bai mare kiching Khajak. Haini bagwino ani koklop oh aborokni achuk khampwlai mankhwna. Huk haping gairing tabukbo komorsugwi thangaykhu. Dangaima dangaiphani sakhai motomwi tongkho. Thangte thangte khao kwbangma hukumu mukumuni kokthai sederwi phaio. Tei kisa hapung kuchukni kwcharo twima hai kuwar kolokma tongo. Bini mung subolsing twima. Aro tabuk  aah Kotor Kotor mano. Hachwk laina bagwi sotithamchi(30 minutes) nango. Swrapsa ulo hachwk tokhwlaikha. Hachwk laiwi subolsing, hejamara, muhonpur laikha. Busni tailam phiyokjak, tailamtwi lamani rukung rukungo nok huk hati akorok naite naite thango. Tei kisa thangkheno ICFAI, Fisheries, Agriculture, Holly cross college malaio. Mung gwnang rwng Kotoro porina jotono khatungo. Phiya kwrwi bwsa hinkhe chukya poriui manjaya. Phiya rwng swrwngna bagwi rwngnok, rwngnok Kotor, rwngnokyung kaham nangya. Baithangse swrwngnai kaham wngna nango. Chini thangmani lama, sal bagan ganao malkhung bai bike dadak sidak accident wngma nugwi thang laisu khainairok bwthaklaijak. Chini bus bo bwthakna naikha. Malkhungni bwskangni jotono kwbai mubai wngjak tai bike ni  khaito tei sana kwrwikha. Malkhungo kajak chini borokno wngna belai serious wngkha. Malkhungo cheraibo khoroksa tongphu. Dukhu manwi lengwi kwlaikha. Bike oh kanai borokheto bokhorok phatiwi thwise riyorwi tongsio.Ani langmao abono puila accident nugo. Nugwi kha kobor, kirima habwi kulum kasama hai wngwi saktwi kwlwiwi phaio. Chini bus laiwi phaikheno patimumg koktwma manwi sakham(hospital) oh twlangana bagwi Fire Serviceni sengkwrakrok malkhung khungsa belai dowi pailaikha. Phiya chini bus laiwi phaima bagwi kahamkhe naiwi manbuliya. Swrapsa hinkhe chini bus agartala sokphaikha. Agartala Radhanagar bus station oh bwthagwikha. Ang busni nongkhorwi lam rikha.

Ang kisa himwi thangkheno dadak sidak Bai Suprachita bai malai rikha. Aphuru 2ta tamwi tongkha. Ayang koklopni panda 2:30 ni simi chengnai. Bijap banikni bagwi thang-phai khaina bagwi tripura haphang bus free rio. Ang siya bijap banik ni bus malkhung Radhanagar oh tongo hinwi. Bai supra ano ringwi twlangkha busni kana bagwi. Kisa himwi thangkhe Dara Kripasindhu no bo nugwikha. Sola kaisa khakwlaijak tai chosma kosom thubwi gentleman wngjak. Ang bini samo thangwi, “pa! Darabo chosma kosom thubwi Hero hai wngwi tongkha” hinwi sama khwnai wariksa khwlai mwnwimung phunugo. Ah salo ang nogo kiphilya, Dara Andrewni nok choroi oh thulangnai. Bo bo koklop Sana bagwi angbai baksano thangnai hinwi salaijak. Ang busoh katwtwi bono call khwlaikha. Bo khejur bagan oh nok choroi tongo. Tiyar khwlaiwi phai tongo hinwi sahoro. Swrapsa ulo bo sokphaikha. logio bini bayap khoroksa tongo. Chwng joto malailai bus oh kaliakha. Swrapsa ulo borok pungwi lam rikha bijap banik wngma hapaniya khola bwkhak. Ang busni seat oh achukna bejua wngjagwi busni bwskango achugwikha. Swrapsa ulo Hapania Bijap banik ni ario sogwikha. Bwskango banikni banner kotorma khwlai naithokhe swnamnak. Bus bwthagwiba ulo chwng jotono nongkhorlaio. Bisingo habwidorop kaisa Dangsa swnamnak, arono koklop panda khwlaio.Aboni ganani stall oh no kokborok bijapni bwtang bwtang. Abono karwi stall a.b.c.d……..khwlai kwbangma tongo.Chwng sogwikheno panda chengwi tongkha. Koklopnairok dangsani tolao achuklaijak. Tinini koklopni pandao komthingnai wngkha mung gwnang swikwrwng Sir Sachwlang Tripura. Dangsao achugwi khoroksa khoroksa khwlai koklopnairokni mung khuwi koklop saphainani bagwi ringwi tongo. Aboni swkang kok narwknairok kok narwgwi paikha. Chwng khwnana manliya. Chwng sogwikheno Dara Kwpwlai nuhorjagwi lamsogo. Dangsani ganani banikni office tongo. Aro koklop sabaikhe thangwi mung, kami, kokduk number swi mario. Chwng dangsani puila achukthaio lachiyakhwlai achuklaikha.

Tinino swikwrwng madam Sephali Debbarma no mokolni baithang nugo. Chwng sogwikheno madamni koklop sana jora wngo. Dangsao bachai bini mung gwnang koklop “Angle Bwrwiba”no khorang twilwlwk khwnathothokhe henerwi saui khwnario. Khoroksani ulo khoroksa khwlai khwnathok khwnathok koklop salaio.Aro Sir Narendra Debbarma, madam Sephali Debbarma akosong sokphaikha.

Kwbangkuk sikla sikli swikwrwngsong mang sokphaijakha. Swrapsa yagulo ani koklop sanani jora sokphaio. Ang dangsao lachitwtwi koklop sana ma thango. Phiya ang tinibai uaitham dangsao bachai koklop sana kwlaikha.Ang ani chajakukma koklop “JADU BAI MALAILIYA” mungwi saui khwnarikha. Phiya ani oh koklopni mung khwnawi baksa uansugwi mano hamjakmungni koklop wngkhwna hinwi, phiya ani koklop oh hukumu mukumu no muitu manwi khurchai sanani Naima koklop se hinjago. Ang koklop sabaima ulo dangsani nongkhorwi banikni office thango . Aro mung, kami, kokduk number swi mario. Koklop samani bagwi tripura haphang Swinairokno Rang khokrabà(₹500) rio. Rang khokraba, bijap banikni mukumu trophy, twi bodol thaisa, cool drink thaisa, cake thaisa, cheera thaisa mano. Ang yachagwi teisa ani achukthaio achukphaikah. Dara Andrewni jora sokphaiwi koklop sabai manwi nahai bobo ani gana achukphaikha.

Koklop sabaima ulo kisisa banik berai naigwna hinwi thanglaikha. Puila koklopni bwtang oh kaisa koroyai habwi nailaikha. Ang koklop bijap kwbangkuk hamjago. Koklop bijap naitwrwngo. Phiya ani logini Da Andrew hinkhai Kothomayung hamjakugo tai bo kothomayungno no swio. Takwlai bini yakbai swijak Kothomayung “NAKARMUNG” bijap banigo manthokha. Phiya angbo takwlai koklopni bijap karina uansuk tongmani yago rang kulokliya wngwi kari manjaliya. Haini bagwi banigo buini tikhwlaijak bijaprok nukhai Karina muchungwi b’kha yogo. Kokborokni stall bwraima ulo English, Hindi, Bangla kokni bijaprok nailaikha. Chini logio tongo Da Andrew tai bini kiching, Da Kwpwlai, Da Kripa akosong. Beraite Beraite bijaprok nugwi uanalaio. Kaham kaham swijak bijaprok nugwi swina muchungjaklaio. Da kwpwlaibo takwlai Kothomayung swi tongo hinwi Sao. Bijapni mang kariui Naina muchungjago. Aboni bagwi Khumulwng, Language Wing, Kokborok Department oh salai naina muchungjago. Language Wingni stall oh chwng habwikha. Aro swikwrwng swikwrwngjwkrokni bijaprok nailaikha. Aro achukjak Sir Goutam bobai kok saui salai mankha. Bijap Karina bagwi bijap banik lai saphailaidi hinwi sao. Aboni bagwi banik lai Khumulwngo thangwi salai naina hinwi kok cholaikha. Takwlaini bijap kwtalrok kariui phunukha. Sir Biplab ni koklop, Sir Ashit ni Kokbwkhal, Madam Sabita ni Koklop, Koktang bijaprok Kwtal Kwtal nugwi ang Naina bagwi sederwi ma thango. Ang thangnai 24th oh sir Ashit ni Kokbwkhal “ Rangchakni Uaying Ruphaini Buduk” paiwi twlangkha. Phiya tini hinkhai yago rangbo kwrwibai Mam Sabita ni Koklop “ Eng Eng Kukai” bai Swikwrwng Dr. Bijoy ni koklop “Holongo Swijak Kokbiti” kangnwi simi pai mansio. Beraite Beraite Da Kripa bini nangmani bijap paina hinwi chengnai kagwi bijap rutukna thangkha. Belai barwiwi bijap nailaima bagwi yakung ruwai, bisma kiyorwi tongkha. Swrapsa bwthagwi lenglai nalaikha. Ulo tei kisisa berailiama ulo kiphilwi pahikha. Bus free baino kiphilphurubo kiphilkha. Tini ang Da Andrewni nok choroi oh thuna hinwi bobai baksa thnagkha.