Khumsaiti || Kothomayung || Andrew Debbarma

BWKHAK BA (5)

          Bisikba bahai khe pungwi thang kha Sampari bai Mongoraini nukhungni halok. Gailem bai kokbiti yapharwi kwlangjakmani yagulo Mongoraino agini akolo yak rwma nuk liya. Sana thang khe kwchang kwchang tei tongthothok kheno kwbangma bisi laiwi phai laikha. Sampari ni mwranjak bwkha tabuk thangcha phiro, hangchajak bwkhao khatungma man phiro, phiya bo saui man ya bini poitoni imang abo bwswk jora twi kubui. Bo o kokbo uansuk horwi man ya je baksa imang borokni thani siyari hai khe sok phaio, tei kwmaui thango. Tabuk Sampari bwsaini laijak jorani kokno pogwi khapang rabwi langma kusungsa himnani poitono simi bwkhao thonwi tono.

          Bisi kiphilwi Sena sampaui phaio. Hatalo bisi kwtalni watwi kwlaiwi hatal motom sao. Bolongo dalbidal khumrok barwi phududu khe naithogwi barmani jora, gati khamani muibali buphango toksa jonijong baui kwtwi khorang bai rwchapma jora. Bolong sikla chaui muriduk kwswngma jora. O jorao mwrwi mwrwi khe jaduni rwchapmung khokthai kholwi rwchapma khwna khe khani borokno khatangma jora. Sampari bwsaino twiwi langmani haduk teibo himnani kha kamung bai bonboniya thwngo tei arono twma kokbo uansuk terwi mwnwio.

          Aphuru bini samo Mongorai achuk phaio, tei sao, “Ani Khumbar, nwng tini tamo swk naithok kha?’’

          Bwsaini khugo o kokno khwnaui Sampari khao khakchangma manjago, sakno boro ma tong baithangno siya hai khe khapango telakar hamjakma yak bai khonokjakma hai ma tongo. Bo khapang swrangjagwi sao, “Aswk salni nini khugo omo hai kok kwchang ang khwna ya khu, tini nwng ano bahai khe Khumbar bai lob kha kulungni bupha? Nwng khai sai man ya diba, nini Khumbar ba nini bagwino naithogwi barwi tongnai ta. Nwngbo Ani bongbwrai wngwi thwiyasak ano berengwi tong di.’’

          Goria phainani tei salsa se jora tong sio. Haini bagwino Mongorai sao, “Ani kok se khwna di muluni buma, khwna salsa tong kheno Goria, him di bolongo thangwi tini khumrok kholwi nahar lai yanw. Ang uskango nugwi kabuma tongo ayang borchuk hathai phaisingo khum maikek ha silwi barwi tong kha.’’ Samparini khangaro mekhagwi sa phiro, “O khumno nini khajuo berwi rwkhe bwswk c naithokno ani sakwlaba.’’

          Sampari khuyik khe mwnwio tei sao, “Him di ta khum kholna khaiba.’’

          Bwsajwkno bwchwi bai kwlangwi Sampari bai Mongorai bolongo thang laio. Sampari khatung khaja wngwino thang jao. Bolongo sogwi khe Mongorai bihikno swkang him rio. Thangte thang te Sampari achomsa dugo nango tei bini bohok suplajagwi thango. “Aya! O ama!’’ khoksa hinwi arono pwra pwra khaphraui tongo kengaiwi.

          Phiyaba Mongorai bihik dugo nangma bai baksa logi logino bihikno yakarwi aroni kharwi thango. Kok wng kha Sampari uansugwi man ya, abo bwsaini yakni samung hinwi. Tamni hwnba Samparino dugo phwnangna bagwino Khumtoya bai Mongoraini agini simino kok chabwi tongmani. Tamo khe Sampari mokol nukya bai baksa wngwi bwsaino poito chakha tei hamjak kha. Bo wansugwi phano man ya bwsai bono hai khwlai yanw hinwi. Phiyaba Khumtoya bai Mongorai agini simino kok chabwi paijak Samparino hai khwlai butharwi bohrok Agartala dolio kharwi thangnani.