Thungnukkhola tangwi doro? || Kokbwkhal || Ashit Debbarma

Bisi kwbangma swkangni simino thungnukkhola chini langmani lamo nangkukma.Thungnukkholano kaisa langma thwitwtwi bai surchajago. A pherno swinai sakphang sichukya. O kok kubui wngthun wngyathung bitile swraisa, hukumu mwthang tonina bechebo thungnukkhola belai doro. Thungnuk bai thungnukkhola kokmang twngsaphano bisingo phermani sampili gwnang.Twmale hinba Eng. kokni Drama tei Theatre kokthai thainwini bisingo phermung tongmano yak bai tisai phunukjaknai manwiya. Kok wngkha thungnukkholaono thungnuk, mwsamung,rwchapmung, koklam, kok narwkma panda khwlaijago. Thwngnukkhola bai dangsa kokthaile kokmang thansa. Thungnukkholani bisingtwino dalbidal thungnukni kothoma bokhorino sina,nainani lama. Aboni ulobo hodani thungnuk mwsanai tei thungnukno hamjaknairokni bwkhak yasi surwi swngmung kasao. Tamongwi thungnukkhola aswk dorokuk ? Tangwi chwng cherairokno bijapni thwngnuk khuktangna tei mwsanao bwkha bacha rwnani nangthai kwlai ? Rutukkwrwk samungni bisingtwi nukjakma kok wngkha ahaise thungnuk mwsanai tei mwsana samungo kubuljak borokrokni bwkhao uansukma bukcha tongmano kupulung khwlai tisao. Elem gwnang tei swinai kwrwng khoroksa wngwi Samuel L. Backer uaisa kok tangsa samani gwnang “Thungnukkholani kok kasaphuruno kubuni samung nangkukmani kok kasai phaio”. Lam twngthamni bisingtwi thungnukkhola chini langmano kwchwng khwlai mano. A lam twngthamni kokno khamao khursajakkha-

Sa. Thungnukkholani bisingtwi borokrok bai kwrwngna lam:

Thungnukkholao swkango siya nukya samung, kokmungrok chwng dadak sida nainani lama mano. Borokrokni bwkhao chaya chukya uansukma swrapmano thungnukkholao thungnuk naimani bisingtwi sichaui mano. Thungnukkholani bisingtwi borokrokni bwkha kuthukni kokmung kokbitino swraisa sinani yakhwrai. Journal of experimental social physiology koktun bwlaio kasajak rutukkwrwk kwtalni jarwi saimano, thungnukkhola thungnuk kwthang naimani bai thungnugo kasajak bosongrokni phaisingo chini bwkha deuagwi mano. O bechebo yakumu phunukna thangwi rutukrwk kwrwngrok chidok ra nwichinwi thungnuk nainairokno swraisa khe amjogwi naikha. O rutukwrwk samung dangsao thungnuk naina swkang tei naimani ulo o amjokma samungno khwlaijakkha. O amjokmungni bisingtwi thungnuk nainairok khao bosong rwk pherlaimung, ajilam pherlaimung, hamkwrai, ha baklaithani jwngjal nangmani sukrukna lamo bwkha swlaijakmani gwrwng nukjakkha. Thungnukkholao thungnuk naiphuru chwng mwsanairok bai simi kwrwngya, chwng thungnukkholani kubuni nainairok baibo kwrwngo. Swkangni rutukwrwk phwrwng chwng saichung tongwi swrwng manmani swlai pal bai tongkhe teibo kaham khe swrwngwi mano. Aboni bagwino borok khoroksa nogo saichung achuk mogwi tongmani pal bai malaikhe swrango. Palni thanio swrwngmung kwbangma ajio. Thungnukkhola janijani kha thansa wngma borok malaio tei malaiwi bwkha swrango. Thungnuk bwkha dengduljakno bachaphina chubao. Thungnukkholano twiwi Oscar waide kok tangsa samani tongo-” Ang joto dalni elem gwrwngni bisingo thungnukkholano kotor khe nugo, borok khoroksa kubun bai tongwi borok wngnani kha thangchana lam bubak mano”.

Nwi. Thungnukkhola mangnuk wngwi samung tango:

Hayung gwnangwi dangsa kaisa o kok uaisaphano khwde khnakha ? Thungnuk khao tongthokma simi bedokya. Thungnukkholani thungnuk hodani kaisa mangnuk. Hodani raida, borokni uansukma,tongmung,chahmung bebakno thungnukkholao swraisa peplao. Thungnuk borokni langmani lamno phunugo. Sakni mokol bwskango patijak, sakno twiwi tei nwng tongwi tongmani amchaino rwgwi uansukphina thungnuk phwrwngo. Thungnukkholao phunukma thungnuk kwbangkukno borokni thangsung bai halok kubuljak. Thungnukni gwrwng kwbangkukno swrwngthotok, phwrwngna bagwi naharmung chobwi swnamjak. Thungnukkholani thungnuk kwbangmao elem gilama,abo thungnuk nainairokni bwkhao uansukphina tei amjok naiphina bagwi kokbiti tugo. German hakotorni thungnuk swikwrwng, komthingna kwrwng Fedarick Shilar kok bwtang tangsa swimani tongo- “Chini mokol bwskango nukmani phan kok khnamani sai kwbang. Aboni bagwi tumung dangsao kubuino phunuk mankhe borokni silamno phologwi mano”.

Tham. Thungnukkhola bokhorokni elemno sochana chubao:

Borokrok mokol bwskango phang phang nukmani bisingtwi thungnuk naina kwsrang wngwi bachao. O kokni kokmang aboya, chwng thungnukkholao thungnuk naiwi tongtwtwi achuk bacha wngnani kok oro saya.Kok wngkha thungnuk naimani bisingtwi bwkha bachamani koknose oro khursana naio. Nwng kok elemno romwi manthun manyathung, thungnukkhola nono nini swnammung tei uansukmungno phuarthanio chubao aswkse. Chwng saimano- ´The lion king` thungnukni phutularok langma gwnangya ahaiphano chwng phutula naina hamjago. Abono karwi ´A mid summer nights dream` thungnukni suwarirok bwkwrang phehelwi birsamani abo dwkhwi chongkhwlaise biro, kubuio birwise manya. Ahaiphano uansukmao kwlwgwi tongphuruo chwng chini bokhorokni elemno swrapsani bagwi kholobwi tono.Rutukwrwk samungni bisingtwi saui mankha, Thungnuk swnamna samungo kubuljak tongmani jarwi teibo swnamna uansukma uaro tei yaphang yarwng ragwi phaio.

Sakani khursajak koklama twngthamni bisingtwi thungnukni phanno chwng nukkha. Thungnuk bai hodani hamya, chayano norwi mano. Borokrokni tongmung,chahmung chayani bagwi hoda mwnak tongmano thungnuk naima,phunukmani bisingtwi pohor kiyoksai mano. Aboni bagwi hodani cherai-khonai,sikla-siklirokno thungnuk swina,komthingna,mwsana sakao phan boksinthai kwlaio. Thungnukni phanno sima bagwi 1961 A.D. bisio ´Hayung Thungnukkhola Sal` palaina khatungwi International Theatre Institute (ITI) motha khajakkha. 1962 A.D. bisini 27th March salmario puila Hayung thungnukkhola sal(World Theatre Day) palaijakkha. Aboni ulo bisi burum 27th March-ni salo Hayung Thungnukkhola Sal palaijagwi phaikha. Hayung gwnangwi thungnukkholao thungnuk phunukma bwkhago hayung sakani borokrok mokol kaithaya,sak nangthaya wngma nugwino ITI ´Hayung Thungnukkhola Sal` palaina kokno uansukkha. ITI-ni o samung morok hayung sakani borokrokno thungnukkholano borom yapharnani phwrwngkha.

Analyst by Hanisa-A.D.