TIPRASAROKNI BISINGO BEMAR SITRA || Kothomabwsa || Andrew Debbarma

     March 12, 2023, Koktisal. Dibor kutungma jorao Vishal Market-o thangwi Mattress kainwi paiwi naharwi daktino ani khotolo ma hab phaiphiro. Maising thang rwrwk satungbo kwprap khe tungsaui phai rwrwgo. Ang Aguli Khejurbagan-ni Tripura Region of SDA Quarter nogo tongo. Vishal Market-ni sok phai kheno twi rangsa nwngwi thuyamo tawa khe gerogo ang. A jorao Duski kamini Kumuini phone sok phaio. Ang phone yachagwi kara thwngma bai khe kumuino mwnwisuru-suru khe swngo, “Tamo khobor-twibor hino kumui?”
      “Nono se khobor swngna bagwi call khlaimani,” kisa doro hai khe kumui kok phirokmung rwo. 
      “Tamono swngnani?”
      “Norokni parani Sunil-ni bihikrok biyangni chwla bai khar thangkha hin blasa?”
      “Aichukni buma bachwi de?” ang atomsa wanawi thango. 
      “Au pho.”
      “Nono khai sabo saba kumui?”
      “Norokni parani Diren se sahor bwle.”
      “Tong gwradi kumui, ang chini para call khlai swng nai gwrana do—”
      “Do ako,” hinwi kumui call tanwi rwo.
      Ang i kokno khwnaui wanaiui thang kha—Aichukni buma bachwi bahai khe ahai wng man? Ang chini kamini Sanjuno phone khlaiwi ma swngo.  Ang bai swngjak khe saui khwna rwo Sanju, tini hor thangnaio Aichukni buma kharwi thang kha hinwi. Borog Bandhan namani rang 30,000/-  twlangwi kharwi thang phun. Nukhungo walaimung, kaija kelengka mungsa phano kwrwi. Tongma chamano atomsa bwsai bwsano khibiui kubuni chwla bai kharwi thang kha. O kokno khwnaui talka thabsa ma buo tei ma hwno ang, “Youtube, news, Facebook-rogo nukmani, buini ayango se kaijak chwla bai kaijak bwrwi khar lai pho, bwsa manknwini buma kubuni chwla bai khar pho, bwsa makthamni bupha kubuni bwrwi bai khar pho—tabuk khe chini kamio se a bemar rwcharwi sok phai sio? Aha! A bemar sitra chini tiprasarokni oro belai khe solo laiwi tong kha! Tabuk khe sikla-siklirokno khar laima aswk khwnatha liya, tamo khe kaijakrok se tabuk bataiwi kharlai sido!”
      “Nwng sikla-siklirokno khai kaham da hinwi chong ba?” mwnwiwi kok yachago Sanju. Kisa jolijakma hai khe saphiro, “Ang kaijaknarok se muchung liya; tabukni dino bwrwi siklirok chwlarok Siklarok jotono paijak mang. Kebo kwthar (virgin) kwrwi. Nwng le Agartala tongnai ba, agartala-o porina thangnai kamini bwrwi sikli chwla siklarokni tongmung kaham khaino sibaina. Yang nogo khe porina saui town-o thang laio. Buma bupha khai bwswk se kosto khai borogno chaya nwng ya karwi rang rohorwi pori riui toni. Ayang bwsarok khe twima kotoro a phiyokjak twi porinani hinwi town-o thang khe, berai lainani, waija lainani, hamya tongmung tongnani mang se pailaiya. Sabo ba chwla bai bwrwi bara thansa tongwi tong, sabo ba pregnant wngwi bwsa khibi lai, sabo ba sak phalwi chaui tong—kulsima kwrwi.”
      “Au, kokle soino,” ang suku-suku khwlaiwi kok kiphilo. 
      A jorao Mare Haduk kamini  mwnai Twisani calling sok phai phiro. Bo  Agulini Lalbahadur-o nok bara (chorai) tongwi Bir Bikram Memorial College-o (BBMC) poriui tongo. Bo ano dormo dara khanani hinwi 2022 ni simi ano dara ringwi kok saui tongo. Bini calling sok phaima bai ang Sanju bai kok samani phone line tanwi mwnai Twisani calling yachago. Calling yachak kheno ang kok thaisa phano se khuk perwi man ya kho, mwnai Twisa ano kabwi sahoro, “Dara, ano chuba jadi. Ang nini chubamung belai nango o jorao.”
      “Tamo wng kha mwnai?” bini kapmani khorangno khwnaui ang tei polasa wanamungo kwlaiwi ma swngo. 
      “Dara, nwng tabukno ani barao jesa khai phano phai gradi.”
      “Athang-kuthang tamo wng sadi—”
      “Kok kwbangma tongo, nwng tabukno phase phai gradi.”
      “Tamo swkang saui manya diba?”
      “Urgent! Please bujidi dara, ang problem kwlai tong kha!”
      “Do akon, phai tongo,” hinwi call tanwi logi-logino nokni ma nongkhoro ang. Mungsa swk le jwngjal kwlai khwna hinwi ang wanaui yapri kodo seuino amang-chimang khe ma thango. Phiya malkhung kasanani naising thanio mojomono leru kha. Borok kuplung malkhung mang laiwi thango. Ayang mwnaibo waire wai phone mang khlaio, phada phaikha swngo. Ulo kaisa malkhung manwi kasaui thang kha ang. Malkhungni nongkhorwi yapri kodo seuino ang mwnaini barao sogwi kha. Thangwi nugwiba blade bai yak rwui thwi chob-chob kwsar rwui kobong kwbagwi kabwi tongo mwnai. Blade bai bini yak rajak nugwi ang wansuk kha, bo hamjakmungni bemar manjak khwna hinwi. Ang swngo, “Omoni bagwi da nwng ano ring mwnai? Prem rug manjak kha tana?”
      Phiya mwnaini khugo kok kiphilmung kwrwi. Bo kabwi hai hwnwi mang saui tongo, “Ano chuda di dara.”
      Ang kisa jolima phunugwi khorang tomoro-moro khe damrogwi kok kiphilo, “Chhapri wng kha ta chhapri. Aro waisa hamjakma manya hinwi yak rana nango haida?”
      “Atwiya dara, ani kok buji gradi.”
      “Sadi.”
      “Dara, thikno ang gosio ani mistake wng kha,” muktwi husa twtwi saklaio, “Ang nono lachi twtwi phano kubui kok ma sasinai. Khoroksa chwla bai 3 years kakha relationship tongmani. Hinkhe ang bono bwkha manwi mokol mukumwino puito khlai kha. Bo ano sao, jeswk jwnngjal phai phano ano yakar ya hinwi. Abo se tabuk ano pregnant khlaiwi yakarwi rwo.”
      “Tamo? Pregnant?” i kokno khnaui ang teibo wanamungo kwlaio.
      Bo haino hai kok manjuwi saui thango, “Kwpal hamyaba tamo khwlai sinai dara; bo aswk ano puitu phunugwi ang bai tong kha chakha. Tabuk khe bini bwsaya hinwi ano yakarwi rina naio. Angbo bono puitu khwlaiwino ani sakno bedok khwna bwle, bo tabuk bahai khe ano buphang bwthai hakrai hai khe yakarwi rina naiba?”
      Hama kolok rohorwi ang kok phirokmung rwo, “Norokno buma bupha khe poridi hinwi, borok kotor wng di hinwi buma-bupha khe chaya nwng ya karwi Town-o rohoro. Norok khe oro sakni muchung twi hamya samungo kubulo.” Ang joliui saphiro, “Nwng agi wngna swkang khai kisa phano wansukna siya da? Thapra phungsa da ri rima chakha waijati bwrwino?”
      Phiya khairokmasingcha khe mwnai kabwi saphiro, “Au dara, ridi kunu wng ya. Haiphano dara kaisa kubui kok—Chwlarok khe jesa bwrwi bai phano tongwi chaui tong di, borog hamya hinjak ya. Bwrwi borok khe kisa hwn kheno hamya hinjago, sinal hwnjago.”
      Aphuru khe ang khairokma phunugwi twrwk khe swngo, “Akon nwng tabuk tamo naiba mwnai?”
      “Dara, nwng tabuk ani chwlano kisa bujok gradi. Ani kok khe bo kisa phano khwnana nailiya.”
      — “Bo bai boro malainai? Phone twi da kok sanai?”
      — “Ihi, bini barao direct thangnai.”
      — “Bo barao da tabuk tongnai ba?”
      — “Ih baraono tongo bo tabuk.”
      Aphuru khe chwng a chwlani bara nogo thang lai kha. Chwlani mung James Kalai. Sak somplik-plik, bwkhwnai koitroi. Shyamali Bazar-ni Presbyterian Church (Synod Mizoram) uklogo bini bara nok. ICFAI University-o BA LLB khlaiwi tongo bo. Mwnai bai ang bini barao thangwi sogwi kheno bo kisa kirijakma hai wngwi tongo. Abono nugwi angbo kisa sikrima hai khe bono swngo, “Tamo nwng ani mwnaino buphang bwthai hakrai da nuk? Nwng je muchung twi ani mwnaino use khlaiwi yakar ri mano haida?”
      Phiya James koinene khorang bai kok kiphilo, “Ahaiya dara. Nwng bujiyani bagwi se.”
      “Tai tamo bujinani?” jolimung phunugo ang. “Ani mwnai bai thuma chamato tong khwna bwle nwng?”
      Mwkhang hao bomkhlaiwi komok mwkhang bai khorang lem khe saklaio bo, “Au dara, thikno ang bo bai tong kha chakha.”
      “Hwnkhe nwng tabuk ani mwnaino dera rwui tamoni yakar rwna nai?”
      “Khwna di dara, kubui kok sanai nono” James khuk khengna chengo, “Thikno ang Twisano belai kheno hamjago. Ang bo bai tong kha chakha. Agi ang bai waisa thikno bo pregnancy wng kha. Aphuru chwng chwrai makhibi laikha. But ang Twisano yakarnani kisa phano wansuk ya; ang bo baino kaijaknani tei nukhung khwlainani wansugo. Phiyaba dara tabuk bini o bohokni chwrai abo ani chwse chwrai ya hwn khe ang bahai khe gosiui nanai?”
      “Niniya khe saboni ba?”
      “Dara bo nono kubui kok huiwi tonio. Bini bohokni chwrai omo wansani bwchwlwi se.”
      “Tamo hinma kok?” i kokno khnaui ani sago pherang kokjakma swk wngo. Ang mwnai Twisano naisigwi jolimung phunugwi ma swngo, “Kubui khai sala mwnai, o kok soida?”
      “Ih dara o kok soino. Ano nakar sidi,” kabtwtwi mwnai kok kiphilo. 
      Ang tongwi man liya ani mokolo muktwi kwlaiwi phaio. Angbo kaptwtwino mwnaino sakha, “Ang wansugwi manya mwnai nwng aswk samung sitrano khwlainai hinwi. Belai seleng kha ang nini o tongmungno. Mababusong khe nono kaham khai pori thung hinwi Aguli rohoro. Nwng khe oro tongmung sitra tongna bagwi se phaio. Tabuk khe buini dophani borok bai se nwng samung sitrao gwdal sio.”
      Abo hai khe ang kabwi tongmanino nugwi James khorang kwchang khe sao, “Wng kha dara ta kap sidi. Twisani problemno ang ani problem hinwi gosiui na sinai. Tei dara, nono ang nakar ma sano, omo hai samung hamyano chwng khlaimani bagwi. Chwngno nwng nakar sidi, tei chwngbo thinango omo hai samung sitrano tei khwlai gwlak. Life-o jotono kaisleo, mistak khlaio.”