Mwnakni Dugar Phiyokna Jora || Koklop || Biplab Debbarma

Swinai : B. D

Tongnai o hayung
Tongwlak ani mwnwima
Ani chikonsa muchungma.
Salsaya salsa thangnani nangnai
Muchungya muchungya hinphano
Lama swnamjak arono
Khibi mamgwlak abono.

Kebo muktwi kupulung khwlai
Kebo hamjakma kupulung khwlai
Keboba mwnwiwi
Keboba kap kabwi
Nairwklainai ani paithakni salno.
Aphuru kebo ani mung bai ano rutugwlak
Jotono rutukphainai
Mang kwthwi biyang?
Aphuru mwnwima, khajamano sichariui
Ang siring siringkhe tonganw
Hamjakma bahaino saharwi.
Khakhamjak ama aphani muktwi nugwi
Kabanw joto
Amahai kebo khanangwi
Kapgwlak aphuru.
Ani kwlamgjak mukumu mari
Aphuru kwthangde tongno tongya
Sauibo mangwlak angle.
Ringnai kwbangma
Khwnaui tongbo
Ang kebono maya yapharwi kwlang mangwlak.
Khum nangya, rang nangya, khumni bahaise namgo.
Phaigwlak ang kiphilwi
Phiya tongrwknai
Ani kokbiti….
Aswk sal malaiya phano
Khatangma bubar kiyoksari a salo malailainai
Joto khakhamwi nairwklayanw
Kebo swngwlak boro thanani?
Ang saphano kebo khwnagwlak.
Noksar nok ari kok salaiyanw
Ani bahai mansirok
Ano teisa kiphilwi mana muchunganw.
Khumphang tongphano bubar kwrwi bai
Aphuru phaihwlak piya bongbwrai.
Nokha tongwise chumui mwchango
Nokha kwrwi i chumuirok baihai mwchamgsinai.
Watwi tongwise kothor kwlaio nokha watwi kwrwi bahaikhe kothor kwlaisinai.
Tini malaima salde
Paithakni salba wngsino.
Ani muktwino phunuk manliya
Bwkha bisingni nongkhorna riliya
Hui tonikha angle
Hopung kabo muktwi phaya
Kwmana kirio hachuk hathaino
Dangaima dangaiphani kwlangjak mukumuno.
Khatinai borok nango
Khatinai borok nango.
Thanaphuru malaigwlak
Phaidi kok rilaisinw
Khapang kichikno sup subwi
Hamjakma yapharlaisinw
Sejama naselemano mechenwi
Mwnakni dugar phiyok rilaisinw.