Langmani Twima || Andrew Debbarma || Koklop

Langmani twimao rungno chogwi
Sal habmani kha sirwkya!
Langmani twimabo khama kochogwi
Saka kiphilwi manya.

Rangchakni salrok ano ringhoro
Phiya ang kiphil manya;
Mukumu kwcham khano sotono
Bwkhani hujak thangya.

Ani salrok mwnagwi thango
Tongthok tei kha khamma bai;
Twiyungni samo ang sok phaio
Kwbangma bisi ani salsa hai.

Swrapsa swngcharo nograi phaiwi
Langmani kokmang sikha,
Swngcharni hamjakmung bwkhao chobwi
Angba kiphilna nang kha.

Langmani twima paithago phaiwi
Twiyung bai sampa rwrwk;
Kwtal khatungmung puitu bai nugwi
Kiching hayung bai kakrwk.