MAJWRA || THUNGNUK || Aichuk Debbarma

MAJWRA || THUNGNUK || Aichuk Debbarma

Thwngwrwng:-

Chumui:-kamini sijak simari gwnang sikla

Kwkwrwk:-kamini sikla chumuini bayap

Kamini chaya siklarok

*************************

Daikong

Chongpereng

Hoki

  Twiphang:-kamini borok (Chumuini kaka)

Kosomti:-kamini borok (Mwnakni buma)

Mwnak:-kamini hamya borok

Hamya lamao thangjak Kamini cherairok

*******************************************

Sumui

Swrang

Yarwng

              ******************************

                                                                          PUILA NUK

Chumui Agulini nogo phaio lamao kwkwrwkbai malaio

Kwkwrwk:-o da chumuisebwla Agulinida phai?

Chumui:-E phayung Rwngnokyungbo kholopkha hinkheba kamio Thaichuk thaipung chana phaikhata(mwnwitwtwi).

Kwkwrwk:-Da chumui tabukle nwngbo kamio phaikha jora kwbangmano tubui phaikhwna tabukle Chwng Kami hamkwraini kok chaplaisinai.

Chumui:-Aww phayung norokhai wansuknai logi tongkhe kamiba hamsaui chwngsaui tongnai.

Kwnwikhe nokni lam romlaio

********************************

Kamini Lama ganao Rwngnok(school)kamini khoroktam siklarok tas thwnglai tonglaio biri nwnglaitwtwi Chumuibai kwkwrwk phaio)

Kwkwrwk:-Naidiba da chumui Rwngnokhai kaisa kwthar phainai Thinangni chatirokno swnamma Thai ose omohaikhe sal phaikhe achuklaijak borokno nugwi cherairok tamose swrwngna tong!

Hoki:-Ei kwkwrwk bai chumui phaidi lenglaui jono biri kongsa nwng thanglaide.

Kwkwrwk:-Mwkhangomang lathi ri kwlangjaganw!

Chongpereng:-Ari bo tamola kok phekwra phekwra ei daikong thani bono rom naila.

Chumui:-Atwiyakhu atwiyakhu bayarok Chwng joto kiching kamai sakchalai  khabaksa palbaksa walaisuklairok chini bisingo kwrwi himdi kwkwrwk (Chumui kwkwrwkno soui nokni lam hainohai romphio)

(Kamini Lama Tangbili molni mai twi raui janija gulao tisalaina bagwi Jotono kudilaijak Chumuibai kwkwrwk himwi phailaio)

Kwkwrwk:-pa da chumui lengsukha satungbo Chang chang o mai ranairokba bahaikhe aswk soui tongmanbaikha!Aww bohok thaisa tongjamaba.

Chumui:-E phayung Soimungno kwpwlaini mang.

Kwkwrwk:-Atcha da chumui o kamini lamarok tei buphuru soi khwlaijaksinai Watwi phaikhe pek pek himlaimaya belaino jwngjal wng tongkha!

Chumui:-Aww phayung a bwkhakbo ma wansuklaithai aboni bagwi hodani joto lukuroknino khabaksa tei chubachu nangu.

Kwkwrwk:-Aww da chumui nini kokno soi akon da chumui himdi tini Ani nogo tong thangsidi diborbo wngkha mojomo.

Chumui:-Ehi phayung hapliya nogobo phaiya balukha nogo swkang hapsonwigwna ulrogo jora gothokhai wnglaiyanw phayung sarigo Ani nogo phaide dw kokbiti chaplainani akon thangkha.

                    ****************************************

                                                                   Ulnwi:-nuk

Nokbubagwra mwnak nukao achugwi daba hokul tulung tulungkhai nwngwi tongo, Chongpereng,Hoki,Daikong haphaio.

Hoki:-O da mwnak nogoda tong.

Mwnak:-Saborok wngbaikha o Chongperengsongsebla phaidi nogono.

Daikong:-I da mwnak phaiyabo balukhaba hinwi naisonwi phailaiyanw hinwi phailaimata.

Chongpereng:-Aww da mwnak angno soui tuwi phaio omorokno da mwnak hai maya gwnang o kamio khorokbwswkle tongba bono naiyakhe tei sabono nainai haiyada hoki, Chongpereng?

Daikong Hoki:-Aww Da Chongpereng.

Mwnak:-Aww norok tongmabaino angbo Khakchangwi tongjao phayungsong.

Mwnak:-Dw akon kwdwkma salni ulo phaibaimani tini bwtwkse nwnglainai,Ama u Baka sakani Gora kariui riphaila.

Chongpereng:-Nangya nangya da mwnak.

Mwnak:-Tamoni phayungsong kha khulugwise tongthoklainai nini da mwnakno rango Hindi phano Hindi mai khulo Hindi kebo mechenmannai o kamio achaiyakhu nuse nwngdi.

 Chongpereng:-Da mwnak kokkhai ahaise u Chumui belaino sak sakno sijakha bosimida wngkhwna o kamini rwngmari simari gwnang.

Mwnak:-Akon tamo wngkhaba kokno khulogwi sade kokno phes riui samani ang joboi hamjakya.

Daikong:-Uswkango Hokibai haino phatwra thwngjakmase mwkhango lathirok rina hin Sai kwlango da mwnak bono tamo khailaima chano nwngno sio Abwino nini oro phailaimani.

Hoki:-Aww da mwnak o Chumui sak sakno belaino elem gwnang hinwi wansugu.

Mwnak:-Haida wng tongkha bini tongmung bonoba kungthwi kurukri swpwrakhaise thik wnganw bwla!

                                                  Jotono palkhe hinlaio

Aw da mwnak abole nwngse sio kahamkheno tamo khaina nang.

Kosomti:-Yago Gora twiwi phaio uma uma baburok ahaiyakhu haiyakhu norokba tamo abo khwnamaya kirimasingsa kokrokno salai tonglaikha.

Mwnak:-Ei bwrwichwk chup thangdi nogo hapde bo borokno sisi siniyakhu o kamio tabuksakjora kebo khuksitwra kariui kok sanai kuruikhu ang mwnak tongsak abono komorriya.

Kosomti:-kaptwtwi O bulung hai ta wngjade nwphabo kwrwikha ang ja paritwi torrikha lokrikha kebono hamya khwlaina,bulaina,majwra bernale nwma nono phwrwngjaya o bulung hai hamya lamao yapri ta rijade.

Hoki:-Yong haiya o Chumui belaino ohongkar sipwlai wng tongkha bono kicha ma muphunsinai.

Kosomti:-O baburok haiya haiya hai ta wnglaijade.

Mwnak:-Ei bwrwichwk nwng nogo hapnada hapya bumano dagarwi nok bising daui rwio.

Mwnak:-Mo bwrwichwkbaibo tei pailailangliya thwinakhai thwibo thangya nakarjade phayungsong dw phaibaide hinkhe chenglaisiwanw.

Chongpereng:-Dw da mwnak nwngno swkang chengwi risidi nwngno okwraba.

Mwnak:-Dw akonkhai.

Jotono Chuwak nwnglaiui pheklaiui Chumuino kebengna kok salaio.

                                                                            NUK:-Ultham

Kamini lama kwkwrwk Chumuibai malaina bagwi himwi thang tongu lamao Chongpereng, Daikong,Hoki Kwkwrwkno kasuo.

Hoki:-Ei kwkwrwk bathakla.

Kwkwrwk:-Norokbai kok sana ani jora kwrwi ani lamani kutulde.

Daikong:-Ari nwng tamoswk laikhasa bwskango borok nukjakyada takno orono kwthang phobwi sinw.

Chongpereng:-Aha tamoswk tungjakhaba Daikong borokno Kwchang Kwchangkhaise bujokde.

Kwkwrwk:-Norokni nang nungya kokno khwnani ani khunju sidino tentaio ang aswkkhai selengo norokno lamani kutulde bejal wngnai.

Chongpereng:-Aha cheraikhubwla wansukmung phaiyakhuta.

Kwkwrwk:-Norokni gubor bokhorokni swlaile ani wansukmung kaham.

Chongpereng:-Eit bisi kok ta sade thapwra ri bwskangni Buwa jotono swkwrai rinw.

Kwkwrwk:-Dw rila.

Chongpereng:-Aha nonoba boro thapwra rimannai nwngba ani khachuksa phayungse jolimabai khuk lai thangwise dw mwnaikung ta jolide.

Chongpereng:-Akon mwnaikung norok boro miya Kami kamio chwng Rwngnogo tas thwngo biri nwngo, chuwak nwngo hinwi kok pirlaiphubwla.

Kwkwrwk:-Chwng keboni mung khursaui pirya Chwng Kami hamkwraini bagwise kokbiti rio lukurokno.

Daikong:-Norokni abo bwtwi Kami hamkwraini kok nang nungya lukurokno ok bukcha khwlainani wansukmungsebwla norokni abo thu.

Hoki:-Bo kamiokhai nukha norok chuwak biri nwngya.

Kwkwrwk:-Buini kamini kokno Chwng saui manya phiyaba sitwtwile chwng chini kamini tongkhorno derarigwlak.

Chongpereng:-Aww nuganw sabo bahaikhe Kami hamkwrai khai.

Kwkwrwk:- Uphilwi nasiktwtwi I Talno Chumuirok kobolwi tonimaya hai norok hai seleng tongmung sitwraroknobo Chwng saririnai.

Hoki:-Ei kwkwrwk besi ta laide bwsakbai bokhorok thansa marwkgwlak.

Chongpereng:-Wngkha wngkha borok Chongperengni budukno sise siniyakhu biyang phasingtwi kubulwi sijakbaino.Hoki, Daikong himde kaka Twiphangni nogose thanglaigwrana himbaide.

                                                        NUK:-Ulbwrwi

Chumui bario khum tei Jami buphangrogo twi luwi tongo kwkwrwk haphaio.

Kwkwrwk:-O da Chumui biyango.

Kwkwrwk:-Yangoda o da Chumuikhaino samungbai yakakgwi tongmaya.

Chumui:-Iko Miya khum Kai ribaimani abonono twi luwi tongkhata akon sagwrade bahai khoborrok?

Kwkwrwk:-Da chumui angkhai thamchi tungmani sakse kwlwipwrai tongsio che.

Chumui:-Akon…tamo wngkha dw khulugwi sala.

Kwkwrwk:-Tei tamo da Chumui nwngba saimayada Chongpereng Daikong Hokisongni tongmung nini oro phai tongphuru Lama kasuwi humki rio Chwng Kami hamkwraini samung tangmao kebengo che angto.

Chumui:-Amtwiya phayung itni phirokmung pathorbaiya Kwchang kwchangkhe hamjakmungni bisingtwi bujokhai borokbo o tongmung hamyani yakakmanai hamjakmungse Kotor phayung o kokno muitu ma narwknai.

Kwkwrwk:-Aww ata kokto soino phiyaba joboi jwngjal tei kebengmung phainai o kokno Hoda o sirinani.

Chumui:-Naidiba phayung salno tungmani bagwi jeswkphano ampaidi bo bini joraono phaio thango abohaikheno jeswkphano ereng majwra berthung salsa kubuinino kwplai wngnai Chwng o kokno muitu narwgwi samung tangwi ma thangnai.

Kwkwrwk:-Aww ata langma tongsak ang nini logi tongu Hodani samung tangwi thangnani.

Chumui:-Akon himdi noksingo bwcha bwcha kok salaimang achukna swdw Maicha rijakliya.

Kwkwrwk:-Nangya Ata hintwtwi nokbising haplaio.

                                                                          NUK:-Ulba

Nokbubagwra Twiphang rabar sit phwranwi tongo Chongpereng, Daikong,Hoki haphaio.

Chongpereng:-O kaka nogoda tong.

Twiphang:-O babusongsebwla phaidi nogono iko Orono achuklaigade Maicha nahaui achuklaio.

Hoki:-Kaka tabuk kangbwswkrok seat phaisa?

Twiphang:-Boroni Babu kangnwichi(20)se phaibwle.

Daikong:-Pa kaka tei bwswksa phaibla.

Chongpereng:-Kokkhai haise kaka o Chumui belaino kamio tongmung sitwra khai tonika tei okwra chakwrakroknobo siniliya ja bini muchungtwi khai tongkha abono nini oro ma phailaisio tamo khailaiman kok chaplainani.

Twiphang:-Tamo tamo Chongpereng kokno khulugwi sala.

Chongpereng:-Ei Hoki kakano sukurubwi sai khwnarila.

Hoki:-Kokkhai haise kaka O Chumui Aguli tongo hinwi tongmung sitwra o kubuljak tabukhai Kamiose pisarwi toniphaisio.

Twiphang:-Tamo bobotwi tongmung sitwra norokni a kok bulwi samono khibde kokbothoma sade.

Chongpereng:-O kakabo haile Soimung kwrwino saimanna muchungjakmani halhal yangkhai kok sakhaibo kok banogwi sao hinsuganw.

Twiphang:-Dw akon norok sagwranaba tamo bobohaibo wngwi tongkha.

Chongpereng:-kaka Chumui Agulini Drugs tuwi kamini cherairokno loi khairisikha agio chini kamio amohai hamya tei seleng manwibai kebo gwdaljak kwrwi tabukbo gwdalriya tei thinangobo gwdalna rigwlak abonono salainani nini oro phailaimani kaka.

Twiphang:-Chi abo Dalal kok ang puitu chaya.

Chongpereng:-Nukkhade Daikong,Hoki ang sayade kaka chini kokno puitu chagwlak hinwi.

Twiphang:-Norok nuda nukhaba bono Drugs phalmanirok bo khoroksa Rwngnokyungo poriui tongnai sijak nukjak cherai bo amohai samung sitwrabai gwdalwi maya abo ang puitu chaui Manya.

Chongpereng:-Akon kaka nwng ani kokno puitu chayahinkhai Daikong bai Hokino swngwi nainaba bo phada phal phalya.

Daikong Hoki:-E kaka Chwng mokol baithang nukha Sumui,Swrang,tei Yarwng borok khoroktham Chumuini thani drugs pailai tongmani.

Chongpereng:-Akon kaka hinkhe Chwng bwchalaisiwanw samungbo kicha tongo.

Twiphang:-Akon Babusong omohaikheno waisa wuisu phailailaide.

Aww kaka(Jotono)

Twiphang:-Mo Chongperengsong saui kwlangmaba kubuida wngkha erengda wngkha ehi bongni mo dalal kok ereng ereng majwra Chumui amohai borokya tobophano naichomwi ma nainaita swrai swrai wngna hinkhai.

                                                                       NUK:-Uldok

Kamini lama Sumui, Swrang, Yarwng khoroktham Drugs nahalaiui pheklaijak Chongpereng, Daikong, Hoki haphaio Sumui Swrang tei  Yarwng khorokthamno rang tei Drugs yapharwi Sao norokno kebo mo Drugs boro man swngkhai Da Chumui rio hinwi sade bujikhade teibo rang kwlangnai norokno tei Drugsbo kwlangnai dw.

Chumui bai kwkwrwk Kami beraina hinwi nongkhorlaio.

Kwkwrwk:-Da Chumui naide chini Kami bwswk naithotok hapung hathai twisa kheto tei toksa tokmilini khorangbai mwchangwi tongo.

Chumui:-Aww phayung o Toksa tokmilirok salo Ada rutugwi chao tei bwsarokni bagwibo tuwi phaio sal thangkhe nogo bothobo kiphilo amohaikheno chini borokrokbo jorabai baksa yapri seui langmani tei bosongni hodani samung khwlaina nangnai aphuruno Kami hamsaui phainai.

Kwkwrwk:-Aww ata belai nangkukmani kok.

Chumui:-Hai phayung I bwskango abo Sumui, Swrang tei Yarwng borokyada?

Kwkwrwk:-I Ata boroknoble.

Chumui:-Hai tamo borok  a bolong rogo tamo wnglai tonglaikhasa himla nailaigwrana.

Kwkwrwk:-I Ata himdi.

Chumui:-Oi Sumui oi Swrang oi Yarwng tamo wnglai tonglaikhasa norok oro bolongrogo sal kwthang kwthang mwchangya swrangya bachadi nogo thanglaide oro bolongrogo boro bui nukhai tamo hinnai.

Kwkwrwk:-O Ata omorokba Drugsse yorlaijakble uma!iko nasikde suchirok.

Chumui:-Aww kubuinotite norok boro drugsrok man tonglaikhasa sabo phal norokno sade.

Kwkwrwk:-Ata omorok thaisa kok sanani obostha o kwrwi himdi parani borokroknose ma nuhunwigwranai himdi ata.

Ajoraono Chongpereng Daikong Hoki tei Twiphang phaiui sokphaio

Twiphang:-kebono nuhunna nangya oro cherairokno derariui sakno tabukhai kaham sajokna naitero.

Kwkwrwk:-Hai kaka nini abo tamo  hinma kok!

Hoki:-Tamo hinma kokda hinwi kok phirok tongkho oro.

Chongpereng:-Nukkhada kaka tabukle mokol baithangbai chini kokno puitu chaya wngmani.

Twiphang:-Aww baburok norokni kokno soi tabuk o Chumuino tamo khailaina sade?

Daikong:-Hai kaka Policeni yago yaparwi rihordi wngyakhai kamio teibo ernai.

Kwkwrwk:-Tongkhude ano thaisa kok sanani jora ridi norok saboni kokbai Da Chumuino oro ereng majwra berwi omohai sitwra kok silchai tong Da Chumui Imangophano wansukmaya omohai seleng sitwra hamya samungo yapri rinani norok bonoda haikhe majwra berwi tonglai.

Chongpereng:-Ereng sabo kubui sabo Orono dadak sidak tabukno saimanlaiyanw ei Hoki thani u khorokthamrokno swngla

Hoki:-Atcha mwnaisong norok mo Drugs boro mankha eba norokno sabo riui kwlang?

Sumui Swrang Yarwng:-Da chumui (Phekjak khorangbai)

Chongpereng:-Tabukle dudni dud twini twi wngkhwnabwla.Che angle thamchise chakya wng phaikhadw bahaikhe nwng o kaham kaham cherairokno derarinani wansukha kichaphano kirima lachima kwrwikhada sago.

Hoki:-Eit tamo nasiklai tonglai swpwrakdiba.

Twiphang:-Haiyakhu haiyakhu baburok bo belai chaya tei  seleng samung khwlaikha chini kamio agibo omohai phekjaknai manwirogo kwrwnglaima gwdallaima kwrwi Chwng thinangobo wngna rigwlak aboni bagwi Chwng naio Chumui o kamino yakarwi thangsithun tamo hinbai?

Kwkwrwkno karwi tei Jotono aww hinlaio.

Chumui thaisa kok saliya joto thangbaimani ulo nokha saka bwkhak naharwi sao majwra saboni?

                                                                           AWA TOKE