Garing || Koklop || Prof. Sukhendu Debbarma

Garing By Prof. Sukhendu Debbarma

Khasikha hunkheno nono nukmani
Huk bai mwchangjak nini gorogle
Nwng kwrwi hwnkhe huk mwchangya
Nono karwinai huk bo wngya
Satung nokbar watwi katirwnai nwngse
Nono baikhe poknai
Sirisitini simino chini borokrok
Huk khwlai chai phaimani
Aboni mukumu nwngbo khoroksa
Nini khurio achugwi
Bwsuk rwchapmung jaduni rwchapjak
Ani garingle chuksorochro Nokbarbo nangsororo
Nini garingle……..
O rwchapmung rwchabwise
Khorok bwsukse nukhung khakana
A laibuma nwngno sinai
Raima bai saima ni kothoma o
Arobo nono kitingwino
Huk khwlanai nwng kwrwini
Birman nangwise bukhunwi kothoma
Raimani birmani swmaino
Nini achaimani kok
Satung watwini nokbar koto katirwnani
Raimani bwkhanikok nwng simino sio
Kamini ochai samung pailaiya
Bwsajwkrokni birmano siya
Huk arino garingno nugwi
Wansuklaio bukhuknwirok
Buphru borokni garing tangjakno
Kha swlukgwi swmai tangmai
Raimani swmai erengwngliya
Kubuino salsa huk o nukphaikha
Garing naithokma buinisai bara
Kha tongthokgwi bukhunwirok
Garing kitinglai naikha
Wanama singsa horsani
bisingo saboba tangkha aswk naithokma garing
Saimani swmai ni garing
Sabo tangkhana abo
Dipor kheklai garing o lenglai
Tilok twi kwchang nwgwi
Maichuno khengwi chana hwnphru
Saima no dagikha Raima
Ringsidi tabukle nini kumuino
Saima atomsa wanjagwinai
Palmanya wngwi thangkha
Muchunga twtwi dagijakmabai
Ringhorkha saima
Kumui o kumui kumuile
Maichana phaidi
Tilokni twi kwchang silwi khanawu
Kumuile mai chana phaidi
Khuksa ringmani bai phaya
Khuknwi ringmabai phaiya
Khuktham ringphrukhe sokphaikha saimani kumui
Bukumuino nugwi saima kirikha tei tong kwrwi wngkha
Raimakhe ba hamjakmai borono ganao manwi bwkha tongthokbara
Khani hamjakmai borokno
Maichu khengwi tilok twi kwchang kharwi sal than go sai phaio
Sal barywi diporni mai chana joro malailaio
Maichuni bai chabaya baranokhe
Bukhunwirok bag with chao
Tangwi twtwinai kahamkhe machaya
sak hamya wngwi phaio
Saimani sakno beljak nugwinai
Buma belaino wanajakha
Tomoni wngwi dal brum burum maichu twlangi
Sakba belnani nakha
Buma swngphano saima saliya
Bibino kokrwma tongwi
Bumabai swngjakmang swngjakmang
Sajakgya tei kwnaya kokno sakhwlirwkha Saima
Ani kumuile muselese wngsio
Abono khwnai bumabo
Nokhasakhani kelaimanihai wngkha
Bupha Ochaino bumabo sakha
Wanamasingsa bosongo khwnaya a museleni kok
Bupha ochai wansukha
Museleno tanwi butharnai hwnwi
Bwsajwk kusubai hukgo thangwinai
Ochaini thamchi bai saimano sakha
Ringdi tabukle nini kumuino
Phaikheno sadi bai phailiya tini
Aphase phaio tini ani logio
Khulumdi kumui aphano
Bwkwrano Kulumwi tongphru
Ochaini da kubukbai chokha museleni koktok
Satung watwi tei bokbar kotono
Katirwna hwnwi horsani horo garing naithokma tangwi rwnai
Boni majara kotok chonani
Koktok chouibo dungur o khorok berai
Bwkhani borok hamjakmai borok
Raimano twibuk torwi
Twiono khoroknwini mango berawi
Serisitinisimi kothoma haungo phinwi kwlangkha