Chini Laibuma || Andrew Debbarma

Sal kolok bisi kolok
Tongo chini laibuma morok,
Dangaima dangaiphani bwsarok,
Chwng le thwidul kaisa twiprasarok.
Kami mwrwknai kami chokdri,
Hano palainai hani bubagra,
Chwngno palaiwi kwlang jabai kha,
Rangchakni jora laibuma chaui thang kha.

Chwng tong laio kami nok kubung khaui
Nok kuridok nokdok.
A jora chini thinangno nuhurwi man ya;
Rangchakni jora sal mogwi thangnai
Kebo wansugwi man ya!
Chwngba tong laio khapang khulogwi
Hohom dodom chalai nung laiwi,
Mungsani chini biyalbo kwrwi,
Tong laio chwngba khatwtwng wngwi.

Buisu kwchar bai sena kwcharo
Huloksa pungma khorang khwnao.
Hapung thaisni twibuk buksini
Barwi motomnai kherengbar bubar
Swraimung nangwi bahai kwmabo
Bolongo naithogwi baro.
Chalai sak baksa kami khomtengwi
Berai laio khapang udila chaui.
Goria mwtaino lamsogwi
Kham tam laio rwchapmung bai,
Bolong sikla chaui mwchango
Haparno swrang rwo.
Chwrai khonai okwra chakra,
Khatung khaja khe mwtai khulumo,
Siklirok rigwnai chamathwi kanwi,
Risa sorbangi sogwi,
Kwlwlwk naithok khwlai
Mailuma khulumano khulum laio.

Chini laibuma khurchaui pai ya,
Sauibo sabai pai ya.
Sikla sikli kha man laiwi
Jadukolija rwchapma khorang,
Hukni gairingo tangbiti khorang,
Mwrwi mwrwi khe Jaduni khorang.
Chasmai buljak chini rwchapmung,
Ehu-hu khorang chini khatungmung.
Kha motom kubulo muwani dugo,
Bisi kwcham bai kwtalni jora,
Mayo babuni kokswngma jora,
Bisi kwtalo khumung kiyok khe
Khapang kha swrang phaio.

Bolong bokhogwi chwng huk chamani
Tabukbo muitu man kho,
Hukni dorompai mwkhwi chamani
Pogwi ang man suk ya kho.
Chini huk kotor hapung mai gwnang,
Mayamthong kaio chwng.
Chini gairing le chuksoro-soro
Nobar nang soro-soro,
Mai bwlwngo topthai pung tikhe,
Khani borokno muitu mantikhe
Khao khatang soro-soro!
Dungur bocholong hulokni khorang,
Bolong kuthugo tomwsa khorang,
Twma swk khaba swrang?

Chini hukni twisa chulungo
Twisa a gwnang tongo,
Athuk, Apwrang, khangrai, gunthu, a barsa romwi
Twisa twi sarwi, holongdap norwi
Dula supungwi ah rom laio,
Yak swrangwi totra swrang rwo.

Hukni gairingo maichu twlangwi,
Tilok twi kwchang sirwi,
Nobar sib sib gairing sakao
Lai bwlaio maichuno kheng laiwi
Mai kothok chao chwng.
Moso bilati wasungni gudok,
Banta mosodeng, abarsa egwi
Chalaio totwra kothok.