Nagendra Jamatia

SINIMUNG || SWIMUNG|| KOKTHUMNAI || Boyer Debbarma

                   Kokborok kokrwbaio kwtal jorani Naharmungno twiwi swinai tei kwtal jorani Gwrwngno twiwi wansuknai khoroksa. Swikwrwng Nagendra Jamatia 1947 bisi  May talni 22 salmari , Udoipur bwkhastebai khopjak Tutabari kamio achaio. Bini Nukhungo bwsa khoroknwi tei bihikni mung wngkha Pabitrarani Jamatia. Kamini Hodra Rwngnogo porimani ulo Udoipurni Ramesh Rwngnogo Rwngremchinwi jora porikha. Aboni ulo Maharaj Bir Bikram Rwngnok kotoro poriwi pass khwlai phaio.

                  Tipra lukubosongo naikhe nukjago Nagendra jamatia Ha, Hoda, dophano hamjaknai hinwi mano. Poriwi tongmani joraono Thwngrwngbai Gwdalna chengo tei thwngrwngni bisingtwi songduk dophani borokrogno kuchungo twlangna bagwi chaitokma nukjago. Nagendra jamatia Khoroksa mung gwnang kami, amchai, Haste gwnangwi sinijakma kahaino Kubuni phatarobo sinijagwi tongu. Nagendra jamatiani Twiphang Bai 1962 bisio TSF ni sompadok eba komthingnai wngwi samung tanglangkha.

                  Nagendra jamatia Thwngrwngbai Gwdalmani ulo 1978 bisini Simi 1988 bisi jora MLA wngkha tei MLA wngmani ulo 1988 Ni Simi 1993 bisi jora Hasteni Hukbar Bedekni montri wnglangkha. Aboni ulo Tai waisa 1998ni 2008 jora MLA wnglangkha. Montri , MLA wngmani bisingtwi bo dophani bagwi , samung khwlaimani nukjakkha. A jorano naikha hinkhe nukjago sakni bagwi wansukyawi, dophani bagwi wansukma , chaitokma nukjago.   Nagendra jamatia Hoda, dophani bagwi samung khwlai Mani ulo 2019 bisi January talni 21 salmario langma chowi thangkha.

                  Swikwrwng Nagendra jamatia kokborok kokrwbai o swithani yak kuwar hinwi Mano.Tamoni hinkhe Bobai swijak Thungnuk , kothoma bwsarogni bisingtwi kuthuk wansukmung , naharmung Hoda Ni mangpilirogno Dak Dak khe phunugwi Rio. Thungnukrogni bisingtwi  Mwnak puitu khwlai mano Hodani mangpili Ni bisingtwi Phunukjakkha.

                  Swikwrwng Nagendra jamatia Bai swijak puila kothoma bwsani Mung Wngkha Hathai. Hathai kothoma bwsa 1973 bisio swijago tei 1978 bisio bijab khwlaiwi karijagu. Hathai kokthoma bwsa bijabo Thaibwrwi achukthai rijakha aborog wngkha –

i. Hathairai,

ii. Athukrai,

iii. Homchang tei

iv. Shilpi.

                 Swikwrwng  Nagendra jamatia bai swijak Hathairai Kothoma bwsao Hathairai thwng gwrwngni bisingtwi Hoda tongnai tongkosong borok , Sakno hamjakma kahaino , kubuni bosongni borokno bo hamjakna rwngo . Hathairai kahai khairogma Gwnang, hamjakma Gwnang. Dophani bagwi wansugwi naharyani bagwino salsa Chini hao kubuni bosongni borokrog, Thai gwnangwi, hati gwnangwi bangmani nukjakna chengkha . Swinai Hathairai kothoma bwsani bisingtwi hathairaini wansukmungno  phunukna naikha.

              Swikwrwng  Nagendra jamatia Bai swijak ulnwi kothoma bwsani mung wngkha Bolong. Bolong kothoma bwsa 1993 bisio karijago. Bolong kothoma bwsao Thaibwrwi kothoma bwsa achukthai mano aborog wngkha—–

i. Bolong

ii. Swkal chomma Tiyari

iii. Buisu Horsni

iv.Totakami.

                    Swikwrwng Nagendra jamatia Bai swijak thungnuk 2001 bisio bijab khwlai karijago. Thungnuk bijapni mung wngkha— ‘Hakhor Bisingni Nongkhor Baisidi’ . O thungnug Mwnak puitu no twiwi swijak thungnuk. Hathaini wansukmabai hodao tongnai lukurogno mwnakni pohoro tubunani chaitokma nukjakkha. Swikwrwng Nagendra jamatia Bai swijak kothoma bwsa, Thungnokno karwibo komthingwi karimani nukjakkha. Aborog wngkha —

 i) Kok-Borokni bagwi chini khaithai- Choba kokrwbai Bwlai, June, 1979 bisi

ii) Muitu Man-no – Choba kokrwbai Bwlai, 1979bisi

iii) Hathai Bubagra Himaloyni khurio kokborok-  Dungor, July, 1979 bisi

iv) BadriNaran Mwtainok tei Mamakami –  Dungor, October, 1979 bisi

V) Samajbai Sanskriti- Dungor, July, 1979 bisi

Vi) Kok Achaimani tei Bosong kwrwngmani kok- Dungor , August, 1979 bisi

Vii) Kok uarsawi phaimani – Dungor, October, 1979

Viii) Tripura angkhor Bubagra kwchamni sason samungni kothoma- Dungor, 1979 bisi

ix) Bubagra Bir Bikram Bai Upojati Reserve Elaka Khajakma kothoma kwcham- Dungor, 1979.