Hayungno Phunuknai Ama (Kothomabwsa) || Andrew Debbarma

Kwpal kaham wngwi se sal, tal, athukirini mwkhang ang nugwi mano. Ani achaimani kokno muitu man khai ang baithangno kwpal kaham se ma hwno. Ano taknaisa ani langmani bagwi tamo chapmung khwlai, abole ang siya. Phiya bini hamarini jarwi ang achaio. Ama ano hayungni mwkhang phunukna bagwi bwswk birman manja kha o kokno muitu khwlai khe ani bwkhao busu yorjakma hai khe dunok saui phaio! Doctor saui rwkha, “Chwraino kwthang man phano buma thwinai!’’ Tumungno abo hai wng khai ang amani mwkhang de nuk khamun? Amaba bwrwi naithok de sitwra, kwchak de kuphur eba kosom de──ang bahai khe saui man khamun? Kwpal hamwino buma bwsa kwthang wng kha hinwi man ya diba?
Ang bahai khe birmanni bising twi achaina nang kha tabuk sa wanw. Ano hayungni mwkhang phunukna bagwi ama bwswk birman man kha! Bo mokol nukya wngmani bai simi thak liya. Sana hamya podrepot bemar baino chopropjak jakha. Sak kuplungni jorao se bwsakrok dukhlaiwi kuphung kotorma wngwi thang kha. High pressure-bo gwnang.
Tangbla molni tungphla kukmani jora. Salo satung manjak maya. Sago hoki bothrai berajakma swk wng ganw tungmani. Aswk satung chiring-charango jotono samung tangna seler lai baio. Bororok ahaino bwsak mojiui hama simi lephu lephu wng tongja baio. Kamio kulum bai hamya chaya kakya wngma jora. Aswk tungphla khaiphlani jorao ama sak kengnani ok sajago. Kengai mang kengai mang sak kengwi man ya. Bini sak dukhlaimanibo tekto manjago tei tungphlamani bisingo se ok sajakmani bai thwina kosa wngja kha. Nokni bororok nogo da sak kengno hinwi naimang salsa horsa wng kha, sak kengwi man ya. Teini phungo Sakham nogo twlangnani nang kha. Malkhungo Amano kasarwna phuru chwlarok khoroknwi khoroktham ma nangchru lai kha. Sak kuplungni bisingo se bwsak dukhlaimanibo betlai wngmani bagwi bono malkhungo tisanani belai khe tapra-khana nang lai kha. Ahai khwlaino Teliamura Hospital-o tubu laija kha.
Amano mwrwkna bagwi Apha bini buma achwino tholwi rwkha. Yangle o achwi Amano naisik se man ya, naislerjakmani kul kwrwi──mokolni phon bwkhani chor wngjagwi tongo. Haini bagwino mwrwgo simi se bumung, bo amano jaino khwlai ya phun. Ganao tongnai kubuni hamya mwrwknairok bai se golok golok gob rwui tongo hwno. Ayang ama tamo wng tong kha bini talaphi kwrwi. Swrapsa khaino cigarette mang se bokhokni sokogwi tulung tulung sogwi nwngo. Khoroksa Nursejwk bini a tongmungno nugwi mokol gwdaljak ya wngwi dabrogwi kutuk kha hwno, ‘Nwng hamya mwrwkna da phai eba khai bui bai gob rina da phai? Bahai khe hamyani ganao ba khuk thakya golok golok wng tong man kha? Hamya se mwrwkna phaio hin khai hamya mwrwk di. Bui bai swngchar raijoni kokno sanani bagwi ta phai di.’
Abo hai khe kutukjagwi achwi kabna buya mwnwina buya khe buwa simi hulwi ma tong kha hwno. Yang bisingo khai thamchi kajakmani mokol twi hor laijago. Horo khai naruwai nogo thangwi khabuk siya khai thuo. Salsa mwrwkma baino bo sak soimanjak liya kok bangwi tong kha hwno. Nogo kiphilwi chuwarak khuwi saichung saichungno nwngwi tong phaio hwno bahamjwkno kudiwi. Bising bising swbo swraio. Haiphano thamchini pas thangjak ya. Bo hai hwnwi swraio, ‘Khankijwkmani bagwino ang nurse bai hinjakna kwlaio──thwija ba di ano lachimasingcha khwlaimani! Ang lachimasingcha wngmani de nono nogo simi phai gradi. Ang bwswk thenti nwng ano sise siniya khu.’
Bo Amano mwrwknani soi liya, chuwarak nungwi simi nogo achugwi bini lama bo kudi twrwng tongo. Amano mwrwknani borok swlainani nang tong kha. Apha khe yang yang laisu mang bini samung pai lai ya. Amani ganao achugwi mwrwk tongnani jora kwrwijago. Sabono Amano mwrwkna bagwi tholnani borok manjak ya. Phiyaba bumano bwsajwkno mwrwknani ma gosi kha. Buma boro bwsajwkno saichung suchru khe yakar toninaiba──bono bwsajwkno mwrwkna thangja kha. Yang khai kok uanjwibo man ya, lekhaporabo kwrwi hin kha kwrwi──kwrwini bising kwrwi thok-thok, kebo bai sukrubwi koklam saui bolon chalai ya eba sutubnai buya. Bukhuk tongbo kok man ya swk, mokol tongbo nukya bai baksa. Aroni bising butuwabo thakjak.
Bumano bumaba bo khai Amani ganao khe achugwi mwrwgwi tongja-o hino. Bwsajwk tamo hin tamo sa khwnana bagwi khunjubo sichajak. Maichu tunwi charinairok hwn khe Achwi Roborwng bai bwsajwk Toi Nandarani (Achwi Roborwng khe Amani buma achwi Agumati ni bahanokjwk). Sanja mwnaksaui phai kheno Nurse-rok phaiwi achwino rwkhlai phaio hwno, ‘Phatar nongkhor di. Horo ma mwrwk ya.’
Bwsajwkni ganani kutulna muchung ya twtwino Achwi uklok uphil uphilwi naiwi ma nongkhoro phataro. Bini bagwi khe naruwai tongthaibo naijak kwrwi. Kebo bai koklam salainanibo bini khoroksa phano sinijak borok kwrwi. Bokhorok beraui thunanibo aro jaga kwrwi. Bo arono Hospital ni phatarni bairendao achugwi mogwi tong phaio hwno. Yang khe hor thuk rwrwk wngwi phaio, nokhabo pir ya tal thwichon sampama jora──yang yang mungsa nuhurya mwnwk wngwi tongo. Achwi muktrwi manjak ya, muktrwi sarijak. Khangaro yak rwui nilar khe achugwi uanajagwi mogwi tongo. Kirinani phano siya. Hospital ganani twiklek tei manwi sitrani thampui yongkharok puru-puru khe achwini bahanno motom jagwi kuhugwi phai lai baio. Bini bwswk kuplung thampui yongkha kolobwi thwi nwngo. Aswk khe tekto manwino hopung glang thuya karwi achwi phung aija kha. Phung ai kheno bwsajwkno bipraui rutugwi thango. Chanani nwngnani bini thar kwrwi; swkang bwsajwkni mwkhang nugwi kaham hamya sina se nang grao. Aboni ulo se chana nwngna hinbo.
Phungni damsni swkni jorao khe Achwi Roborwng maichu tunna phaio. Bo achwino bahan kwchak kwchak khe robonjak nuk phai kheno hamyani swlai bono se ma khairokjak sio. Binile bibi ba bobo khairokjago ta. Bo achwino abo hai khe nuk phaiwi swngo, ‘Bai, nini bwsak tamo wng kha abo aswk kwchak kwchak khe robonjak?’
‘Miya horo thampui warmani wng khwna ta tei tamo…’
‘Boro-o tongwi thampui warjak tong kha?’
‘Ang horo matingni logi ma tong ya Nurse-rok bai rwkhlaijago. Tini hopung ang bairendao achugwi se hor aio. Hwn khai thampui yongkha ba tei tamo hin sinaba..’
Achwi Roborwng bini bahan tangwi hino, ‘Nainaba nainaba…omo bahan no de sol si! Nwng oro tongwi lumnai, nwng se hamya kotor kwlai thangnai. Nwng tinino nogo thang di. Ang uaisa mwrwknai.’
Abo hai khe bono nogo rohorwi achwi Roborwng uaisa Amano mwrwgo. Phiyaba salnwi saltham wngwi thang kha ama sak kengwi man ya. Doctor tei Nurse-rok chaitok lai phano sak keng rwui man lai ya. Rang khai mojomo se baiwi thang kha. Yago rang kosor sukmani jora. Achwi Roborwngni yagobo rang khoksa phano kwrwi kha. Bithi paina phano rang kwrwi kha. Nogo rang sanhorna khaibo a jorao kokdukrok manthok ya.
Teini phungni aisirisiri sal kiyokya swkangno achwi Roborwng nogo rang naphaina hinwi amano yakarwi phaio. A jorao kebo phano laharo nongkhor ya khu. Keboni phalnok khulokjak ya kho. Bo Chakmaghat-o sok phai khe BSFrokno simi bwtrang bwtrang khe lama him lai tongma nuk phaio.
Nogo sok phai kheno bohrokni punjwk chwkhwla masa tongmano phalo. Rangmari kisa baino yak ma sarogo. Theka nangwi ma phalmani ba tei boro bwkhani muchung twi khe phalwi man sinai ba? Pun phalwi rang kisa manjamanino twlangwi achwi Roborwng Hospital thang phiro. Phiya bumani kok bai Apha khe Amano Hospitalni teisa nogo kiphil rwui tubuna naio. Jetwino bini jora phai khe sak kengnai, jora wng ya khuni bagwino sak kengwi man ya kho hinwi.
Nogo kiphil rwui tubuna nai phuru Doctor sarwgo, ‘Aguli twlang khai belai hamnai.’
Apha bumasongni kok baino jora sok phai khe jetwino sak kengnai hinwi nogo kiphil rwui tubu-o Amano. Phiya Amani bohok sajakmani domon wng ya, kengaiwi sanchiui mang ma tongo. Amano nogo kiphil rwui tubuma horo bwkrajwk Amano mwkhang naisigwi kutuk hwno, ‘Twma bwrwiba wng kha aswk khai borokno satoknaijat! Buiba pholot pholot nogono baui pai bwle, buko buiba Hospital se thangna nang ya.’
Ama bini kokno khwnauibo khwnaya hai khe ma tong hwno. Bini sak bai se bo pai laiya. Teini salo khe Amano Agulini Hospital-o twlangnani apha uansugo. Buini aro rangrok kisa misa solok naui Amano IGM Hospital-o twlango.
A horo Doctor mwkhang kosom khe Aphani samo phaiwi khorang twrwksa khe saphaio hwno, ‘Obo belai serious!’
Doctorni khukni o kokno khwnaui apha kapsisi khai uanajagwi swngo hwno, ‘Tamo hinma kok abo sir?’
‘Khoroksano mwthang khe tei khoroksani langma ariui phano mano,’ Doctor khuk hilik khe kok kiphilo, ‘Chwngbo chini mansak jora twi chaitogwino tongo.’
‘Ihi Sir, buma bai bwsa khoroknwi’-nono mwthang jaba di,’ khulum kobok khe Apha Doctorno koiwi sao.
‘Ani kokno buji di Mr. Ram──chwraino mwthangwi phano mananw, phiya buma se belai kheno serious!’
‘Tamongwi?’
‘Bini sago kwbangma bemar tongo. Bo a bemarni bagwibo aswk twino serious wngjak. Haiphano chini paithak lama kaisa naijaknai tongo aswkno. Phiya chwng man liya hwn khe tei mungsa khwlaina kwrwi, abo kuchugo tongnai kaisa se sai mannai.’
‘Hwn khe tabuk tamo ma khlainai sir?’
‘Caesar ma khwlainai──abo simino lama tong sio!’
‘Doh akon sir, abo norokno si sinai, tobo phano ani bwrwi bai ani chwraino kwnwinono mwthangja di…’
Aphani bangra-o yak beraui Doctor saphiro, ‘Ta wana di aswk, borokni langma le kuchugo naikhlai tongnaisani yago se. Norokbo suri di chwngbo suri wanw. Norok jani jani twima mwtaino kha bai suri lai di.’
O kokno khnaui Apha muitu manjago agi ama bono matric tei uaisa exam rina kok sa phuru sajakmani kok : ‘Nwngbo suridi angbo surinai,’ hinwi. Amani kok bai surimani bising twino bo Matric pass wngmani, o kokno muitu manjagwi bo ganao yasku sugwi suriwi tongo.
Teini phung aisirisiri kheno Doctor-rok Amano caesar khwlai kha. Kwthwi kosa wngwi thango ama. Aswk birman tei tektoni bising twino tini ang o swngcharo achaiwi phaio──sal, tal, athukirini mwkhang nugwi mano. 2002 bisini 20th June, Sangrong salo ang achaio. Haikheno angno maphani bwsa okwra wng jakha.
Angbo Amano nukna tongwino aphuru amani langma choliya. Doctor-rok mwthang narwk mannani puito khwlai man lai ya tongmani, phiya kwpal kaham wngwino aphuru amani langma cho liya. Obono ani birmanni bising twi achaimani kothoma. Andrew hinwi ani mungno narwknai khe ani apha.