Khachukni Bai || Kothomabwsa || Andrew Debbarma

Chwrai phuru ano pusinai khoroksa bai tongo. Bini mung Rita Debbarma. Binibo kwpal hamyano; bini kwpal birmanni kokno ang kisa saui khna rw anw :
Salsa hati-o malaiwi Sonparani khoroksa borok Aphano ringwi sao, ‘Nwng khoroksa bwrwimano pusi nada?’
Apha swngo, ‘Sabo a bwrwima?’
A borok hama kolok rohorwi sao, ‘Belai kheno talikha hamya bwrwima! Bini buma kwrwi thwiwi thang kha. Buma thwimani yagulo khaino bo kwpal birman mannani cheng kha. Buini nogo sebuk ma tong kha. Buphayung khoroksa tongo, a buphayungbo haino buini nogo sabuk ma tong jakha. Ang a bwrwimano nugwi belai kha kham kha; a nokphangrok bono kisa phano khairokma kwrwi khai samung tang rio. Samung dera khaibo musuk butwi khai bujago. Ang bono a nukhungo sebuk tongma nugwi belai ani kha yok kha! Ang bono nugwi kha yogo!’
Apha bono swng phiro, ‘Buma thwiwi se aswk birman mano hwn khe bini bupha le kwrwi de?’
A borok a bwrwimani buphano jolijagwi kudiui kok kiphilo, ‘A bupha da bupha! Aula─⁠─seler! Bwsa bwtwino jai kwrwi, bo sak baithang se chanani aji man graya. Phot chaya huda se a bupha hinjaknai. Bo de bwsa bwtwino pusi man bini sal phai khai nogo se tong phlai ya aro uro berwiwi chuwak nungna mang digwra rijak tongnairok? Tokma twima se sal baro, bini chuwak bai tukumani sal bar ya, phung ai khese chuwak bai mwkhang sunairok. Bo de tei bwsa bwtwino jai nang si?’
Aphuru khe apha a bwrwimano khairokjagwi hwno, ‘Buma bupha khasiyani bagwino bwsarok khe birman man baio.’
A borok hwn phiro, ‘Abagwino nono pusi da mano hinwi ma swngo ta. Ang puito tongo, nini nogo hwn khele satokjak glak. Bo nini nogo phano khakchangma manwi teisa suk-santi khai ma tong ja si thung. Ang bono aswk kosto khai nugwi bwkha chor liya.’
Apha bini kokno khnaui mokolni muktwi kwlaijago tei sao, ‘Ang pusinai a bwrwimano. Nwng kaham khe salaiwi ani nogo riphai di.’
Aphuru a bwrwimani umor bisi chinwi. A borok bai Ritano chini nogo tunwi rw phai kha. Chini nogo sok phai phuruni simi kheno bo khakchangma mano. Agini hai khe samung kwrak kwrak tangna nang liya. A jorao ang khebo bisa-bisiknwini chwrai khu. Bai ano nainani belai kheno chajago. Amabo mokol nukyaba bono ano naio. Bo ano belai kheno hamjago. Amasong bono ulo sikla sok khe kaiwi borwi rohornani hinwi uansuk tongo. Bono phungsa phano bubo buya, hibo hinya─⁠─sakni okni bwsa hai kheno amasong bonobo hamjago.
Salsa khe athang kuthang bini bupha bwsajwkno rutugwi chini nogo sok phaio. Bo bwsajwkno chini nogo nuk phai kheno belai hamjagwi aphano sao, ‘Nini nogono ani sajwkno toni jadi; buini nukhungo khe belai kheno satokjago. Phiya ani angsajwkno ang naphai ya sak tei ang dagiya sak nwng keboni yago bono ta yaphar di.’
Apha bono kok kiphilo, ‘Nwng ta uana di, chini nogo tong sak nini cherai khusi kheno tongnai. Phiya norokbo kha sibai sidi. Sakni bwsa bwtwino mo hai khe birman ta phwnang di.’
Bupha mai twi chaui nungwi bwsajwkno yakarwi kwlangwi thang kheno bai Rita belai khe kha khamjago. Khoroksa bupha sakni bwsajwkno bwsa ya hai khe bahai khe yakarwi kwlang man⁠─⁠─bini mokolo muktwi kupulung choromwi phaio. Bo thuyamo gerogwi kha kha nangjagwi swlwgwi kabo. Tei buphano ri chum kichik kwpla nugwi belai khairokjagwi kabo. Bono kabwi tongma nugwi ama bono bandi phaio ta kab di hinwi. Hai phano bai Rita kha kha nangjagwi kabo.
Salsa khai bai Ritani buchu bwchwisong bono rutugwi chini nogo sok phai laijau kha. Bohrok baino twlangnani kok saphai laio. Phiyaba bai khe bohrok bai thangnani soi liya, thangnani naiya wngwi tong kha. Bwchwi buchusong teibo kwrak khe dabrogwi twlangnani naio. Ayang baibo teibo kwrak wngo─⁠─thang ya hwn khe thang yano thang ya. Baibo thangna soi ya tei ayang bwchwi-buchusong khaibo khamkano twlangnani abo hai khe bohrok kok bang laiwi teibo se ur pati lai sio.
Aphuru khe apha sa kha, ‘Ihi, Ritano kebo ma twlang ya. Bo ani nokni borok. Bini bupha ni khukni dagimung man ya sak ang bono keboni yago yapharwi man ya. Bupha sak baithang ano kwrak khe saui kwlang kha. Tamoni norok khamkano bono twlangnani?’
‘Tamoni twlang ya tongnai?’ bwchwi-buchusong kwrak khe tokra riui kok kiphilo. ‘Nini bai bini bisingo bwswk holok sok laiba? Chini le busuk se, chinino thwi. Nini nokni bo sabo?’
Abo hai khe teibo kok bang lai kha; kok cholai liya. Yang baibo thopsa phano thangna muchungjak ya, kwrak kheno tongo: ‘‘Ang thase thang ya’’ o kok thaisa simino kab twtwi saui tong sio. Bwchwi-buchusong bini a gwdwna kwrakno nugwi baibo buna chengo. Amasongbo bising bising belai bujok nai lai kha; phiya a bwchwi-buchusong amasongno tokra riui teibo ualaina naio. Abo hai wng laite wng lai te paithago khe amasong abo hai bejuwa bororok bai mungsa kok pungna nai liya; tamni hwn khe bohrok kok samani a bwchwi-buchu hinjaknairokno thaisa phano khna riui man ya, teibo se kok bang laithai kwlaio. Aboni bagwi apha sakha, ‘Thangna gosi rwui man kheba twlang di.’
A bwchwi-buchusong khamkano twlangnani naimani bagwi bai Rita thangnani ma nang kha. Bo thangna phuru ano kwbagwi tei motom suwi jai khaino kap lang kha. Jai kheno kutulna muchung jak ya wng lang jakha. Amasongnobo kwbagwi kab lang kha. Amasongbo bini bagwi kab lai kha.
O patimung wngmani sal kisani yagulo kheno bai Ritani bupha bwsajwkno naina hinwi chini nogo sok phai phiro. A salo khe bahai khebo kha pasajagwi baini banta chajaknai manwi tei ri-chumrok paiwi tubuo. Nokhla sok phai kheno bwsajwkno ring phaio, ‘Ma Kormo, nogo da tong?’
Baini buphani khorang khnaui amasong nokhla nongkhor kheno buphano nugwi mwkhang mok lai kha tei bebak kok thung khuprui saui khna ri lai kha. Aphuru khe bupha bebak kok khnaui belai kheno kha hamya wngjagwi kab kha tei aphano hwn kha, ‘Ang saya da ang phaiya sak tei ang dagiya sak ani sajwkno keboni yago ta rohor di hinwi? Norok tamoni ani kokno khna liya?’
‘Chwngbo rohorna hinwi rohormani ya bwle..!’
‘Ang agino saya diba?’
‘Khamkano segwi twlangmanino chwng khe bahai khe narwknai? Chwngbo chini jora twi salai kha.’
‘Ano sayaui rohormani abo noroknino chaya.’
‘Nakar di sidi─⁠─’
‘A bwchwi-buchusong bai tong khe bo teibo se satokjak sinai. A bwchwi-buchusong bai tongmani slai buini nogo tongmanino chakugo; bwchwi-buchu phano bohrok bwchwi-buchu ya─⁠─satokna bagwi se twlango!’
Bini kokno khnaui Apha uanajagwi swngo, ‘Tamoni bagwi bwchwi-buchusong khe abo hai wng sla?’

‘Abohrok bwchwi-buchu phano maya kwrwi──busukno satoknai jat se!’