Nasikmung tinino paithak || Thungnuk

By Jeshmi Kalai

Nasikmung chini juda nini bai Ani halok gothogwi bo gothokya hai,abo nwng saoi de man San? Nono saliya nini nukhungni borokrog Jari no tamo hwnwi wansuk tong nwng saoi manya de? Aw nwngbai to tabuk halok swbaiyakhu ba swng na muchung ma khe hai se, nini hodarog ano nasikmani bwswk joratwi juda nwng abono tamo hwnwi sanai. Ani hoda khe ba juda de, ang bo Tiprasano ble. Nwng bai halok kwrwngwi kok biskwra le jori simi se khwnakha, San nwng ani phasingtwi khw de khwna? Aw chaliya Ani no e,Ani hwnwi chongma bagwi, wngkha! je wngmani Tai saoi tamo manai je wngmani chwng tini ni simi hakchalsinai aswk no kok. Aw Jari! Kwnwi no paithakni mwkhang nasiklaiwi pherwi thanglaio mwkhang.

Aisiri siri Jari ni imango bini nok gana ni chwrai khoroksa imango khum barsa yapharwi rwphaio mayo hi iko nini bagwi, puilao ba kwchak khum naithok nu wngwi tongu paithago le Jabra se wngwi thangsiu. Jari mwnwi twtwi twma imang rog bo haile wngya no no wngrwi rwimanu. Jari sikili chaslok jotoni mokolo kwlaina jora ba kelengnai bongbrai kakphwlaiya. Swrapsa tongwi, mayo.. ,

Jari oi, moi- tamo khwlai tong sa? Jari- iko tabuk no nok pharwi hantarog hubai drop, moi- oh, khwna gadi nono kok thaisa sana tongu mayo. Jari – tamo ba moi sadi, moi- ta jolijak di do mayo,nono khoroksa swngu! Jari- he! twma kok abo ang chajakya atwirog.

Moi- twt kobor nono bo hamjak tongu chwla bo naithok se nwng ma chajaknai ani sinijak se. Nono wairewai swngjak se bo ani yaktwi ang se sarakliya nono, nwng gosidi mayo borok bo kahama nono bo hamjaksugu. Nwng kok simi phano sadi bayap wngwi phano,aswk nwng hamjakya hinkhe hi iko number, Nadi.

Jari – oi moi naidi talik balikya ang kirio atwirog ang porioi tongphuru rogo a dwkhwirogo kwchana muchungya. Ihi ang gosioi manya nwng phirogwi twlangdi.

Moi – aha mayo bayap mare phano khana phu bo nwng bo kiching phano khasidi hamjakya hink bo bu ahaino hwnwi saoi rohoru bayap kiching hwnwi kok sadi.

Jari- do ako! Ani number khe.

Moi – agino nakha bo, ha ha ha. Nini kok phirokmung se nasing tongu bo.

Jari -wmmm kobor gwja nu haile.

Sarik sal twilwkwk nok ni samung paiwi kisa lama berai tonganw hwnwi nokhor mani number siniya kaisa phaiwi tongkha. Jari kirijagwi tisa liya. Swrapcha tongwi Tai waisa khwlai phuru Jari Hello!

San- Jari da?

Jari- e ang no tamo sadi!

San – tamo khwlai tong sa?

Jari- lama kisa beraiwi tongmani tamo ba, sabo wngkha?

San – ang san, mungsaya kok sana muchungu hink ba kok sainaimani ta, joliya na ble.

Jari- ehi tamo jolina tong.

Haikhe no kok salaite salaite khorang paiwi thangkha khoroknwino, phiya baithang Jari siniya khu. Jari no san kwbang nasikjak tei sinijak nukjak, salcha Jari mairang kathi pukhiri o aisiri siri hui tongphuru san rukung twi bono nasigwi thangmani Jari khel kwrwi. Salcha Jari bini moi songbai lama berai tongphuru san agulini phaiwi borog ni bwskangtwi himwi phaiwi tongu .

 Jari – ba… sabo aswk biyangni chwla naithok waisaphano nukya khu sabo abo aswk mostan ? Moi bini ganao tongwtwi sinihorwi hmmm, hwnwi warik warik nwng naithokjakha haida mayo, naithogo aguli tongnairog wngkhwna ta kanmung chumung nasik nainaba o chwlani , hi hi hi. Gana twi San laiwi thango kisa nasigwi Jari ni samtwi no. moi-o kaka tini da phai, salbwswk tongwi thanai sa ? San- iko salnwi saltham tongwi thangnai ta mayo hwnwi thangkha do . Jari o kok khwnaoi mwkhang tungphlajak khichik phano pathothok ma tongjak liya. Tamoni hink khorango kok samao bo thar manthangkha Ih omo ba ang bai kok sanai san si wngkhwna bla. Jari mungsa tei kok saliya khwktwi simi gwdwk gwdwk langma chonai kha hai.

Sarigo, san Jari bai kok saho phiokha Jari tamo khwlaiwi tong sa?

Jari- haino tongu,

San – ang kamio phaijak ang bai malaina muchungya da, phaidi norog miya bachai tongma thaio ang nasing tongnai.

Jari – ehi bui bai nukjakhe hamya sajaknai se.

San- ako phaide, chwng bachaoi kokrog salaiya phano kwnwi ganatwi simi chwng laiwi thanglainai aswkno. Jari lachijagwi kok sarakliya, Jari bo waisa nukmabaino khao khum kiyokjak ba mwkhango heleng mwnwimung nokhorkha, phiya bwkha bising rwsam Romo sukjak swk wngmani sari liya . Jari lamao san bo lamao sanja somumuk o jorao nobar bo mwchangwi no sarikni boyar sipjak Jari bai san gana o sokphailai kha.

San- Jari nwng belai bwrwi naithok mwchangjak.

Jari – ma..nwng bo komya do, serek sakhe laitwtwi saoi kwlango Jari.

Twrwk twrwk bisi khonsaoi thangkha san kami laisumani choliya nok ni borokrog juda wngjakha, jari song ni bwkhago mamang berai phaima bagwi. Jari no salcha bini nokni borok cherphaikha buini yaktwi . Saoi mankha Jari bini achwi achu ni nogo se porioi tongu phiya nokni bebak samung bo khwlaiwi manu, bo san ni Sai bisinwi rwngnokni rem o swrwng tongu. A kok khwnaoi San ni nok ni borok chajakliya Jari no majra berna chengkha. Salcha Jari bo berai tongmani san ni nukhung ni borok Jari no nugui- “aswk ri bara bara yasku nukjagwi kanu hinkhe ba chwlarog ba bornai no ta, lub wngnai no ta chwla mothorna bagwi hai khe ri rog kanwi bo chwla lubiya tongnai okra twtwi lachiya!”O kok khwnaoi Jari lachijakha belaikhe kha khamjakha. Bo saoi manu bono hino hwnwi tei bo sinioi tongu San ni nok ni borokno.

Hor wngkha jaribai kok sana hwnwi san a jora watwi bo tem tem nobar bo sip sip wasur henerwi walai nukhungo huprejak tongu,Jari noksingo saichung khenta o rokoui wansuk tongu em chini kwnwi ni bising pherlaimung tongu kwbangma. Nukhung hukung tei tongma chama bebak phasing chini hor bai sal hai. O jora san oi tamo khe tong hwnwi koktun kokduk twi rwi hokha Jari siliya, san call kwlaiwi tamo koktun kok phirog ya hwnwi Jari no swngphuru Jari- san khwnadi nwng bai ang le hor bai sal hai se, chwng chini thinang pohor wngna hinkhe chwng chini swrwngmungo soi kha ma kaichomnai. Nini ani swrwngmungo chini o kha phurlaima chini swrwngmung kuchuk kasanao chwngno kebengwi tongkha,chwng omo no swbaiwi ma rwlaisinai san. Jari nwng tamo samani abo, ano hamjakyata na. kubun chwla mankhwna ta na, ani sai kaham thangdi.. ako. Ang hai sitra rogno nwng ba boro pengjaksinai hamjaksinai swla.

Jari- san kisa wansukna chaitokdi ang nini Sai bo okra nwng chwrai ani sai, chini hoda o chwng gothoklaiya chwng no luku gosigwlak . Nwng chaya bwkhak ta wansukdi san chwng himwi tongmani lama chaya khu. Chwng tabuk swrwngna jora se. Nini nok ni borokrog nono kwrwng kolok kotor khe thinango nukna ni muchung jagu. Nwng hamya ta wansuk di.

San- Jari nwng atwi kok ta sadi twma kok nini, aswk khe rwngkha na, kok bokhiri kok khitar samarog ang siya Jari, khwnadi ang nono jesakhe phano hindi chalwi mangwlak. Ang nangkhe ani rwngnok yang kami ganao seoi phainai nakhe ang sorkari rwngnogo bangla phano pori tongphai sinai Jari nwng ang bai ta chal di ang nono karwi o kami yakarwi aro agulio kha kwrwi.

Jari- haire! tamo siya hai nwng sichasidi kisa, san nini ani kaham ni bagwi se sau ang. Nwng ano haino pogwi thangnai ta wanadi . Nwng nini swrwngmungo se kha rwdi.

San – ang phaiwi tongu a thaiyo phaidi.

Jari- boro ? Aswk hor rogo kiriya de nwng bui nukhe tamo sanai chwngno phaiya ang nwng bo nok ni ta kutul di haino se watwi tem tem.

San- nwng a thaio sokphaiya khe ang tini horpung aro no ainai! Ang iko sokphaikha phaidi!

Jari mungsa lama kwrwikha nokhorkha,chumui kosom tal koboljak watwi sek sek seker rwrwk no wngkha. Jari tal kisa chumui twi pohor pasamabaino lama nugui a thaio lam rwkha. San swkang no sokphaiwi nasikjak, somprom porom hakchaltwi Jari gana thangwi mwkhang sini rwrwk. A jora o watwi seker sugwi chumui urioi tal pirsarwk pirsarwk.

Jari- sadi tamo tini no paithak San kubui se ang sau, chini lama chaya khu chwng chini thinang no se nasikna Banta.

San – kaptwtwi oh! Nwng ano hamjakya ta na haini bagwi tini paithak hwnwi saoi tongu, haini bagwi ang puila kok surphuru bo ano nasikya kok phirogmung ehi mamang. Jari ang swmai tangu je nwng satwi ang wngnai please ano ta yakar di ang kwthang tongwlak.

Jari – San ta wandi ang nono chajakgwi no tongnai tophano baithangya khabai, nwng ta wanadi, ano nwng dati pogwi thangnai, o chwla kahamarog aswk kok khwnaya da wngba . Nono ang hamjakphano nono manya abo ang kaham khe saoi manu. Nwng ano hamjak phano nwng bo ano manya San. Luku no nasikdi gosiya borog. Ang bo gosiya chini baithang ni thinang no chwng chwnarwi tisana nangu, swrwngmung tabuk bwswk bataimung o aro chwng omo haikhe chokhwrai painai ble San omo ang muchungya nono tei ang.

San – ehi bui je sa sathun.

Jari- nini bai Ani kok o kami pungwi tongkha kok tete tata sajak tongkha nwng saimanya de. Nwng le chwrai chala ba koknaya ang le okra ang ma bujinai. Nini bai Ani wngwi ang se majra wngwi tongkha, ang teisa khe o kami ni norjak khe ang boro thangnai San? ani bagwi phano kisa wansuk sidi, ani le tei kebo kwrwi ang tongjamani ani thagu Nana buri chukhru kuru abo bo sori hamya borog no karwi ani tei kebo kwrwi. Ang o Kamini rwkhwlaijakhe ang boro tongnai nini le nukhung kupulung mungsani biyal ya, ani le nwng no nugui tongu kisa wansuk sidi ani bagwi. Jari kha ragwi tongphano mwktwi kwlaiwi swlwgwi kha khamwi kabtwtwi San no bujogo. San thopsa manina naiya.

San- Jari ang bo siu haiphano nwngbai ang chalwimanya tamo khapijakya buikhe chwngno, kaptwtwi Jari no nasigwi kabu . Hink chwng Tai malai liya, chwng Tai kok saliya , chwng Tai phatra khwlailiya hai da Jari, bwkha kwrak bwrwi twtwi nwng. San kap twtwi kok thakya ,o tal kwchang hor no bahai khe poknai Jari nono, o thai no bahai khe poknai ang o horno, sarik,phung no. Ang nono muitu mankhe bahai khe tongnai ? Kaptwtwi swlwkma chajak nok bai kisa kwchal ba kebo khwna liya hor kuthugo.

Jari – Bandi twtwi.San chwla naithok ta kapsidi,kabwi mwchangya hahaha,ta kapdi hwnwi yak romwi, Naidi o tal tongu chwngno nasigwi o boyar sip sip hapar bo chwng no nasigwi khakamjaknai kha, ta wanadi borog tongu chini bagwi ano je phuru muitu manu borog bai gwdalwi tongdi, kok sadi. Aswkbaino ang bo khwna howanw, tini ni hai jora o muitu nono mankhe nono borog koktunanw.Ta wandi chwng chini lama chwng sogwina nangnai nwng bo kaham khe swrwngwi kolok kotor wngdi kaham kwrwng tongdi ang bo chaitoganw.

San mwktwi hui nwng belai kok kwrwng. Jari – kisa mwnwiwi San ni yak romwi kwnwi no tal pirjak athukiri chwngkhurpjago watwi dopsa thakdrp ni boyar sibwi tongphuru, jari tini no paithak hor chini o kothoma no kwthang tonai sanai o habar o hapar kwchang norog se chini kwnwini lama tini ni simi lam juda himsinai, chini hamjakma no kwthang norog twi dulwi tondi paitahk tini ni o hor kuthugo kwnwi no khakamsere re nokha no nasigwi.