KOKBOROK KOTHOMA BWSANI LAIBUMA || HISTORY OF KOKBOROK SHORT STORY

KOKBOROK KOTHOMA BWSANI LAIBUMA BY BIKASH DEBBARMA || 20TH MAY 2020

Kokborok kokrwbaini laibumano rwgwi naikhe kothoma bwsa swijakmani balukthayakho hinwi sawi mano. Kokborok kokrwbaini haparo kothoma bwsani laibumao puila swimung rwnai wngkha Radhamohan Thakur. Bo bai swijak Radha kothoma bwsa chichuku ra bisini puila bwkhakno swijakkha hwnwi sawi mankha. Phiyaba bini o Radha kothoma bwsao kothoma bwsani soi soi goron nukjakliya. Aboni bagwi obono puila kokborok kokrwbaini kothoma bwsa hwnwi khurchajakliya. Kokborok kothoma bwsani laibumano khurchana thangkhe swikrwng Nagendra Jamatia bai swijak Hathairai kothoma bwsa 1973 Ingraji bisio swijakkha. Kokborokni puila kothoma bijap wngkha Hathai. O bijap karijakkha 1978 bisio oro thaibrwi (4) kothoma bwsa achukthai mankha. Aborog wngkha- Hathairai, Athukrai, Homchang tei Shilpi. Bini ulo kothoma bwsano twiwi swimung rwkha swikrwng Shyamlal Debbarma. Bo bai swijak Dundrukma (1984), komthingwi karijak Adong (1987). Adong o khorokchar swinairogni kaichar achukthai mankha. Swikwrwng Haripada Debbarma bai swijak Elemni bibi (1989) oro jotoi kaichar kothoma bwsa tongo. Ulnwi bijap wngkha Jalai Tokpupu (2000) bisio. Oro kaichinwi kothoma bwsano twiwi swijak o bijap kwbangma luku hamjakmung mankha. Swikrwng Binoy Debbarma bai swijak  Nakhwrai (1989) o bijabo jotoi kaiba kothoma bwsa tongo. 

Swikrwng Nagendra Jamatia bai swijak Bolong (1993) bisio swiwi karijago. Bini ulo swikwrwng Sudhanya Tripura 1999 bisio Dongor Kamini Ochai mungwi kothoma bwsa bijap swiwi karikha. Aro jotoi kaichuku kothoma bwsa tongo. Sunil Debbarma bai swijak 1996  bisio Bolongni Khum kothoma bwsanono 2000 bisio taisa karijakmano Busu mung riwi karijakkha. Bini tei kangsa bijap Jorani bwthai 2012 bisio karijakkha. Aro jotoi thaichibrwi kothoma bwsa tongo. Snemoy Roy Choudhury bai swiwi karijak Biyal (1999). A bijabo kaichi kothoma bwsa tongo. Kunja Bihari Debbarma bai swijak Basulam (2001). Oro bebagwi kaichuku kothoma bwsa tongo. Ulnwi swijak bijap  Mo Salni Pohor (2003) kaichar kothoma bwsano twiwi karijakkha. Dr. Atul Debbarma bai swijak Toksa Tiyari (2004). Oro bebagwi kaichisa kothoma bwsa tongo. Bini ulnwi bijapni mung wngkha Toksa Hakaya (2006) bisio. O bijabo jotoi kaichisa kothoma bwsa swijak tongo. Rabindra Kishor Debbarma bai swijak Hachukni Muktwi 2002 bisio kaichi kothoma bwsa bai swiwi karijak. Rebati Debbarma bai Holong Beserni Khum mungwi 2002 bisio. Oro kaichinwi kothoma bwsa tongo. Mangal Debbarma bai swijak  Holongni Khum bijabo bebagwi kaithamchinwi (32) kothoma bwsa tongo 2008 bisio swiwi karijak. Utpal Debbarma bai swijak Dwlwng bijap 2010 bisio karijago. Oro kaiba kothoma bwsa achukthai mankha.

Khamao taisa kahamkhe rwgwi phunukjakha⬇

KOKBOROK KOTHOMA BWSA 

Dundurukma

Shyamlal Debbarma bai swijak Dundurukma kothoma bwsa 1984 bisio swi karijakha. Bini o bijabo chinwi(12) kothoma bwsa tongo. Bini o bijapni kothoma bwsa dukho birman manjakmani kokrogno twiwi swijak. 

Swinaini o kothoma bwsa bijap belaino nangmani agini jorani kokrogno muito mano eba muitubo khwlai rio. Bini bijaprog pori naikhe belaino kuthuk wansukmung kokthairog thepawi swijak. Bobai swijak kothoma bwsa bijapni kothoma kaisa wngkha Hatal Ransama Mol. Hachuk kami amchaio tongnai boisnob tongtharno twi swijak. A jaga teibo tongo Natun shakti hinwi kaisa chongjak raida tongo. Aboni bagwi kamon das a prothano maniwi khoroksa bihik tongwi phano tei khoroksa bihik songwi tubukha. Abohai raida chayarogno mokol kwphajakya wngwi swikwrwng Shyamlal Debbarma o kothoma bwsa swiwi kok kwcharna naikha.

Adong

Shyamlal Debbarma bai swijak tei kangsa kothoma bwsa bijap Adong 1987 bisio swi karijago. Bini o bijabo khorok char swinairogni kothoma bwsa tongo. Swinaini o bijap agini jorani kokrogno muito khwlai swijak. Jora kaisa chini borok dophao kaijak phuru manwirog rohorjakya bwrwirogno, kaisa abohai jora tongmani bwrwirogno chwlarog manwi rwna nangmani. Bini o bijapni kaisa kothoma bwsa wngkha Jibon debbarma bai swijak ‘Pon’ kothoma bwsao abohai agini kokrogno chwng nugwi mano. Bini kothomao Ratan mungwi khoroksa nayakni khuktwi hodani o raida chayarog wngmani abono mwthaknani kok sakha. Tei kaisa kothoma bwsa tongo ‘Lam Kaham Naitukma’ Rabindra Kishore Debbarma bai swijak kothoma bwsa aro nugwi mano jora kaisao bolongni borok hinwi lukurogno bwswk satok pitok haiyakhe butok khwlaimani aborogno twiwi swijak bini o kothoma bwsa.

Elemni bibi

Haripad Debbarma bai swijak o kothoma bwsa. 1986 bisio bini o kothoma bwsa bijap karijako. Swinaini o bijabo kaichar(8) kothoma bwsa tongo. Haripada Debbarmani swimung aswk bangya phano kothoma bwsa swimabai kokrwbaini haparo belaino munggwnang wngwi sinimung manwi tongo.

Jalai Tokpupu

Haripada Debbarma bai swijak tei kangsa bijap wngkha ‘Jalai Tokpupu’ 2000 bisio karijakha. Bini o bijabo jotoi chinwi(12) kothoma bwsa tongo. Jalai Tokpupu kothoma bwsao agini jorani kokno khursai kami amchaini mangpilino tisai phunukha. Swinaini tei kaisa kothoma bwsa tongo aboni mung wngkha ‘Radha Salsni Kwmakha’ Bini o kothoma bwsao bihik bwsai kwrwi sini tei kubunni borokbai thangmani kokno twiwi swijak. O kothoma bwsao sana thangkhe agini bai tabukni pherlaima nukyano hinwi mano. 

Nakhrai

Swikwrwng Binoy debbarma bai swijak ‘Nakhrai’ kothoma bwsa bijap 1989 bisio swi karijakha. Aro jotoi chisa(11) kothoma bwsa tongo. Swinaini o kothoma bwsa bijapno porinaikhe sai mano bini swimungrog belaino nangkukmani kokrog chini hodao je wngwi tongmarogno khursai phunukna naimani. Binoy Debbarma bai swijak kaisa kothoma bwsa Nakhraini bisingtwi hodao khoroksa cherai buma bupha kwrwi wngwi bwswk derao kwlaina nang abono tisai phunukna naijakha.

Bolong

Puila kokborok kokrwbaio kothoma bwsa swimung rwnai Nagendra Jamatia bai swijak tei kangsa bijap ‘Bolong’ kothoma bwsa bini o bijap 1993 bisio swiwi karijako. Bolong kothoma swimungni bisingtwi hachuk kami achaio tongnai kwchwng rwngmari gwnang phano kwbangma baniyani lamabai himani nukjago, swinai aborogno bini kothoma bwsao tisai phunukkha.

Bolongni khum

Sunil debbarma bai swijak kaisa kothoma bwsa bijapni mung wngkha ‘Bolongni khum’ bini a swimung 1996 bisio karijakha. Bini o kothoma bwsa bijabo 12 chinwi kothoma bwsa tongo.

Jorani bwthai

Swikwrwng Sunil Debbarma bai swijak tei kangsa kothoma bwsa bijapni mung wngkha ‘Jorani bwthai’ 2012 bisio karijakha. Kothoma bwsani goronno dukhu kupulung borokrogno twiwi sajak kothoma. Kothoma bwsani goron rwgwi naikhe abotwi dukho bwsa bwsa naitugwi kothoma goron rwnani swikwrwng Sunil Debbarma belaino kwrwng. Hodanibo bwrwi siklini bwkhao bobotwi dukhu bwsa bwsa chop jagwi tong eba bo randijwkma bubotwi jwngjalni bisingtwi langma twi tong abotwirogni phwlang phwlang sampli romui tisao bini kothoma bwsarogni bisingtwi.

Busu

 Sunil debbarmani tei kangsa kothoma bwsa bijapni mung wngkha ‘Busu’ bini o bijap 2000 bisio karijakha. Bini o kothoma bwsa bijabo 10 kaichi kothoma bwsa tongo. Bini o kothoma bwsa bijabo hodao eba kami amchairogo mwnak puito chamung bai kubulwi bwtharlai mani kokrogno twiwi swijak.

Basulam

Swinai Kunjabihari Debbarma bai swijak ‘Basulam’ kothoma bwsa 2001 bisio karijakha. Bini kothoma bwsa bijabo 9 kaichuku kothoma bwsa achuk thai mankha.

Mo salni pohor

Kunjabihari Debbarma bai swijak tei kangsa kothoma bwsa bijapni mung wngkha ‘Mo Salni pohor’ 2003 bisio karijago. Aro jotoi 8 kaichar kothoma bwsa thai mankha.

Toksa tiyari 

Dr Atul Debbarma bai swijak kothoma bwsa bijapni mung wngkha ‘Toksa Tiyari’ 2004 bisio karijakha. Aro 11 kaichisa kothoma bwsa nugwi mankha. Bini o kothoma bwsa bijap bolongni borokrogni tongmung chamungno rwgwi swijak.

Toksa hakaya

Swikwrwng Dr Atul Debbarma khoroksa hodano hamjaknai wngwi tei kangsa kothoma bwsa bijap swimani wngkha ‘Toksa hakaya’ 2006 bisi bini o bijap karijako. Aro jotoi 11 kaichisa kothoma bwsa thai mankha. Bini o kothoma bwsa bijap hodao wngwi tongmani tei kubui dophabai thairog sekjakmani kokrogno romwi tasai phunuknani chaitokha lukurokni mokol bwskango.

Nasinganw

Utpal Debbarmabo kokborokno hamjagwi kaisa kothoma bwsa bijap swikha aboni mung wngkha ‘Nasinganw’ 2015 bisio karijakha TTAADC Language Wing bai.

                                    Check & Analysis

Reference

1. Debbarma, Haripada. 2015. Jalai Tokpupu. Agartala: Hachukni khorang.

2. Dev varma, Naresh Chandra. Januay 2010. Kokborok Sahityer Kramabikash Agartala: Nabachandana prakashani.

3. Debbarma, Rabindra kishore. 2013. Kokborok Kokrwbaini Rukungo. Agartala: Jora Publications.

4. Dev varma, Naresh Chandra. January 2014. Kokborok Kokrwbai. Agartala: Akshar Publications.

5. Choudhury, Kumud kundu, 1999. Kokborok Bhasa u Sahitya. Agartala: Akshar Publications.

6. Debbarma, Haripada. 2000. Jalai Tokpupu. Agartala: Hachukni Khorang Publishers.

7. Debbarma, Ratan. 19th January 2016. Jalai Tokpupu Kothoma bwsa Tai Haripada Debbarma. Kherengbar.