SINIYA NWNG ANO || KOKLOP || Kashmir Debbarma

• SINIYA NWNG ANO || KOKLOP || Kashmir Debbarma

Ani laibuma kubui kothoma
Rangchakni hathaio—
Swijak dongoima dongoiphani bumung
Nokuchugo chuchuni bumung
Ani bosong, sandai luku sinimung
Rangchakni satwrai hoku swlago
Kusungre kusung.

Ani hukumu mari
Chokha yakhotom rikari
Rignai risani bumul bwthai
Hayungo mwnwijak, himjak
Bosongni bukung torjak.
Chini sakhai, thwitharo
Kokborok kokni goron
Chwng bai chwngno sinio.
Hatalni muipele wasung gudok
Chaui phan kwtal khaui
Tang pakwla tangwi
Hachwk muphuno chwngno.

Siniya nwng ano —
Ani laibuma khorok kuchuk
Bubagra bosongni thwiduk
Yaphang yarwngni buchuk.
Ani sinimung tongo-
Khumpui bosongni tolao
Kherengbar hathaini khurio
Hapung thaisini twibuk buksini
Barwi motomnai bahaio
Kobonwi tongjak nobaro!

Ani bebak tongo
Twima twisa hapung hathai
Tongo anibo manthai sokthai.
Ta musudi nwng ano
Ani tongma kami hachwk
Twikhereng tiyari buchuk
Kamichang hathai yalwk
Abo jotono ani chuchuni
Ano kwlangma mukumu mari.