~ Andrew Debbarma
20 September, 2019, Phasal (Friday). Sarik brumo lamao chwng berai laima haino ang bicycle bai khe beraina thango sarik sal twilwlwk jorao. Tusharni nogo puila ang thango. Bo bai kwmwino chwng lamao bicycle chalogwi berai tong laio. Nokha chakrorom, sal hapung kotono huijak kha. A jorao belai kheno tongthogo. Kamio chwla sikla bwrwi siklirokbo bodol bodol khe berai laio. Kubuino a sal tei a jorarokno muitu man khe, tei uaisa a jorao kiphilwi thangna muchungo. Aphuru Tushar ano sao, ‘Mama Andrew, tini belai tongthokma hai ma tongo na?’
‘Ih,’ ang kok yachagwi bini kokno manjuwi saphiro, ‘Omo hai tongthokma sal mang sal brum brum khlai tonina muchungo.’
Waririk khai Tushar sao, ‘Ani nokni mamani khai tini hai sal teibo tongthokni sal se.’
— ‘Tamoni bagwi?’
— ‘Tubujak bwle.’
— ‘Tamono?’
— ‘Nwng sai man ya kho diba?’
— ‘Ihi.’
‘Tini mama Ranjit bwrwi kwtal tubuwi phai kha,’ khatungjak tei tongthokjak khe waririk wngwi Tushar saklaio, ‘Him di ta nwngbo bwrwi kwtal nai lang di.’
‘Do nai lai anw ulo rogo, bwrwi kwtalba biyang khar thangnani, haiya diba?’
‘Au kokto soino,’ bo saphiro, ‘Kubuino mama Andrew ang mobile-o rwchapmung kwtal kwtal download khlai kha bwle. Phaidi gan khwna lai twtwi bicycle chalogwi berai lai anw.’
Chwng mobileni rwchapmung khwnauino berai lai tong kha. Phiyaba a jorao Tusharni phone o kaisa siniya number bai call sok phaio. A number rejected o khiklaijak (blocked list sajak). Ang Tusharno swngo, ‘Saboni number obo Tushar? Tamoni block list rwjak sa?’
Tushar phirokmung rwo, ‘Uma, call back ta khlai di aro. Abo problem tongo.’
Ang bini kokno buji man ya kho. Ang bujimabo judano bujio. Ang kisa mwnwiwi hwno, ‘Nwng buda line juda wng tong kha Tushar? Omo le nini girlfriend ni number se wng khwna do, nini parents ni swkango call phaina kiriui reject khiklai toni khwna ta—’
‘Ani girlfriend ya, kobor da?’
Chwng rwchapmung khwnaui mar khaino tongthogwino tong lai kho. Phiya a number bai call uaire uai phaiwi mang tongo. Aboni bagwi rwchapmung khwnanani kebengmung wng kha. Aphuru khe ang Tusharno saphiro, ‘O Tushar, o number belai khe chwngno gan khwnannani distrub khwlai kha. Hi, nwng kok salaiwi pai gwradi nini girlfriend bai.’
Khorang kisa kotor khe Tushar hino, ‘Ihi, o number-o call ta khlai di.’
‘Tamo wng ba?’
‘Nwng saui se manya kho!’
‘Sadi ta—What’s the problem?’
‘O call yachak khe bwswk khai kutukjakno nwng saui da man?’ Tushar belai serious khe kok phirogo. ‘Ang jala wng sugwi se o numberno reject-o ma khiklai sio.’
‘Do akon saui khwna ridi—’
Tushar sao, ‘Mami ano sao, o number-o call-bo ta khlai di, phiya tabo ta yachak di. Bo chini nogo kharwi phaijak. Bini bwtasong bono jokhom khai satok phun, bu-tok khlai phu. Tento soi man suk liya wngwi bo chini nogo kharwi ma phai kha ta.’
A mami hwnjaknai sabo ang aphuru phano romwi manya kho. Tushar-songni jaiti khoroksa swk se wng khwna hinwi bwkhao kha kao. Hakhe a kokno aswk sai mannani thang yaui teisa rwchapmung khwna phiukha. Phiya haino hai a number ni calling phai mang tongo uaire uai. Aphuru khe ang Tusharno sao, ‘Che, ang joli suk kha do! Oi Tushar, nwng huda-hudi tamoni nini mobile-o omo hai khe distrub khlaijagwi ma tong? Nwng saui ri manya da o number-o call ta khlai sidi hinwi. Nwng kok paiwi ridi, kok paiwi riya khe o number nono distrub khlai mang tongnai.’
Tushar bukhuk mochomwi kisa wansugo. Tei sao, ‘Au, sal brum omo hai khe ani mobile-o distrub khlaijakmani slai, call khlaiwi kaham khe saui jala wng ya khe tongmanino chao tite. Do akon mama Andrew, nwng le kisa kok kwrwng ba, nwngno kisa call khlaiwi sahor risidi..’
Tusharni dagimung manwi logi-logino ang a number-o call khlaio. Phiya ani call manwi a borokbo logilogino call yachagwi kabsi-kungsi khe sahoro, ‘Ani bihik yakni mathiarok bokhogwi nokni nongkhorwi thangmani nini nogo da wng kha takhuk?’
A bising bising jolijakma phunugwi Tushar ano sao, ‘Ihi o borok tatal se sao. Bo bini bwsai ya, bini bwta se. Bahanokjwkno naharna bagwi tatal kok saui tongo morasa.’
Ang Tusharni kokno kubui hinwi wansugwi a borokno kisa tatal saui samlokna naima bai a borokno kok phirokmung rwo, ‘Khwna di dara, ang nini bihikno sini ya. A bwrwi ani mobile naui nwng bai kok sana hino, abagwi se ang sario. Phiya bo tabuk boro thang kha ang saui manya.’
‘Nwng khe boroni wng kha takhuk?’ kabtwtwi a borok swngo.
Phiya Tusharni kok bai ang ani soi nikuma sana nai liya. Haino hai ang tatal kok sahoro, ‘Ang Mandwini borok se dara.’
Ang ahai saphano a borok teibo kabwi saui tongo, ‘Naidi kuya, a bwrwi se norokno tatal kok saui khwna. Ang norokno tatal sajaya. Ano puitu khwlai jadi kuya. Bo yakni mathiarok swbaiwi, bwsa khoroknwino khibi kwlangwi nokni nongkhorwi thango. Mungiakamio saboni jani kailai panda thangna saui nokni nongkhorwi thango. Ang Ambasani borok. Jodino Ani bihik norokni arono hwn khe ano kubui kok sajadi.’
Tusharni kok bai ang a borokno puitu khwlai manya wng tongmani. Haiphano bini kabmanirokno khwnaui ang bono khairokjak kha. Aboni ulo a borokni bubachwisongbo kok sahor laio ano. Aphuru khe teibo ang puitu chakha. Ang borogno sakha, ‘Akon norok ta wana khusi. Tumungno norok kubui wngwi tong khe, kubuini bwkhago hwn khe, ang noroni logi tongo; ang norokni bagwi tamo khlai man nai yanw. Haiphano norok a mobile-o call ta khlai phidi, angno norokno call khlai phinai.’
Aswk kok sauino ang call tanwi rio. Tai ang Tusharno kaham khe bujogwi sao a bororokni kokbo kubui wngwi mano hinwi. Tusharni mama Ranjit bwrwi tubumani abo sikli yana hinwi ang Tusharno bujogo. Aphuru se Tusharni khugo khwnao, ‘Au, mama Andrew, naiwi nai khe bwsa masa maknwini buma-nono sol tongo.’
Ang sakha, ‘Thang di nwng nini daino o kokrok kaham khe saui khwna ridi. Sabo tatal tei sabo kubui chwng romna nangnai.’
Aboni ulo chwng kak laiwi ang nogo kiphil kha. A horo ang saichung saichung wansugwi naio, tei kha bising bising kok sao, “O bwsai hwnjaknai soino bwsai wng khwna. A bwrwino Tushar-songno tatal sa khwna. Tabukni jorao koktwmao omo twi mang nugwibo tongo. Kaijakrok se tabuk bwsa bwtwi khibiui khar lai phu. Khwna ang teibo kaham khe Tusharno swngwi ma nainai. Kaham khe wansugwi ang o samungno ma khlainai; aphuru saui mannai sabo tatal, sabo kubui.”
Teini salo, 21 September 2019 (Saturday eba Chasal). Phung aisirisiri 4 AM ni simino ang morning walk khwlaina hinwi swkang Tusharni nogo thango. Hakhe morning walk khwlailaio. Ulo dara Karanbo phaio. Morning walk khwlailai twtwino ang Tusharno kwchang kwchang khe swng phiro, ‘Kubuino Tushar nwng ano sala, a bwrwi nini mama Ranjit bai kharwi phainai bo yada?’
‘Ih, a bwrwino,’ Tushar saklaio. Bo saui thango, ‘Agi bini bwtasong bono khoroksa chwla bai kaina naimani pho. Haiphano mami khai a chwlano hamjakya hinta. Abose mamino mama bai kok samani manjagwi bukha phun, tamni swkangni chwla bai hamjakya hinwi. Abono mami le mamano se hamjago hwn khe mama bai kharwi phaikha hinta. A bwtasong khe tabuk police station-rogo se thang laina hin tong pho.’
‘Haikhai bohrok nono Tai call da khlai phikho?’ Ang swngo.
‘Thank you mama Andrew. Nwng borogno call khlaiwi saphuruni simi borog tabuk sak jora call khlaiya kho,’ Tushar khasrangjagwi kok phirokmung rwo.
Ang saphikha, ‘Tubudi mobile, ang call khlai naigwrana.’
‘Ihi, bejal kagwi tongmani jorao ya,—call ta khlai phisidi.’
Ang khorang twrwk khe saphiro, ‘Khwna di Tushar, ang norokni kahamni bagwino sao; tumungno borog police station-rogo thang khe ulo noroknino problem wng mano. Abono dakti problem solve khlai paidi.’
Ang bai ahai khe sajagwi Tushar kisa wansugo tei bo sakha, ‘Call khlai nwngno salai di akon.’
Aphuru khe ang call khlaio a borokno. Bo call yachak kheno ang bono swngo, ‘Dara, ang nono kok swngnai. Tumungno nini kok kubui hwn khe ang nono chubanai, tei ang nono khairogo. Haiphano ang nonobo puitu khlai sugwi man ya wngmani bagwi, tumungno abo nini bihikno wngwi tong khe bahai khe nwng prove riui manno?’
‘Nwng ani kokno bisas thang ya hwn khe ani chwrai bai phano kok salai naidi kuya.’
Ang bini bwsarok baibo kok salai kha. Aphuru khe ani khaobo khairokma teibo phaio. O chwrairokbo kabwi bumano rutuk laijao. Ang bono swng phiro, ‘Akon dara, nwng nini bihikno kami thangwi bono rutuk kha da?’
‘Ihi, ang ani bihikni kamio se tongo,’ bo kok yachago, ‘Nwng puitu chaya khe ani bwkrajwk baibo kok salai naidi.’
‘Do akon, saridi ta—’
Bo ano bini bwkrajwk baibo kok sario. Phiya borog khe ano se a bwrwino tubunai chwla hinwi wansuk lai tongo. Yang le ang khe borogno chubana bagwi se aswk nang-nang wngwi tongo. Paithago ang borog bwswk jora twi kubui sininani bagwi swngphiro, ‘Norokni thani marriage certificate da tong?’
‘Tongo,’ bwsai kok yachago.
‘Ano whatsapp twi rohorwi da mano?’
‘Ih mano, kuya.’
‘O bwrwino kaijak se hinwi saui mannani bagwi bini sindur phuljak photo khe tongo da sla?’
‘Tongo.’
‘Rohor di jotono,’ ang borogno khao khakchangma kisa swk rwui manna twi khe khatungma phunwi saphiro, ‘Ta wana di, nini bihik boro tong ang saui mano. Haiphano puila nwng kubuino ma phunuknai. Tumungno nwng kubui hwn khe nini bagwi ang tongo. Nono ang chubanai.’
Phiya kha yokjak sugwi kab twtwi bwsai sao, ‘Kuya, ani bihik bai ano tabuk kok sariui da mano? Ani bihik bai kok ma sakhe, bini khorang khwna khe simi se ani khao kisa sak khakchangma mannanw.’
Aphuru khe ang kubui koknono khengwi rwkha, ‘O bwrwino khar rwui tubunai ang ya. Chini parani chwla se tubuwi phaio. Phiya ang nini logio tongo, nini bihik bai nono tei waisa malai rwnani chaitok ganw. Ano simi bejalo ta khiklai di ta.’
‘Angbo nono bisas khlaiwi manya a khar rwnai chwlaya hinwi.’
Khorang kwchang bai ang saphiro, ‘Kaitorni mungwi ang nono sao, ano puitu khwlai di.’
‘Do akon Kuya, nwngno ano chubaja sidi.’
A borok bai kok sabai khe ang Tusharno kaham khe bujogwi sao. Aphuru khe Tushar ani kokno puitu khlaio. Chwng kokduk manjuwi kok salaimarok bebakno recording khlaiwi narwgo ang. A recoding samungo chuknai hinwi ang wansugo. Chwng kaklaina phuru Tusharno ang teibo sakha a recoding bini chuchuno khwna ridi hinwi. Ang nogo phaiwi a borokni bagwi surio. 10:35 AM jorao ang Tusharno bahai wng laikha swngna bagwi phone khwlaio. Phiya bini bupha, kumui Dulal se phone yachago. Ang kumui Dulalno phano ma swng kha bahai wng laikha hinwi. Kumui Dulal mwnwiwi kok kiphilo, ‘A bwrwi tatal manjak kha ta, tai tamo sa—ang bwsai baibo kok salai kha. Whatsapp twibo joto prove rwi rohor baikha, borog kaijakmani photo tei marriage certificate akorok. Tabuk a bwrwino twlang phaina bagwi borok sok phai tong kha.’
Aboni ulo khe ang a bwsaino phone khlaiwi swng phikha. Aphuru bwsai khatungjagwi kok phirokmung rwkha, ‘Hambai kuya nono. Nwng kwrwi hwn khe ani bihikno ang rutugwi man glak khamo. Nini chubamung manwi ang ani bihikno rutugwi man kha.’