Talyung talni prapjak salo
Nokha mwnwio khrangsawi
Sereksa nobar nagkhe sago
Telekar thango kolomtwi.
Oro-iro tongthaini biyal
Sakolom thaih haichuma huijak
O sal o sal —-
Nwngba tamoswk mwnwijak?
Soiliya nini tungpramabai
Ih mechenjakha nwngbai.
Khairokjadi kisa, riwanw yakpai
Nukyade o haa ni bwsarog
Bwswksi mwktwi bai kungtwibai
Kapjak swlwk-swlwgwi.
Nini mwnwimao
Khorok tungphlao
Ri kwrwi sago
Bwsak khamprao,
Riwanw je-tong kwrwi
Koijao! risidi nokha somrwi
Watwi sikla dopsa warwi
Haa bahai motom sarwi.
Sal moksakha odilasawi
Achumsa pherang khorang
Iyang salthang babai bwkhak
Nokhasom bo khaprumjak
Khorang bo gorong-gorong.
Twijwlangni twi phab-kwsariwi
O sal chwngno khairokjakha
Puila watwini thop kwlaikha
Ih ani sago kwlaiphaikha.
O haa ni bwsarog bwkha-changjakha
Nobarbai pherangbai
Watwi sikla waphlai tongkha,
Haati sa wngkha thangna soiya.
Tobisawi kakjaya birman
O dophani borokrogni
Bera nog kichik , nukhung kwpwla
Watwi siprakjak, twi-thop kwlaijak
Amani mwktwi watwibai huijak.
Tei salbwswk
Tei talbwswk
Tei bisibwswk
Tei molbwswk tongkhu?
Yakaknai joto birmanni
O haa ni joto borokrogni.
Aichukni aitorma chwngkhrop tongphru
Takhuk bising tongtwi
Togwla koichik riphuru
Salkabai sal chaksawi
Phungchang lamsokphru
O jorahai tongthok twilwlwk
Toksa-tokrogni chi-cha khorang
Haphar bai mwchangjak
O tongnaithok mannai buphuru?
Sal mwnwio dipor bakhwlaiyasak
Watwi wabaya nokha phuryasak
Tungkhe bo birman
Uakhe bo birman,
Swbani swraimungba nangwi
O dophani kwbangkuk borokrog
Tongna nangkha salbrum kabwi.
Watwi sikla salchangrio
Lamsogo bwkhabai bono
Tongna nangbo siprakjagwi
Watwi bising-bising.
Pherang gurumsai kokbo
Lamsogo bwkhabai bono
Bolong motomu muikhumu perwi
Hathai kitingwi.
Nobar kotor phai bo
Lamsogo bwkhabai bono
Kwlango buphang-uaphang swbawi
Mano kisale thapani bol.
Sal-prapsai mwnwi tongbo
Lamsogo bwkhabai bono
Tongna nangbo kolomwi
Sal kwrwikhe, mwnak wngkhamo.
Hayung kotoro haphar naithogo
O Tiprahaa ni bwsarog
Biraman-kakganw salsaya-salsa,
Mwktwi hujaganw
Holongni nog tangjaganw
Cha-nwng kaham chawanw
Ri-chum kaham chumanw
Khumbar naithoktwi chwnawi tonganw.
Khaksa babai uarik-khirik
O dophani borokno nugwi—-
Chongo bolongni bwthai chanai rogbai,
Ih! chao chwng, thai-kumun
Bolongni kwtwi-kothok bwthai
O bwthaio no tongo bithi-brai.
Norogni mwnwimabai siya wngwlak
Thansa ni phano swbai mangwlak,
Norog mwnwima
Bukhuk supjaknai suchi-kotor bai.
Jora chwngkhiri nasingjak
Chini hama tabukbo tongkhu
Ulo bo tongwino thangnai.
O haao no, ih Tiprahaa o noh
Saracharchibrwi bubagra tonglangkha,
Haiphano kung-kuchuk hwnjakha
Tangwi hwnmale?
O haani ama-apha cherai-sikla jotono
Naikol-langliya kahamkhe
Horlangliya pojarog kahamkhe
Tongna nangkha bebak
Bolong besero, hathai kesebo.
Yakhili kwbai swnamjakliya
Chini ari-rog sekjakma thakliya
Sekjakte-sekjakte ari sukurukjakha
Chini haa mwktwi yorjak
Buini yapha tolao kaphikjakmabai.
O dophani thinangni chatirog
O dophani bekereng hwnjaknairog
Phaidi-phaisidi thansani phanbai
Baksa wnglaiwi chwng ari khalainai,
Sekjakyatwi busu berabai.
Watwi sikla wama thakgwlak
Haa pekhokma kebo sigwlak
Jorabai baksa himna ringwlak
Tabukno jora–
Tabuk khayakhe ulo tongwlak.
Views Today : 27
Views Last 7 days : 502
Total views : 58027