Purna Chandra Debbarmani sinimung, swimung tei wansukmung

Kukcha: – Purna Chandra Debbarmani sinimung: – Kokborok kokrwbaino hamjagwi rwbaiwi tongnairokni bisingo khoroksa wngkha borom gwnang Purna Chandra Debbarma. Swikwrwng Purna Chandra Debbarma wngkha Kokborokni puila kokrwbai bwlai “Ktal Kothoma” karijakma jorani khoroksa swiwkwrwng. Abawi Kokborok kokrwbaini haparo swikwrwng Purna Chandra Debbarmani mung belaikhai khursathai kwlaio. Swikwrwng Purna Chandra Debbarma 1937 ingreji bisini 12^th may talo omthai thwi kwlaio. Boni omthai thwi kwlaima thai wngkha salthang Tripura hangkhorni Jonmejoynagar amchaini Radhapurni Baidya kamio. Bo rwngnokni phwrwngnai bokhorok wnglangkha. Bo koklop swikwrwng hinwino sinijak-kugu.

Swimung tei swimungni haparo yapiri: – swiwkrwng Purna Chandra Debbarma 1957 ingreji bisio puila koklop thaisa swio abo wngkha “Achaima sal” mungwi. Aboni swkang bo rwngnokni “Wall Magazine” ni kok wanjwibai swijak kokloprokno kokphilwi kokborokbai swio. Swikwrwng Purna Chandra Debbarma swikwrwng Rabindranath Thakurni koklop bwchap ‘sonar tori’ no kokborokbai kokphilwi swikha. Abono karwi swikiwrwng Kalidas-ni ‘meghdoot’ no bo kokborokbai kokphilwi swikha bo. Boni kokloprok 1983 bisio ‘Lama’ Koktwma bwlai rogo phiyokjakkha. Kokborok bijap karina bagwi songchajak hachukni khorang publications-bai gwdaljak tongmani bo.

Abono karwi boni swimungrok wngkha “Wansukma” tei “Swmai” koklop. O kokloprok 2009 bisio swikwrwng Binoy Debbarma-bai chabjak ‘An Anthology of kokborok poems’ bijap ‘Language wing, education Department TTAADC, khumulwng , Tripura bai karijagu.

Wansokmung eba Naharmung: – Swikwrwng Purna Chandra Debbarma habar, hoda tei luku raidani tonggwrwngno wansogwi swinai. Boni swimungrogo chini hani luku tonggwrwng, habar, tiprasa hodani laithangjak jorani mangpilini kokno khursai swimani nukjago. Tei boni swimungrogo habarno, lukurokno, hoda dophano tei laibumano hamjaknani kokno kuthuk wansokmung twi swijak. Aboni bagwi swikwrwng boni koklop rogo simalwng, dangwima dangwipha, musuk mwrwkmwng, khumpui, Dongor, Tripura raijya, songduk akorokno twi lobwi swimani nukjago.

2009 bisio swikwrwng Binoy Debbarma bai chabwi karijak “An Anthology of Kokborok Poems” o bijabo “Wansukmung” mungwi boni o koklop soinu kuthuk wansukmungbai swijak. O koklobo habarni tonggwrwng, chini luku bosongni tonggwrwng tei hoda dophani laibumani kokno kuthuk wansukmungbai swijak. O koklopni bisingtwi boni wansukmungno khamao sikadropkhe swi phunukjakkha-

              Sarik sal thangkha sal habna naikha

              Satung thwigwtwi wngkha.

              Khumu yongkhaji giringswi phaikha

              Haba karnani wngkha. 

Sakhani o kokbwtangni bisingtwi saimanu swinai habarni raida tei jorani kokno khursai sana naio. o kokbwtang bisingtwi sarik sal thangma jorani kokno sakha tei o jorao samung tangnairok haba karwi nogo kiphilma kokno sakha. Jora keboni bagwi naisingya wngmatwi sal phaio thango. Jorani bisingnu bebak khwlaimug khwlai narwknanani kokno sana naio swinai.

              Twima rukungni bwrwiphang tola

              Simalwng kotor tongo,

              Chini Dangwima chini Dangwipha

              Aro bulaiwi tongo.

O kokbwtangni bisingtwi swinai chini luku bosong tei laibumani kokno khursai sana naikha. Chini Dangwima dangwipha ni kokno muito khwlai chini laithangjak jorani kokno chwngno muito khwlai rio. O swimung bisingtwi laibumano hamjakmani kokno sawi mano.

Abono karwi o bijapni tei tangsa boni koklop “Swmai” kuthuk wansukmung tei naharmungno wansogwi swijak. Swikwrwng Purna Chandra Debbarma bini o koklopni bisintwi chini khwlaithairokno swmai tangwi kok narwkmatwi khwlaimung khwlainani kokno sakha. Jorabai baksa gwdalwi samung khwlaina kokno sana naikha, jorabai gwdalwi khwlaithairokno khwlaiya hunkhe luku bosong komor thangnai. Kubun bosongrok bwswk swkangwi tongkha , borokbai baksa swkangna bagwi lukubosongno swami tangwi swkangna bagwi sakha. Kalidas swmai tangwi swikwrwng wngwi hayungni lukurokbai sinijakmatwi chwngbo swmai tangwi swkangwi thangna kok sakha.

Swikwrwng Purna Chandra Debbarmani swimungno cherwi naikhe saimano swikwrwng bo khoroksa luku bosongno, habar, luku hukumu, laibumano hamjagwi swinai. Boni swimungrok kuthuk wansukmungbai swijak tei chini luku bosongni bagwi soi wansukthai kokno khursai swijak.

Kokthumwi tei Cherwi Swinai : Dhanuraj Noatia