Dipali Debbarmani Sinimung tei Swimung

Bwrwi Swikwrwng Dipali Debbarmani Sinimung tei Swimung

Kokthum by Dhanuraj Noatia

Dipali Debbarmani sinimung:-

• Borom gwnangjwk swikwrwng Dipali Debbarma Kokborok sanairokni bisingo bwrwi koklop swinai khoroksa mung gwnang swikwrwng. Borom gwnangjwk swikwrwng Dipali Debbarma 1966 bisini 27^th July talo achaio. Bini omthai thwi kwlaima thai wngkha salthang hankhorni Jirania amchaini Bubon chontai kamio.

Swikwrwng Mgj. Dipali Debbarmani yapri Kokborok kokrwbaio:-

• Kokborok sanairokni bisingo kokborokno hamjagwi kokrwbaino rwbaiwi tongnai tabok joratwi kusu bangkhro-khrono wngkha hinwi mano, phiyaba bwrwi swinairokni bisingo khai aswk bangthayakho. Aboni bisingo bijap kariui mannai khai teibo bangthaya. Yasi bai lekhai manjak swinairokni bisingo Mgj. Dipali Debbarmani mung tabok nokhani athukiri ahaikhai Kokborok swimungni nokhayungo chwnajak. Bo 1979 bisini simino swina bagwi cheton nao. Tei 1982 bisio bini swimungrok phiyokjakna chengo.

Mgj. Swikwrwng kisa swkang Dipali Debbarma hinwi sinijakmani, phiyaba Kokborokno aswk khai kha riui hamjagwi Kokborok baino bini mungnobo pharphikha Mgj. Pihrsati Debbarma mungwi. Tabok Mgj. Pirhsati Debbarma munguinu sinijagu. Bo khoroksa “Movement For Kokborok” nukhungni adongjwk, tei “Kokborok Tei Hukumu Mission”nibo adongjwk.

Mgj. Swikwrwng Pirhsati Debbarmani swimung tei wansokmungrok:-

• Mgj. Swikwrwng bo koklop tei koktang rok swio. Bo kokborokbai siminu koklop koktang rok swio. Boni swijak kokloprok dal bidal bijap tei dal bidal kokrwbai bwlai Anji, Bumul, Khumpui akorogo sapogui karijak kha. Mgj. Pirhsati Debbarmani “Nuai” koklop Sahitya Akademy, New Delhi bai karijak kokswlaijak bijabobu achukthai manjak. Abono karwi bini swijak “Rangchakni Tripura Ama” koklop rwng remcharni Kokborok bijabobu achukthai manjak.

Bini koklop bijap “Tabok Kangkhung Nango” 2010 bisini February talo kaijak kha. Belai kuthuk wansokthai kwlaio jorabai baksa naiwi naikhe jorabai baksa gwdaljak wansokmung. Au, kangkhung nanonangkha, twmale hinba kangkhungni ulose bwkwrang, bwkwrangni ulose birnani ari kwrwi nokhayung nainani bagwi.

A bijapni puila koklop “Tabok Kangkhung Nango” oro o bo hapung, hathai, twima, twisa tei tiprasa hoda dophani kwmajak laibuma tei tiprasarokni kung chungjaknai manwi khunwi sak sak swnamjak rignai risa rokni kokno khursai sakha. Abono koklopnai o koklobo jephueu kangkhung kainwi mannai aphurunu tiprasarokni kungchukni mang Kokborok wngnai hinwi  sakha. Aphurunu Kokborok “o hathaini u-hathaio” ha gwnangwi pirjaknai. Kangkhung mankhainu laibuma mukumurok henderma sariwi Kokborok nok deualo kok Sanai.

“Kaskuni kamiyung kothoma kokthai

Tabok sano

Bahan, bwthwi tei phola

Kokborok mang wngwi bachanani.”

A bijabo tei tangsa achukthai manjak koklop abo wngkha “Nuai”. Nuai koklop 1997 bisini July talo swijak kha. A koklobo bo Nuai tokno ringhorwi koikha teisa birwi phaiphina bagwi. Sirisitini simi tiprasa kothomao Nuai tokni kok sajak phaimani. Nuai tokni bwkwrang kwrakphun chuchu borachini khugo khwnai phaimani. Bo Nuai tokno koikha huk rekewi birwi phaiphidi hinwi. Hukni thaichomu momphol monwi tongsani, masinga kotok bomwi tongsani Nuai tokno waisa nai naina bagwi phaiphina sakha.

“Nuai o Nuai teisa birphaidi

Chini kholani khungchili sakatwi

Khunju bai khwnakha

Mokol bai nukyakhu

Nini kangkhung belai kwrakphun,

Chuchu samani khugo.”

A bijabo swijak tei tangsa koklop abo wngkha “Ani Tripura Ha”. A koklobo bo trpura ha amano lopsaiwi swikha. Achaima ha Tripurani hapung, hathai, twima, twisa akorok bwswkse naithok nukthok. Oronu manthogo muiya hakatwi, pachol gandiri, orai thorai rok. O haonu mwswi hongmarok khwnama, kungkila rwchabma rokno khurasai sakha.

“Hache hache hathai halap

Harep hachwk auar o ha

Achaima ani Tripura hamung

Bini sakao ani khatangmung

Koiriri koitang twisarok kochok

Goirengni twi belaino kothok

Manothogo oro muiya hakatwi ……”

A bijapno karwi bini “Rikari” mungwi kangsa bijap karijak kha. A bijabo tiprajwk bwrwirokni rignai risa takmani bumul rokni kokno twi swijak kha.

Paithak:- Kokborok kokrwbaino hamsa rwi tisathani Mgj. Swikwrwng Dipali Debbarmani mungbo khursathai kwlaio. Mgj. swikwrwng Dipali Debbarma ni wansokmung tei swimung Kokborok kokrwbaio pohorni twngsa lama.

Ref:- 1, An anthology of kookborok poems ……………sakhani haikhe swidi

2, Debbarma, Dipali. 2010. Tabuk kangkhung nangu. Agartala. Kokborok tei hukumu mission.

Chama Chaya tongwi mano cherwi naidi