Shyamlal Debbarmani sinimung || Swimung

Kokthum by Bikash Debbarma

Shyamlal Debbarma

Swikwrwng Shyamlal Debbarmabo wngkha kokborok kokrwbaino hamjaknai tei sak tharwi samung tangnaini bisingo khoroksa. Bo 1951 bisini  November talni 2 salmario Bishalgarh amchaini Rongmala kamio achaio. Buphani mung wngkha Ramanimohan Debbarma tei bumani mung wngkha Brotokona. Borom gwnang Shyamalal Debbarma Cheraini simino Kokborok korwbaio tongnani tei swinani muchungjago. bo puilao swimungni haparo yapiri semani kokborok swimung baiya, bo puilao Bangla kokbaise swimungni haparo yapiri barogo. Aboni ulose baithangni mani kokno hamjakna rwngwi kokborokni bagwi saktharwi swimunggo yak rio. Shyamlal Debbarmani buchu Kornel Debbarmabo nogo  শীমদভাগবত tei গীতা-rog tonio nogo harisoba khwlaiphuru porirwna bagwi tei khwbo khwlairio. Haiphano kha kochomjakya wngwi waisa uisu samung kwrwi sanjarogo busukni khuktwi(Shyamlal)- porima khwnao aroni kothomarog, bwchwi Sudhra bo logi rio waisa uisu. A mahakavyoni ros kwtwi kothomarogno Shyamlalno muwani phwnagwi swimungni haparo kochoknani logi sowi tubuo. Abo haikheno twrwk twrwk bo kokborok kokrwbaini khurio swinani panjio.

Shyamlal Debbarma thungnuk kothoma bwsa, koklop tei kothomayung hai swimung kuthugobo yak rikha. Hasteni juda juda kokborok, kokwanjwi kokrwbai tei koktunrogo bini podrepod swimung karijak tongo. Bini  puila thungnuk Bengswnal-I (1973), Bengswnal-2 (1974) o kainwi nongkhorkha. Roman aikhor bai swijak bini Bengswnal – 2 thungukno kokborok bai swiwi sapogwi tikhwlaijak puila thungnuk. Abono karwibo bini swijak thungnukrogni mung wngkha Ranggola, Dhanya Manikya akorog.

Shyamlal Debbarma kothoma bwsa thaichinwino twiwi swijak Dundurukma mungwi kangsa bijap 1984 bisio tikhwlaikha. Swinai o kothoma bijapno dasok kaisani bwthai hwnwi bijapni khuk mosonmungo sakha. Dosok kaisa romwi bo Tiprani dal kwbang kokrwbai bwlai tei koktun bwlairogo ongkhorjak bini kwbangma kothoma bwsarogno o Dundurukma kothoma bwsao achuk khamplai rikha.  Abono karwi bini swijak kothoma bwsa wngkha Choba Kaisani Ulo (1995).  Bini komthingma bai 1987 bisio Adong kothoma bwsa karijakha, abono karwi bini komthingjak bijaprog wngkha Koktang Koklop Bwtang (koklop) , Ainani Mwkhang (thungnuk), aborogno karwi bini komthingjak kokrwbai bwlairog wrgkha Ani Tripura (1969), Aitorma (1973) akorog. Bini koklop swimungroni bising  tongo ‘Hachuk Gwnangwi Maichwlwi Pino Chwng’, ‘Monai bai Takhuk’, ‘Songdarini Kok’ akokrog. 

Swikwrwng Shyamlal Debbarma kubuni kokbai swijak bijaprognobo Kokborok kogo swlaiwi bijap karilangkha. A bijapni mungrog wngkha Nokarini Kothama (1986). Bini puila kothomayung 1987 bisio swiwi karijakha. A kothomayungni mung wngkha ‘Tongthai Naitugwi’ Abono karwi 1996 bisio Kokborok Sahitya u Sanskriti Songsod bai ‘Khong‘ kothomayung karijakha Aborogno karwibo bobai swijak koktang bijaprogbo  kokbotok kokrwbaio mano. Aborog Wngkha – Koktang Bwtang, Chichong Chichong Maching Chong akorog.

Kokrwbaini samungno karwibo Swikwrwng Shyamlal Debbarma Hukumu – Mukumuni samungrogobo bini samung bwtang tongo eba yak tongo. Deshni juda juda hasteno karwibo phatar hani Bangladesho Hukumu bodol twiwi thangkha. Northeast Zone Cultural Centre  ( NZCC)   tei  East Zone  Cultural Centre (EZCC) bo khoroksa adong wngkha Swikwrwng Shyamlal Debbarma. Bo bisi thamchiba (35) sorkari chakri khwlaimani yagulo 2006 bisini June talni simi bo chakri yakaro. 

Wansuk kwrwng tei koklop kwrwng boromgwnang Shyamlal Debbarma  swijak kokborok kokrwbaini rukungo kwbangmano swimung mano, aboni logi logi Shyamlal Debbarma wanjwi kogo swithanibo yak kumun hwnwi sinijago. Bini swijak koklop, koktang, kothoma, kothomayung, kokbwkhal, thungnuk akorog kwbangmano tongo. aborogno khamao bathongkhe swiwi phunukjaganw .

SHYAMLAL DEBBARMANI SWIMUNG :-

* Edited magazines :

1) Ani Tripura in 1969

2) Aitorma in 1973



 * Published books : 

1) Dundrukma_ Short stories Jan 1998 (12nos)

2) Choba kaisani ulo_ Short stories 27 March 1995 (5nos)

3) Khong _ Novel 1996

4) Tongthai naitugwi_ Novel 2007

5) Koktang bwtang_ Rhymes

6) Chichong chichong machichong_ Rhymes March 2003 (48nos)

7) Kokthairog tongo bonboniya _ poems 21 Feb 2000 (38nos)

8) Bengswnal- 1 (Drama) 1973 tei Bengswnal-2 (Drama) 1974 

9) Nokarini kothoma- Short stories 21 Feb 1986

    * Edited book :

1) Adong _ Short stories 23 Feb 1987

2) Koktang koklop bwtang _ poetries jointly by N.C Debbarma

3) Ainani mwkhang _ Drama.

 Sakani oborogno karwibo Shyamlal Debbarma bai kokborok tei wanjwi kokbai dal bidal Magazine eba kokrwbai bwlai sapogwi karijakkha. Bini obohai samungni bagwi bono 1997 bisio Salil krishna Debbarmon Mukumu sokat tei 2000 Rabindra sokatbo mano. Abono ulo 2004 bisio Agartala Sports and Cultural Foundation ni wngwi bono ”Tripura Ratna Somman” rio. Shyamlal Debbarmani oborogno karwi teibo sokat mankha Bijan Krishna Chowdhury tei Kokborok Amjok Naituk Kumud Kundu Chowdhury mukumu sokat. Swikwrwng kokrwbaino hamjaknai Shyamlal Debbarmani aswk swimung dalbidal tei kokborokni bagwi aswk khwlaithai kwbangni bagwi bini sinimung kokborok kokrwbaini labumao kotor kuwar wngwi tongo. Shyamlal Debbarma inre ji bisi 2017 february talni 21 salmari o thwi thangjalkha. Bo thwiphano bini swimung bisingtwi, kokrwhain hisingtwi chini thani aitoma kahai chwngwi tongnai