SWIKWRWNG SUDHANYA TRIPURANI SINIMUNG TEI BOBAI SWIJAK “GAIRING KHUNGSANI KOTHOMA” KOKLOPNI KOKBOKHIRI || DHANURAJ NOATIA

SWIKWRWNG SUDHANYA TRIPURANI SINIMUNG: –

Kokborok kokrwbaini swikwrwngni bisingo khoroksa swikwrwng wngkha Sudhanya Tripura. Kokbrok kokrwbaino hamjagwi rwbaiwi tongnai eba swikwrwng rokni bisingo bini mung barikhlai khursathai kwlaio.Swikwrwng Sudhanya Tripura Kokborok kokrwbaini khoroksa kwchwng athukiri. Swikwrwng Sudhanya Tripura Salgra hangkhorni(North Tripura) Panisagar Tilthoi acmachaini Boiragi kamio 1961 bisini 3^rd march talo omthai thwi kwlaio. Bo haste haphangni kokthum hukumu naikhungo samung tango.

              Swikwrwng Sudhanya Tripura cheraini siminu swina khaina belai chajago. Bo rwngngo swrwng tongphuruni siminu rwchapmung rok swio. Bo 1970 bisini simi swina chengo. Tei bo kokborok koklop 1980 bisini simi swina chengo. Kokborok koklop swithani bini yak belai kubukkuk hinwi mano. Bo rwchapmung, koklop, koktangno karwibo kothoma bwsa, thungnuk tei kothomayungbo swikha.

Boni swimungrok Dainik sambad, Tripura Darpan tei Syandan Patrika abohai koktwma bwlai rogo sapokjak kha. Bo phatar hasteni juda juda thai Delhi, Shillong, Aizawl, Arunachal tei phatar haktor Bangladesh rogo koklopnairokni pandao manjagwi kha. Bo Aitorma tei Jorani Khorang hai tal thwgwi karima kokrwbai bwlai rokbu komthingkha.

Bo “Kokborok Kola Mondol” ni puila kasku wngjak. Tei bo “Kokborok sahitya samsad” baibu kwrwngjak. Bo 1998 bisio Rabindra sokat  mankha. Abono karwibo 2007 bisio Swarak Samman yapharjak kha.

Boni swijak puila koklop bijap “Ha Kwchak” 1985 bisio karijak kha. A bijabo bini nwi chi tham(23) koklop swijak tongo. Hasteo 2005 bisi joratwi kokborok koklop sapokgwi karijak boninu kwbangkuk wngna hinwi saimanu. Bini koklop rok Tripurani ha, hapung, hatai, twima, twisa, luku, lukuni birman, tei lukuni hamjakmung rokno twi swijak. Boni “Ha Kwchak” koklop bijabo swijak tangsa koklop ‘Sokphaikha tongthokma din’ oro o bo o hani tomung-chamung, hapung, hatai, twima, twisa aborokno kitingwi tongthokmungno lobsai swikha. O hao nu Dangdu, Sarinda, Chongpreng, swmwi khorang khwnai manu hinwi sakha bo

Boni tei kaisa koklop bijap “Uang” 2000 bisio karijak kha. Tei 2003 bisio bini tei kaisa koklop bijap hamjakmungno twi swijak “Uphilwi Naidi Uaisa” mungwi karijak kha. O bijabo snichi brwi(74) hamjakmungno twi lopjak koklop achukthai mankha. Tei abono karwi 2004 bisio “Bichar Mukhtiyarni Nogo” mungwi koklop bijap karijak kha. A bijabo “Gaireng Khungsani Kothoma” koklop achukthai manu. Abono karwi 2005 “Bwkwrang Tanjak Toksa” mungwi koklop bijap karijagu.

Abono karwi bini karijak bijaprok wngkha:-

1. “Angbai kwkhwrang Twini Khorang” koklop bijap
2. “Mwnak Jorani Koktang” koktang bijap
3. “Nwng Hamjakma Riya” koklop bijap
4. “Sudhanya Tripurani rwchapmung” rwchapmung bijap
5. “Kobi Chwla Nugwi Tongdi Nwng” koklop bijap
6. “Nono Rikha khumpui” koklop bijap
7. “Ruphai uatwini khorang” koklop bijap
8. “Jora jorayani koktang” koktang bijap
9. “Jaduni khorang” rwhapmung bijap
10. “Dongor kamini ochai” kothoma bijap
11. “Hachuk biyalni koktang” koktang bijap
12. “Kami kwtal” thungnuk bijap
13. “Yang narbai ayang nar” koklop bijap
14. “Kholpeba Buisakni koklop” koklop bijap
15. “Kwchwngni lama” koklop bijap
16. “Tai imangni tok” koklop bijap
17. “Thaisuar Bwthaih” kothoma bijap.

SWIKWRWNG SUDHANYA TRIPURA BAI SWIJAK “GAIRING KHUNGSANI KOTHOMA” KOKLOPNI KOKBOKHIRI:- Swikwrwng Sudhanya Tripurani “Gaireng khungsani kothoma” koklop 2004 bisio bijap khwlai karijak koklop bijap “Bichar muktiyarni nogo” bijapni naharjak kha. Koklopni mungno cherwi naikhaise sai mano Gairing wngkha hukumu mukumu bai gwdaljak chini borok dohpha eba tiprasa hinjaknairokni kung chukjaknai sirisitino mwthangwi narwknai mukumu mari. Laithangjak jorao chini borokrok huk khwlai chalaio, hugo thangwi samung homung khwlai phru lenglana bagwi nok tangmano hinw Garing. Abono karwi chini dophani borokrok bolong malmata mwsa, mayung, geguma akorokno katina bagwi Gairing tangwi tonglaio. Gairing chini thwibai gwdaljak. Wngtong jorao Gairing rok aswk nukliya hinphanu chini dophani baksa hodani lukurok tabokbu Garingo tongnai tongkhu.

Koklopnai “Gairing Khungsani Kothoma” koklobo Gairing khungsani mangpili phunugwi jora, thai tei tongkhor swlaijakmani kokno sana naikha. Awoo kogonu tongu jora tei twi yorkhlai thangma kebono naisingya. Jorabai baksa gwdalwi himna nangu haiyakhe buino swlabwi mangwlak. Chini yaksi yagra nahar naikhe nugui manu kubun dopharok kuchuk kasajak bebak thaionu. Tamoni hinba borog jorano rwktharwi swkangwi thangu. Jorano rwktharwi himna rwngya rok khe tabokbu ukolok uslujak.

Koklobo nai naikhe chwng nugu, Gairing khungsani ua kogwi, son kogwi kwlai tongbaikha. samonu yang mai siping rawi tisana jora wng tongbaikha. Phiya nokphangsakhe tabokbu mwktrwini sichayakhu, kwrwi chaitokmung o Gairing kichik kwplano swnamnani. Hukni mai siping rawi tisajakya wngmabai watwi nobar manjagwi derai tongbaikha. Jora tongsani tiasana nangmani tisajakliya sogwi mwnam tongbaikha. Jorano sak nangjakya wngmabainu deramung phaio nokphangsani kwpalo.

Koklopnai teibo sakha –

“Bini uani bango kwchaoi tongnai pohor

Khorang khwnao jadu kolija”

Oro o ‘pohor’ hinwi samani wngkha simung, rwngmung, elem gwnang, swrwmgmung akorogno sana naikha. Borok munuisuni thani oborog kwrwi hinkhe mwnago kwlai tongmaswk. A pohorno manna hinkhai rwngnogo thangwi rwng swrwngna nangnai. Jorabai baksa gwdalwi pohorni lama ma rwtuknai. Jora kaisa chini borok rok huk khwlaiwi phailaio chbaiya nwngbaiya tongthok chathok khe. O jorao hugo thanglaikhe jadu kolija rwchaplaio. Rwchapmung bisingtwi lengma tongthokma briman akorokni kokno ragini thepai rwchabu. A jorao huk khwlai tongbaima bagwi jotoni nukhungonu maikhul kupulwng, muikwthwngrok bebak tongbaio. Phiya jora kebono naisingya, jorabai baksa himwi manya khe kebengmung phainai. Abagwi swinai teibo sakha

“Aphungonu uatwi molni muikuthungni boyar

Bini gairengni bang dagar rioi thango

Aphungonu mukturwi phaijago mokol”

Aw watwi kwlaikhe muithwng thaikwthwng kaina jora tei joto watwi kwlaisini muikwthwng kai narwkna chaitok baio. Tangwi jora kebono naising tongya, jorabai baksa molbu swilaijak thango. Laithangjak jorao chini borokrok phung aidrop bachaui hugo thanglaio. A jora borokrok kwswrangkhenu huk khwlai phailaio. phiya Gairing nokphangsakhe tabokbu mwktrwise phaijak tongkhu. Bo jorao nobar phaiwi bini o kophon Gairingno swbaiwi kwlang thangno bo siya. Khasiya selerkhe tabokbu mwktrwise sarijakyakhu. Khasiya seler hinkheba bini samungno sabole tangsinaiba abagwi boni langmao deramung nukjak kha. Gairing ganao khulni bwlung bebak sogwi mwnam tongbaikha watwi manjagwi. Nukhung kwpla watwi kwlai tongbaikha, bebak Gairing bisingo twi.

Paithago swinai teibo sakha

“Kaisa kwthwi bwsakno ‘

Sochaoi tongkha

Bachadi bachadi bachadi.”

Sana thangkhe kwbui koknu khasiya seler borokrok kwthwibai baksanu. Tamoni hinba seler borokrok thuo, chao, nwngo, beraio haikhe mang tongthok chathok khe jorano lairio. Sak kaisa twiwi mungsa samung khwlaima kwrwi. Abagwi sochawi bachadi bachadi bachadi hinwi sakha koklopnai swikwrwng Sudhanya Tripura.

Swikwrwng Sudhanya Tripura boni o koklopni bisingtwi o hani bwsarokno sichana bagwi kobok kha. Jorabai baksa gwdakwi himna bagwi sana naikha. Khasiui kwswrang wngwi saktharwi samung tangkhe joto bwkhatwinu hamari kupulwng wngnai tei thinango nini ani jotoni langmabo kwchwng wngnai. Bui haikhe kolok kotor wngna hinkhe selermano ma khibinai, sakni kolomtwi hao ma khikwlaiwi samung ma tangnai. Koklopnai abonu sana naikha buibai baksa khorok tisaui o hao mwchangwi tongna bagwi. aboni bagwi Swikwrwng Sudhanya Tripura “Gairing Khungsa Kothoma” koklopni bisingtwi o hani joto lukurokno sochana naikha.

Ref:-

1.  Dev Varma, naresh Chandra , 2010, Kokborok bhasha o sahityer kromo bikash, Agartala, noboChandana prakashani.
2. Debbarma, Binoy, 2009, An anothology of Kokborok poems, Khumulwng, Language wing education dept. ttadc.
3. Chowdhury, Suranjan kundu,2014, Surang, Agartala, jora publication.
4. Murasingh, Chandra kanta, 2020, Khumpui barwrwk, Agartala, akshar publication

Kaham hamya cherwi naijadi, chaya rok tongwi mano.