Huk Habar By Madhabi Debbarma

Huk habar o chini imang bojak.
Twisa ni twi khapang bising twi yorwi tongo.
Hatal ni ha yapai ni kothoma, siring siring khunawi nao.

Watwi hatal no kwbakhe, ha chwlwi no mung Rio.
Huk khwrangwi nikuma phunukgo.
Joto sak sakni kothoma khuna Rio.
Hayung bai gwdalwi langma bai manjujak..

Bolong oro lama simi phunukya, chwngno mokol phiyok Rio.
Sakni kolomtwi satungno mechen Rio.
Kolomtwi oro twi ni sai kok kwbang sao.
Huk kolomtwi no khuk hin chinio.

Lengwi gairingo thuya imang se lelao.
Sal burum phung aikhe huk simi nukya, kwtal mari nujakgo.
Bolong nobar mung sungya, langma simi Rio.
Boyar waywng khilitwi mai rokno mwthui kwlango.

Huk oro huk simiya chini langma si.
Hayung chirikgwiya, khalokgwi, kwpwlai wngna phurwngo.
Mai chwlwi o joto buma ni surimung tongo.
Huk habar ni maichwlwi rok, nogo kiphilnani kothoma sao…..