Tini 05 Tallang 1433 TE (25th March 2024) salkhongo Kokborok Tei Hukumu Mission (KOHM) ni chaitokmung bai Hapingo Srapsa -2024 mungwi bisi rwgwi Kokrwbai panda khwlaijak kha Jamilwng, Domdomia, Agartalao. O panda KOHM ni kasku Swikwrwng Dr. Bijoy Debbarma, Tangphang Swikwrwng Binoy Debbarma, Bitiphang Swikwrwng Chandra Mani Debbarma tei KOHM ni Adongsong phaiwi manjak kha.
Abono Karwi Kokborok Korwbaini Swikwrwng tei Bwrwi Kothomayung swikwrwng Sefali Debbarma, swikwrwng Dr. Pritilata Debbarma, Swikwrwng Madhusudhan Debbarma tei sikwla swikwrwng Akosong bo phaiwi manjak kha o pandao.
Kokborok Kokrwbaio Hapingo Srapsa 2024 pandani bisingtwi Revolution eba kwtal wansokmungrok nukjak kha. O pandao Swikwrwngsongno bechep bechepkhe Koklopnairokni achukphang swnamwi Koklopnai rokno Koklop sanani sep rijak. A samung Kokborok Kokrwbaio kwtal wansokmungni mari nukjago.
Tini o kokrwbai pandao Kokborok Koklopno twiwi swbai sukurubwi sakha swikwrwng Dr. Bijoy Debbarma, o wansokmungni bisingtwi kwtal swinairokni bagwi chubamung kotor wngwi mano. Tei o Panda swikwrwng Binoy Debbarma bo ahaino Kokrwbam eba Dictionary ni kokthai thumthani kebengmung tei jwngjal rokni kokno twi sukurubwi sakha.
Tini ni o Pandao Jotonisai Judakuk tei naithok wngwi bachajak bechep wngkha “Ganti Nokni Simi Ongkhorwi Koklop”. O bechebo buma hinjaknai khoroksini swikwrwngjwk songni khuktwi borokni khani kok tei Koklop rok sakha. Tei oro o judakuk motombahai mankha kokrwbai Ganti nokni simi koklop bomo haikhe achaikhana!
O bechepni Pandano Komthingkha Swikwrwng Sefali Debbarma tei Koklop sanairok wngkha…
1.Pritilata Debbarma
2.Nabalaxmi Debbarma
3.Balirani Jamatia
4.Sharmila Debbarma
5.Shyamali Debbarma
6.Renuka Debbarma
7. Kalpana Debbarma
KOHM ni o samung Kokborok Kokrwbaio kwtal wansokmungni mari nukjago tei Kokborokno hamsa rwthani kaisa Yakhilik kwrak wngnai abo.
Reported By Dhanuraj Noatia
Views Today :
Views Last 7 days : 73
Total views : 30618