|| Khoroksa Koklopnai Wngwi ||

° Kusumsa Tripura °

Ang koklopnai wngwi-
Swngcharno juda juda
Mokolbai nugo-
Waisaba yokjak,waisaba satokjak.

Borokrogni chirikhogwi kapmani khorang
Satokjakmani kok,Sejalaimani mangpili
Ani bwkhao twisa hai wngwi-
Rangchakni kokthairok thaisa-thaisakhe kholjago,
Ulokhe khukni koklop lopjago.

Ang koklopnai wngwi-
Horni mwnakmao pohor naitugo
Ang horni mwnakmao kapmani
Mwktwino lekhao.

Kokthairok ani thani koktun simiya-
Abo ani thwi,ani mangpilise
Salsa kokmangni kokbwtang wngo
Ulokhe khukni koklop lopjago.

Ang swio-tamoni hwnba
Sichaui tongmani ano kebengwi manya
Ani khakhamma jorao
Kokthairokni phanbai khakchangma
Achaiui mano.

Abo simiya-
Kuluk-luphung,satokjak,kebel,sichamungni boyar kwrwi,
Omohai borokrogbo koklopni bisingtwi sichamungni boyar manwi bachaui,
Kiphilwi phaiuimano.

Ang koklopnai wngwi-
Ani samungkhe kok sanani simiya,
Khananani bo simiya,
Ani samungkhe –
Borokrogni langmao mwnak sokomorwi
Bwkhani kwchak kuphurkhe khatungwi
Kaisa pohor tubumani-se.