HOKANG WARJAK IMANGROK By Utpal Debbarma || Kokborok Poem/Koklop ( 06/02/2026)1

HOKANG WARJAK IMANGROK By Utpal Debbarma || Kokborok Poem/Koklop ( 06/02/2026)1

Tongthunla ani imangrok,
Bakaono
Khachopjak hukutwi warwi
Khatijak biyang kwmanani
Jora phaikhai kariui kayanwta.

Nwngle twmani aswk dagikhaba
Bakani bupwranani
Jorase kok sawanw bwle
Ani chobani
Hugo maichwlwi kwlaijak ani
Sak kengnani jora phaikhai
Ha phekhogwino phayanw
Yago da borok twywi.

Ani hokang warjak imang
Salsa hatalo sak yoksauanw
Kherbai riuanw yapiri kholwi
Khorok tisauanw mwkhang phunugwi
Hatal mwchangrwi rwchapmusupbai
Khapang bogwla khano belokganw
Hamjakma chukili swkganw khapango
Swlwkjak khorang manjuphiranw
Reke rekeui
Seder sederwi
Khachuksa jaduni khano
Tongthunla ani imangrok
Bakaono hukutwi warwi.

Masing pantwio achlang boyaro Saklang laywi saduk kiyangwi
Bubar baranw
Motom jip jip motomsaui
Bwthai thayanw hathai kobolwi
Kwtal imangno yak tolwi
Yapiri kwtal kholwi
Tongthunla khatijak bakaono
Biyango kwmanani.

Rasa rasa bisini himbuma laibumarokno
Lam hogwi rutukphiranw yakorai mari songwi
Himphirjaganw thinagno yak tolwi
Thansani yakhwrai swnamjakphirwi
Ringjakphiranw nwng ang
Khukrwbai khorangbai komwthai kholwi.

Kwcham khorangno
Kwtal khorangbai manju-ui
Ringhoranw ragini tisaui
Simanok kwmajak sandai bosongno lobwi
Tongthunla bakaono hokang warwi
Jorase kok sanai.

O hani kothoma thwyo gwdalwi
Kwtal nobar twiboro halok bophiranw
Nok kwtal yakhilik kwtalo
Swlaijak thangjak bumungrokno
Kiphilwi pharjakphiranw
Khorok berawanw mani khurio.

Kwtal achainairokno, yak tolwi
Bwcham kwchamno phwrwngphiranw
Nokhani talno lamsogwi
Horni andarno mechenwi
Himphiranw,——-
Tongthunla khachopjak
Bakaono hokang warwi.

Masing siyari pantwio
Sachlang boyarni khapango
Mwkhang kwlwirok
Kherbai riuanw sal kwtalo
Khatwngkhajaui bwkwrang phehelwi
Birlaiyanw,——-
Hayung pakogwi halok motomrwi
Amani kokthai saui.

Ani jora paikha siklarok
Yachakdi
Yachakdi, ani hokang warjak kmhachopjak bakani imang
Chwnasauanw,——
Norokni thani
O hani kothoma kokthai.

Hukumu mukumu tabukbo kwthang
Mokolni bwskango mukthang
Kiyogwi bahai pin-nanw
Hapung hathai
Motom halokni khapang.

Rangchak jorani jaduni khorang
Dangki buwanw khapang
Hatol jorani eh hu hu khorang
Bwchwlwi pinanw hayung
Eh hu hu khorang hapingno ringhordi
Yapiri kholanw nwngbai
Yachakdi siklarok
Yachakdi
Ani hokang warjak imangrok.