Khumsaiti || Kothomayung || Andrew Debbarma

BWKHAK BWRWI 4

Togla koichikma bai baksano aisrisri bwchaui phalnok phiyogo Molen. Bini phalnok simino khungcha chok-chok Twisom kamio. Som, moso, berma, piyaj, swtwi, risum, thok, mairum, alu akorok bini phalnogo manthogo. Kami bai hatibo kwbang hakchalo. Abaino kamini bororok bini phalnogo mangno je nangma tei manthoma manwirok pai lai phaio. Bihik Koloktibo bwsaini logi cha godogo. Phung ai kheno kamini okwra chakrarok cha nwngnani tai gob rinani bini phalnogo mangno muisrum hai khai toroi toroi phai laio. Cha nungna le phada phai phaiya aro achugwi kok ma salai khai swngchar raijoni kok salaio. Aboni bagwi bini phalnokno gob rwmani jagano hinwi mano. Phung bai sarik kwlai khe manwi kwthwio muisrum kuthum twi khe kamini bura bwrwichwk tai okra chakrarok bini phalnogo kuthumwi swngchar raijoni kok salaio. Kaham, hamyani kok, nangmani kok, nangya sokya kok, buino sejamani tai buino nokolokmani kok abo hai dal kwbang kokno salaio.

          Tini Romoni bai Nugraino buini slai swkang phalnogo sok phaio. Kolokti cha kutung godogwi borogno yapharwi rw phaio. Cha kutung bwslai buchuk bai kisa kisa khai surubwi kok salaio Romoni bai Nugrai. Borog twma koknobo serek-serek khai khunju gana thepaui hututu-hatai salaio. Amo hai khai borog kok serek salaimano Kolokti mukching kuna bai kisa kisa naharwi tongo. Phiya borog suku suku wngwi twma kokno ba aswk moja nangjagwi salai kha Koloktini bujiui man ya. Bo sina muchungjagwi hin horo, “Tamo kokno salai kha hino kwisong?’’

          “Kunu ya bachwi,’’ Nugrai kok yachago.

          “Haikhai tamo kokno aswk khunju thepai salai swla?’’

          “Salai kha ta bachwi—’’

          “Khwna maya kok de?’’

          “Khwnai mano,’’ Romoni yachagwi sao, “Nwng khwnana muchung khai ba ma khwna rinai ta.’’

          “Do sadi tamo abo aswk huina nang kha nini bachwino.’’

          “Khwnana muchung kha haida bachwi?’’

          “Khwnana muchungma ba chana muchung bai baksa doro niyade—’’

          “Akon kaham khai khwna di bachwi,’’ Romoni saui thango, “Uskango bolongo nailai tongmani manjak lai phu.’’

          Manwi jai-jai khai beraui tongmani o kokno khwnaui Molen hinhoro, — “Tamo hin tamo tamo? Saborok manjak?’’

          Nugrai yachagwi sao, “Kaka Chokdrini bwsajwk bai Nugultini bwchamari pho.’’

          Romoni kok manjuwi saui thango — “Ani cheraino nuknai khaito. Sikari thangwi kiphilwi phai phuru pho, wakhiraisani gairing kwbaio achugwi bwkhani kok salaiwi tong phun. Norokba agini simino Bui tai tai salai tongma khwnaya da?’’

          “O Isor!’’ Kolokti wanajagwi hino, “Au, agi buini khugo salaima kisa khwnama haile wng kha, haiphano aswk wngwi tongo hinwi wansuk naharjak ya ta.’’

          Nugrai sao— “Khenchne swprak rohorjak kha hin bwle Nugultini bwchamari. Ayang kaka Chokdri khai thamchi kutung ya diba?’’

          Molen kok selengma phunugwi yachago — “Ihi, a Nugultini bwchamari khai kaijak borjak twtwi tamo ma wng twrwng hino? Chini kamio omo hai loisitra tabukno khwnao!’’

          O kokno twiwi borog salaiwi tongmani Nugulti bebakno khwnachomwi tongo. Bo berma kisa paina hinwi phalnogo phaimani, a bwchamarini kokno twiwi salaiwi tongmani khwnaui tepsa khe phalnok kotono huijagwi khwnachomwi tongo. Ulo berma twlang ya karwino lachima-kirima bai bo nogo kiphilwi thang phiro. Nogo sogwi kheno nukao achugwi swrapsa mogwi tongo. Bwsajwk chwrai bam twtwi kisa borok khorang hai khwnaui noksingni nongkhorwi naiba bumano chok-chok achugwi mokma hai wngwi tongma nugo. Bo swngo—“Tamo berma da manbu kha ama?’’

          — Boroni berma? Manbuya berma-burmu!

          — Hai, nwng berma paina thang ya diba?

          “Manbuya hinma khwna yada?’’ Nugultini khorango jolima nukjago.

          Sampari bumani khorang torwi jolima hai khe kok samano khwnaui wanajagwi swngo, “Hai ama, tamo mungsa swk da wng phai?’’

          Swngjakmano kokphil yaui khwnaya hai khe nilar wngwi tongo Nugulti. Bumani tong halokno buji manwi Sampari khorang twrwk khe swng phiro, “Ang sai mano ama nwng mungsa swk wngwi phai kha. Sana ba kok khulogwi. Omo hai khe mogwi tong khai chanai diba? Nwng nini khani kokno kebono khulok saya khe, bui bahai khe buchinai, sadi tamo wngwi phai kha—’’

          Phiyaba Nugulti khuk khengna nai dorob kheno bwchamari bol phaksa rujuwi budrubsa khe nokhwla bera phaio. Aboni bagwi Nugulti je kokno sana wansukmani teisa bwkhaono chobwi tonina nang phiro. Ayang bwsajwk khwnana muchungjakmani swngmang tongma bai kok pherwi sao, “Kamini bororokba chwngno hamya mang saui nokolok tong bai bwle. Twma talikha manwi chwngba buini selengma wngwi kwthang tongna kwlai si! Nini bagwi se wanao kuphu ang; angba tei sal bwswkno tong si nani, aniba jora sok phaiwino tong kha. Ang thwima ulo nwng taibo birman kotoro kwlai yanw!’’

          O kok saui Nugulti surub-surub kabo. Bwchamari abono nugwi kisa wansukma hai tei wanajakma hai khe mungsa khuk pepla yaui noksingo hab lango. Sampari bumano thamokna naio, “Tamo kap twrwng tong hino ama, ta kab di; chini bagwi khaiba mwtairok kwrwi diba? Himdi noksingo, thok-thuk ya maituluk phano khobsa chalai yanw. Ang chini noknino dagiui rohor ranw, mai chabaiwi hati-o thang phaidi hinwi.’’

          Abo hai kok saui bumano noksingo sitogo Sampari. Twiprasarok ba bermano hamjaknairok, berma kwrwi khe mui se kwrwi. Borog mai-tuluk baino thok-thuk ya hutre-hatra chalaiwi bacha laija-o. Mai chabaiwi Sampari bwsaino hatio thangwi muikwthwng tei bermarok painani dagio. Mongorai bihikni kok khwnaui hatio thang kha. Bo nongkhor lang dorob kheno borogni nogo Gailem bihik-bwsa tubuwi beraina phai laio. Gailem nokhwla yakung kaphai kheno waisa bai Mongoraini mung se swkang khuwi ring phaio. Bini bangwra buwi bihik hino, “Tamo abo piyajwkno ring ya karwiba a Mongoraisani mung khuwi ringwi tong kha?’’

          Bwsai Kosomtino kok phirokmung yapharna swkangno kwcharo kok kasuwi Sampari kalam bacha phaiwi saphaio, “O bachwisong se bwle, hab phai laidi bachwi, phaidi dara.’’ Borogni logio bwsajwk Susmano nugwi hamjagwi waririk khai hin phiro, “O….mayo bwsa sikla sok thang kha bwle.’’

          Noksingo hab twtwi Kosomti kok yachagwi sao, “Nukya balokma ba norok torjak tong bai khata, aile o chwrai kuriya se—aboni bagwino torya kwswk tongo. Bini sak somanrok jotono torwi bono lai thang bai kha.’’

          Aphuru Samparini yak palao romwi tongmani  tola twi khe totwra suhorwi Nugultibo hin phaio, “O… tini da sok phai lai? Lama koroui da sok phai baima kwlai kha tamo?’’

          Kok kwkhwi saui Gailem yachago, “Au norok le Saptao waisa phainairok bwla. Je mwnaiti kaijago hin kaijakmani waisa phano da mwkhang naison phai si norok? Angba norokno bo hakoro habwi tong bai kha, desh-bidesh da uri thang bai kha se ma hin si bwle.’’

          O kok saui noksingo hab kha Gailem. Totwra phologwi ayang uyang kisa naisigwi swngu kha, “Tamo buwairok khai kwrwi da nogo?’’

          “Tabukno nokni nongkhor lang ta hwno’’ — Sampari kok yachago, “Nogo berma moso kwrwi kha hinwi ang baino kisa hatio dagi rohorjago dara.’’

          “Sok phaina bwswkrok lerno?’’

          “Diboro-no sok phai yanw.’’

          O jora Kosomti phatsa Samparini bwsajwkno bumani khurini segwi bamwi naharo. Nugulti khe daba swgwi Gailem-no yapharo. Haikheno kok salaite salaite chuwak nung laima panda chengwi thang kha. Tamoni hin khe omo kaisa agini simino tiprasarokni loi khlaijagwi phaio je nogo nograi kasa phai khe eba jaiti gusti beraina phai khe eba mwtai atai rwlai khe chuwak nung laima panda jesa khe phano ma wngo. Sirisitini simi khlaijak phaimani loino hinwi mano ta. Chuwak bai se borokno ador khwlaio. Jeswk chalai nung lai panda kotoro phano chuwak mungsa kwrwi khai o panda mwchang liya se hinjak sinai. Abo hai agini loino rwgwino Nugulti arak tikhlaiwi rio. Phiya bo arak nung ya, bini bagwi khe bwtwk nangnai. Haiphano borogni nogo bwtwk paiwi thang kha. Pai thang phano le Gailem o kok swkang bariyano wansukjak, bo tubuwi phaio. Arono bwtwk murwi nung laina chengo. Nungnairok Gailem, bihik tei Nugulti. Sampari chuwakrok bai kwrwi, nungnano karwi le khajago se hinwi mano.

          Phung diborni simi panda cheng laimani mojomo dibor chuk kha. Sampari bwsaino lerjago mui songnani. Mai khe boksaui munwi paikha, tabuk berma kwrwi mui songwi man ya khu. Ayang panda achuknairok kok adlang pidlang salaina se cheng lai tong kha, kusuno phekro phankra wng lai kha. Gailem khe yakung bai kham tamwi rwchapna chengwi tong kha. Ayang bwsajwk mai okhuikak tongmani bini kheli kwrwi. Bwsajwk Joya chwraiba phungo je mai khoksa chaui phaimani teisa mai okhuijagai bumano khuju gana serek serek saui tongo. Sampari bebakno bujiui tongo. Joyano hino, “Mai okhuijak khunana Joya?’’

          Joya lachijak twtwi kok kiphilo, “Ihi — okhui ya.’’

          Sampari mwnwiwi sao, “Ang sai man tongo borok khoroksa mai okhuijakmani.’’

          Kosomti kok tansuwi mwnwi suru-suru khe yachagwi sao, “Phungo mai kokesa chaui phaima bwla, okhuijak tong kha ta.’’

          “Tini tamo swk lerkha swla o borok?’’ Sampari bwsaino pher phunugwi sao, “Tabuk berma sok phai khe mui munnaba bwswk, tabukno mun thang ganw.’’

          Bwsajwkni kokno khwna horwi ayang buma Nugulti Chuwak kephek yachak horo, “O bakitingno ang jolima se kul kwrwi.’’

          “Tamoni nwchamarino ba joli ma tong swla pi?’’ wanajakma hai wngwi swngo Gailem.

          Chuwak kephek phuru khai bwkhani kok jotono khulokjago. Nugulti bini bwkhani kokno khulokjak twi wngwi thango. Chuwak kephekni pharino Gailem-no khulogwi saui rwkha, “Tai tamo wngnani, a ani chamarisani kokno norok khwna khai khi seleng twi selengjaganw!’’

          “Tamo kok abo tamo, aswk khi seleng twi ma selengnaijat?’’ Gailem sinani muchungjago. Buma tamo kok sana nai Sampari bujiui mano. Bo le kwkwrwk ba lachijago. O kokrokno kholobwino toninani muchungjago. Aboni bagwi bumanop hin horo, “Mo ama khai chuwak phek khai tamo kokno abo sana nai hino? Ta sadi sochoropod kok—’’

          “Ari diro, nwng siring tong di’’ — bwsajwkni kokno phatsa tokra phirogwi Gailem-no sana cheng phiro, “O yang se khwna di Gailem, ani chamari le chini mwkhang soknai se wng sio!’’

          Gailem wanajagwi swngo — “Tamo wng khaba tamo bwbtwi?’’

          Aphuru khe glang glang kok khulogwi sao Nugulti — “A nahanokjwk tong twtwi buda kami chokdrini bwsajwk bai nailai tongna khaile, abo da saui tai ham lai siba Gailem! Mwkhang sok suk kha! Uskangobo boro bolongo nailai tongwi se manjagwi bui rohorjaku kha phun. Abo tai saui ham liya.’’

          Bumani i kokno khwnaui Sampari wanajagwi kok ma yachago, “Tamo hin tamo tamo ama, uskango tamo?’’

          “Nwsairok manjago bolongo kami chokdrini bwsajwk bai,’’ khorang kisa kotor khe saklaio Nugulti. “Ang tini phungo se dugano (Phalnogo) thang phuru Romani bai Nugraino salai tongma khwnaui phaio, nwng tamono si! Angbo lachiui boroni berma tubu sisa, phirok phaikha ta hwno.’’

          O kok khwnaui langma kolok hoklaio Sampari. Kha bising bising hino- “Aboni bagwino bujak phaikha ta o muinusu, abo se ano khe kok khulok saya. Yong Chokdrino kok tunna hin phurubo mana khwlaiwi tongo. Bini tongma chayani gunwino bo kirijak tite.’’

          Nugultini khukni kokno khwnaui Gailem bai bihikbo talka thab bulaio. Kosomti hino, “O hori Krishna! Hairok da wng tong ba o Mongoraisa?’’

          “Wng ya tong swla…’’ Nugulti yachagwi sao, “Abo Ani kwpal se khwlai sio, ani kwpal!’’ O kok saui kabna chengo Nugulti. Gailem hino, “Tamo mwchang ya swrang ya kab twrwng tong kha hino pi? Ta kab di. Akon phai gwra thung a Mongoraisa, ang bujok kwlang ganw.’’

          A joraono Mongorai hatini kiphilwi nogo kasa phaio tei bihikni yago hati sola yapharo. Ayang Gailemsongno nugwi swngo, “O dara, buphuru sok phai lai kha?’’

          “Phungono sok phaio, nwng bai kisani bagwi malai phai liya ta,’’ kok kiphilo Gailem. “O kubuino Mongorai nwng bai kok kisa tongo.’’

          “Tamo bwbtwi kok ba dara?’’ Mongorai wanajagwi swngo.

          “Ani logio phaidi kisa phataro,’’ hinwi Gailem twlangwi thango phataro Mongoraino tei je Nugulti samani kok twino Gailem bono bujogo. Ulo noksingo hab kheno Nugultini khunjuo sereksa khe Gailem sao, “Pi ang bujogwi kwlang kha nwchamarirokno. Tabuk tai agini hai akol wng gwlak naidi. Ang kaham khaino bujok kha.’’