Phaidbaisidi Thansani Khotolo || Koklop || Bhuban Mohan Jamatia

Muchunglaio angbo nwngbo jotono

Baithangni saklomo thumsa bwchawi

yokjakni bana nobaro khengwi rilainani.

Palbaksa khorang sotonwi rachaplainani

Obo chini Haa, obo chini tongthai hwnwi.

Muchunglaio angbo nwngbo jotono

Baithangni Haao bwchawi sinijaklainani.

Hayungni bwskango chwnamsai phunuklainani.

Salaio gati hukbalam thaisano kok

Thansa wngwi dophano twikhoklainani.

Kwlwkjak kwmajak sakni bantarogno

Thumui rogwi kiphilwi tubulainani.

Maibar khulbar rangchak rikchak

Jeswk chini kuplung tongphano

kha bwthakliya tei bwini saklomo

Buma tongtwtwi buma kwrwi

Tongthai tongtwtwi achukthai kwrwi.

Kubun nukhungni selengsa swnamjagwi

Khukni kok kengya mwkhang torjakma.

Sakni gwrwngno kholop kholoplai

Bwini chamano yapha khoroplainani.

Mohai tei sal bwswk tonglangno jani !

Hor-Sal chini khapangno jangre phaio

Kwmajak kochokjak chini imangrog.

Ok thaisani thwi thansa kwrwi bai

Imangni saka imang chapjakmang

Kochokna nangkha bisi kolokma

Ongkharlaikha tabuk imangni khotolo

Nasigwi tongliya bwrwi chwla

Yoknani chobao khorang tisalaikha.

Yagulo sachlangni nobar ringwi tilangkha

Haa nokha sal tal athukirini thani,

Khwnawi khariokjak borog jotono.

Mokol phologwi naising tongbaikha

Manjulainani chini thansani khorango.

Himdi jotono chini imangni khotolo.

Phunuklaiwano chini khatijak imangrogno.

Sakra saktoi kuphur kosomno pogwi

Phaidi bwtang tangsao thansani khotolo

Twikhoklainani kochokjak kwmajak

O chini rangchakni Haano.