Chini Tripura Ha By Twishri Debbarma

Barot ha kotorni salsi-salkani ha
Chini Tripura ha
Mwchangwi swrangwi tongo
Yaksi yagwra khwrangsawi,
Jompwi, Sakhan, Longtwrai,
Hachuk berem, Hathai kotor-Mwtai hathaini
Twilwlwk nokbarbai tongthogwi.
O naithothok hathaini kwcharo
Mwsawi thang tongo
Longai, Deo, Manu, Dolai, Khowai,
Saidra, Gomati, Muhuri, Pheni twimarok.

Chini Tripura ha
Molni gwnang goron twijak ha,
Maisingo kwlwi pwrawi kwchang rio
Thapa chwlao homa berengwi kuthumlaio.
Tangbwlao tungphwla rio
Sakni kolomtwi chop-chop kwlai thango.
Basalo watwi rup-rup wawi gula wngo,
Sachlang jora tongthokma jora
Bwlai kwlwi rotomu
Kungkilani khorang khao baphaio.

Laibuma hukumu-mukumu gwnang,
Rasani swlai kwbang bubagwra
I hano swnamkha mwthangkha choba khwlaikha,
Borokni yakpaini mari kwlang thangkha.
O hani bwsarokni kerang kothoma
Tabuk bo khugo tongkhu.
Khwrangjak hathai twima twisa kwthang ha
Chini naithothok Tripura ha.