Surang || Koklop || Alendra Debbarma

Uaisa aphuru ang thangmani

 kaisa thaio samung nangwi

Kami kwtal amchaibo kwtal

Satung prapsai chop chop

Kolomtwi yorjak.

Twi kangmani aswk khe dojak

Nokhula naichum himbo

Kebono de nukno hinwi

Lachima kirima tongjamabai

Amtwikhe mang lai-wi

Phaikha kami koridok.

Hakchalni simi lama himtw twi

 Nughoro khoroksa borok

Kosong uanswgwi satio sak sak

Bini thanino mansinai twi rangsa.

Tei kisa thangwi sampao thangwi

Uklogtwi khe nukha bono

Samung joraba tangwi tongjao

Khetoni tangpakula .

Khaju chok chok khajak

Rignai yasku jora kanjak

Khorogo ri bulwi kamchwlwi

Kichik chumjak .

Aro bathagwi kisa uanswgwi

Hinsao ahoo kuchukma haikhe

Khorang khuna-wi phirok naisigo

Lachima mwkhang tisai.

Ang sankha bono twi khupcha de mano

Koine koinekhe tota motakhe

Yachukgo bathakdi kisa .

Eko twi tilok hinmani bo

aswk khunathok twilwk khorang

Totra thangkha kisi-wi .

Bono nugwi ang siliya kutulna

Aswk naithokma goron.

Ang phirogwi rio twi tilok

Hambai thaisano hinbwi mansio

Muani khao kubulwi

Abohai thaio boniya bole

Himtw twi bini kokno uanswgwi

Ua-o hamjakma japa

Teisa ang phainai bo bai mainai

Bobaino nukhung khanai

Imang kuplung takmang takmang

Hatio pao thoksa kiphil phuru

Made malaino Teisa kha ka-wi Paio surang kongsa.