TIPRAKHOR By Andrew Debbarma

Kami kwlwksa borok dophani
Haphar mwchangjak tiprakhorni,
Halwng kwkhwrang buphang bai waphang
Hachwk-harung bai bwswk se mwchang.
Tongkosong tongnai, chakosong chanai
Khapang khulasa khwlaiwi tongnai
Wase-wareng khe tongnai lukurog
Kolomtwi cherwi tangwi chanairog,
Borogni mangtang thangwi tongnani
Hapung ha rugwi huk chalaimani;
Bolong bokhogwi mayamthong kaio
Maitang kuplung mairwbam nogo.
Tongthokma boyar kami dumsajak
Jotoni khao halok kwrwngjak,
Takhuk bai takhuk, bukhuk bai bukhuk
Karlaima kwrwi, manjujak buduk.
Bisi khonchorwi bisi manjuo
Bwswk se mwchang rangchakni ha-o.
Phiya mwnakni boyar sib phaiwi
Tongkhor guwaiwi kab kha swlwgwi!