Nwng kwrwi ang bahaikhe tongnai? || Koklop || Twishri Debbarma

Bwrwi wngwi angle achai phaikha.
Kaijakna jora wngwi nukhung khakha,
Langmao nwngbai malaikha.
Nwngle ano phuti hinwi ringkha,
Khapang kha thansa wnglaikha,
Khurio sajwk khoroksa achaikha.
Bisichibao nwngle ano tini yakar kwlangkha
Kokthai thaisa Swngyawi sayawi
Ano kisaphano saimanriyawi
Nwngle ano kwlangkha saichung
Tini ani khapang kha hiliksajak
Chumwi kosomni watwi thakliya ani mokolni.
Langmao lama kolok bahaikhe thangnai.
Talikhao ba tamojani swiwi tubukha.
Sajwk khoroksano kolok kotor khwlainani.
Bini thinang swnamnani chonglaimani
Wansukma nangliya gothokma nangkha
Sajwk khoroksabai achuklai tonglaijao
Sabono tei ang lobwi ringsinai
Thinango bahaikhe lama kolokma thanai.
Nwng kwrwi ang bahaikhe tongnai?