Habarni Pantwi Thopsa || Kokborok Koklop

Anta Joy Tripura

O Pantwi Pantwi Pantwi thopsa

Nono ringrwk khna thokrwrwk.

Nini mungno saboba

Pantwi hin-wi mung boklang?

Pantwi mungbo khnathok

Mungbai goronbai gothelangmase.

Nunglai rumu glak

Jephunu phabo kwchwngsa.

Rumu krwini kwchwngsani

Khawo nangkhai khakwchangsa.

Ani haping Pantwi thopsano

Naising tong-wo sa(sal)-ho(hor).

O Pantwi thopsa nunglai

Tubuiwi phaiwo jonw.

Mai mui hanai bithi

Siyari ung-wi kobung-wi.

Bwjang gulani phaiwibo

Ani Hukni haping-wo sophaiwi.

Watwi krwini bachamiya

Mui thai dalwk sampra.

Pantwi thopsa klaimabai

Haping waisawi khrang sisi.

Phenok sobai mocho khanta

Twilo twilo thaisakha.

Wasungbai gudawi muitwkbai sung-wi

Thoklangmani chasini chai pailiya.

Melok kwitha dalwk bochuk kwta(kwtal)

Kwlwi kwlwi yowi chapaiya.

Khetra khumchak buba(bubar)bai

Haping mwchangjak.

Asri sri siyari domwi domwi

Kongkluk toksa khorangbai.

Haping Gairing noba(nobar) sisisa

Muito mawo jaduni rwchapmung.

O Hukno tangphunu twiphunu

Hachuk kaiwi tongphunu chaphunu

Chakli siklano sumu khorangbai

Khani kokno samani.

Mwtai Krishno Gupirogno

Bansi khorangbai khasotomtwi.

Mailungma ter phunu

O hachuk-wo ehu..hu..khorang.

Haping petokni thang-wi aidrwk

Mui gudawi sung-wi chamani.

Garing sakawo noba sisi sani

Mai mui khu halangmani.

Sakwchang ungsakha

Nowo thangni poja jugakha.

O Hachukni Pantwi thopsano bo

Logewo twlangni muchutiwo.

Ani nokhungbo haping hai

Nono logewo malangkhai.

Haping khrang satwi

Ani langmabo khrang sanai.

Nono logewo mankhai

Ani langmawo ehu..hu..khorang.

Nono tomakhaiwi tolangni

Nung ungkhade habarni bwsajwk.

Siri sudani bwrwi hinkhai

Nono hamjwk sungni phaikhamung.

Nung sirisudani bwrwi hinkhaide

Rinai chongrung kangtijak,

Bokhruk risa sotijak,

Khaja risa bolaitijak

Tak borok kubai korma chungtijak

Kbang(Kalbang) wakmu hotijak,

Wakhung nophu sigol lwk

Ramtang chongdroha

Bangri bengki kangtijakni

Mwtai bwsahai mwchangsa

Ung-wi tongkhamung.

Nini goron arai hinkhai

Nono nunairok khamlang ung-wi painai.

Pantwi thopsa nono

Ani hani golawo dawi

Jonw kwchangkhaiwi tongkhamung.

Lingma lingsani phaikhlai

Hani golani twikhuksa

Manungkhai lingma kmanai.

O habarni bwsajwk Pantwi

Nung thangyakhai nono

Ang tolangni muchu phabo

Nono tolang miya ungnai

Nunglai habarni bwsajakba.

Nung jeni langmawo thang-wi klai

Bini langma ehu..hu.. khorang.