SABO NWNG? By Sandhyaram Debbarma || Kokborok Koklop/Poem

SABO NWNG? By Sandhyaram Debbarma || Kokborok Koklop/Poem

Sabo nwng tini ano ringna phai?
Ani logio phaidi nwng hwn phai,
Rwktharwi bono thangma ulo khai
Khibiui klangnai mungsa manya khai.

Sabo nwng tini ano yak rom phai?
Ano yak tolwi twinani hwn phai,
Yak romwi tlangwi thangma ulo khai
Khibiui klangnai saichung suchuk khai.

Sabo nwng tini ano lam so phai
Ano lam soui twinani hwn phai,
Lama lam kolok himma ulo khai
Lama kwcharo khibiui klangnai.

Sabo nwng tini ano phwrwngnani phai?
Ano rwng kwrwng khlaina hwn phai,
Rwng kwrwng wngwi thangma ulo khai
Sebokse nwng ano rwi manya hwn khai.

Sabo nwng tini ano chubanani phai?
Mungsa chubachu se nwng rwi manya hwn khai,
Khuk bai simi saui nwng tamo khlainai
Ulo nwng ani kok khontai mannai.

Sabo nwng tini ano naina phai?
Agi se nwng ano mokol bai nukya khai,
Tabuk tahani nainani ma phai
Khuk kwtwi bai khe thampui romna phai.

Chongbari gana khai samung nangjaknai
Kok kotor kotor kok rwte sinai,
Tumungno chongbario ang kwplai wng khai
Tamo nang sandi ang nono rwnai.

Chongbari pai khai, kwplai wng khai
Achukthai kahamo ma achuk tikhai,
Kok rwma kokrok pokjagwi thangnai
Sak-sakni bagwi simi kaham naisinai.

Bono de chwng ba vote rwlai sinai?
Dophani ojama chwng chonglai sinai,
Achukthai kahamo ma achuk pai khai
Dophani hamkraino pokjagwi thangnai.

Chongbari phainai, chongbari thangnai
Kwcham haphang thángwi kwtal phaiphinai,
Kwcham twiphang slaijagwi kwtal chongjaknai
Haiphano slaijakliya chini kwpal khai.

Aboni bagwino ani o swngmung
Dophani hamkraino nainai de nwng?
Dophano swklwgwi chanai de nwng?
Sabo nwng?