DUKHIYA OCHAI || Andrew Debbarma

Khwrwi kamini Dukhiya
Sagobo tatal kak ya.
Aro uro-o bo wngwi Ochai
Mwtai simino khwlai.
Bini bihik Pungkhiti
Bwsaini bagwi kabti,
Bwsa bwtwi pora kwrwi—
Buphani jala wngwi!
Yakung yakwlap kwrwi,
Yago da kongsa twiwi,
Chengkhurup rabjak khwnai
Bono kirima chanai!
Lengchai lengchai khe himwi
Logi Baruwa twiwi.
Nokha pungma hai pherang
Bini kok sama khorang.
Mwnwima bini thak ya
Buino kirina nangya;
Sago wanama kwrwi—
Kok sao mwnwi mwnwi.
Mwtai barokma khwlai
Abono bini chathai.
Barokma mwtaini bumung,
Muihan se bini chamung.
Kulum kwsarok bini thanio
Tubuwi phai lai jao.
Buino sikiri mamang,
Mwtai khwlaina kok mang—
‘Khwlai di mwtai kotor,
Boroni daktor daktor?’
Mwtai phunugwi buino,
Busara- swkal mangno.
Bini thikwna naima
Buino sol thaya wngma.
‘Bachao mwtai kwbang
Nukhungo sili mamang!’
Bini sakduk khe selengmasingcha,
Kosol burasa bwsa!