JORABAI BAKSA BWCHANANI NANGO

JORABAI BAKSA BWCHANANI NANGO || Anta Joy Tripura || Koklop

Achukni tokla Raithai

Achuk wngwi kichikha

Kekre kuk kekre kuk hinwi.

Khorang kwtwisabai

Sungsago bwchasidi norogba

Haba twiba thanglai yade.

Mai mui sungnaima

Thapa ho muchungwi

Haba thangnairogni bagwi

Maisungwi musungwi

Maichu chugwi muichu chugwi.

Maitwk kwkmani kathi khorangbai

Mai khuklaimani mai bwkhaibai

Sungsago bwchasidi norog

Haba thangphai sidi.

Sadung sal bwlak bwlak

Tongwi tong phunu

Huk hokjakno sagwi larwkdi

Watwi kwlai khwlai

Huk khamya wnganw.

Sadung chring chring tongmabai

O sadung sanani naio

Watwi phaikha hinkhe norog

Boro habwi tongnai

Dakti dakti Gairing tangdi.

Tangjinai jorao tangwi larwkdi

Kaijinai jorao kaiwi larwkdi

Muichlwi thaichlwino

Janija jorao sagwi larwkdi.

Mai mungwi mai komungno

Ragwi larwk jinai jorao

Ragwi larwkya hinkhe

Mai sogwi thanganw.

Kubun dophani borokrog

Tal swkao thangwi phaikha.

Songduk dopharog tabukbo

Hachuk kamirogo tongnai

Tabuk phano ogo maikrwi

Chango ri-chung kangsa kaham krwi.

Kwchak kwkhrang kormo kuphu

Kuchuk haichi hinlaiwi thwngjagwi tongo.

Soisimung krwngbo kubum dopha

Tangkrwngbo, twimung krwngbo

Thwngmungkrwngbo, salni sal manwi

Kwtal kwtal karinaibo kubun dopha.

Nokhao binai hago manai

Twisikao manai twibisingo manai

Habisingo manai yago twinai bebakno

Kubun dophani borokrog tikhlai mani.

Sabo tamno phari tikhlaidi

Sabo tamno rwng swrwngdi

Songduk dopha kuchukgo kasana bagwi

Kuchuk haichi hinwi tongwile

Kuchuk kamaglak kuwar wnglak

Salni sal komorwise thangnai.

Kebono tolago siklainani tanaidi

Pharikha hinkhe kuchugo

Kasana bagwi sungsadi.

Bwphang phangsa kotorma

O bwphang sakao chanai bwthai

Kwbangkukno tongo.

O bwphangno saichung kagwi

Khagwi chamaglak.

Palbaksa sungsa laiwi

Bophang kasalai kha hinkhe

O bophang sakani bwthaino

Joto palbaksa kheno

Janija bedek bedekgo

Kagwi khagwi chakha hinkhe

Jotono bwthai komung

Kaham kahamno mwchanai.

Tei sal bwswk yapha khorogwi tongsinai.